LEVÍTICO 2
2
Rurumanta ruwasqa ofrendakuna
1Pipas Señor Diosman ruru ofrendata haywanqa chayqa, ñut'u hak'un ofrendanqa kanqa. Chaytan aceitewan ch'aqchuykunqa, chaymantaq inciensota churaykunqa. 2Hinaspan chayta Aaronpa churin sacerdotekunaman apamunqa. Chaymantan sacerdoteqa hoqarinqa hapt'ay ñut'u hak'uta, aceitetawan, llapan inciensontinta, hinaspan chayta altar patapi ruphachinqa llapallanta Señor Diosman apamusqa kasqanta rikuchinapaq. Chayqa mikhuna ofrendan, q'apayninmi Señor Diospa sonqonman chayan. 3Ofrendamanta puchuqqa Aaronpaq churinkunapaqwanmi kanqa. Chay puchuqqa ancha ch'uyan, Señor Diospaq mikhuna ofrendakunamanta kasqanrayku.
4Hornopi chayasqa t'antatachus haywanki chayqa, aceiteyoq chapusqa mana qonchuyoq ñut'u hak'u t'antakunan kanqa, hinallataq aceitewan llusisqa mana qonchuyoq llaphllallaña t'antakunapas.
5Pata sartenpi chayasqa t'antatachus haywanki chayqa, aceiteyoq chapusqa ñut'u hak'u mana qonchuyoq t'antan kanqa. 6Chaytan ñut'urqarinki, hinaspan chayman aceiteta hich'aykunki, chay hinatan haywanki.
7Llatapi theqtisqa t'antatachus haywanki chayqa, aceiteyoq chapusqa ñut'u hak'umantan ruwasqa kanqa. 8Chaykunamanta ruwasqa ofrendatan Señor Diosman apamunki, hinaspan chayta sacerdoteman haywanki, paymi chayta altarman apanqa. 9Sacerdotetaqmi wakillanta hoqarinqa llapallanta Señor Diosman apamusqa kasqanta rikuchinapaq, hinaspan chayta altarpi ruphachinqa. Chayqa mikhuna ofrendan, q'apayninmi Señor Diospa sonqonman chayan. 10Ofrendamanta puchuqtaqmi Aaronpaqwan churinkunapaqwan kanqa. Chay puchuqqa ancha ch'uyan Señor Diospaq mikhuna ofrendakunamanta kasqanrayku.
11Manan mayqen ofrendapas Señor Diosman haywasqaykichisqa qonchuyoqchu kanqa. Manan imatapas qonchuyoqtaqa miel misk'iyoqtapas Señor Diospaqqa mikhuna ofrendata ruphachikunqachu. 12Ñawpaq ruru ofrendata hinan chaykunata Señor Diosman haywawaqchis, ichaqa manan altar patapi ruphachikunmanchu sumaq q'apay kananpaq. 13Llapa haywasqayki ofrendatan kachiwan kachichanki, manan hayk'aqpas ofrendaykiqa mana kachiyoqqa kanqachu, Diosniykiwan rimanakusqata sut'inchaq kachitaqa churallankipunin. Llapa ofrendaykitan kachiyoqta haywanki.
14Señor Diosmanchus ñawpaq ruru ofrendata haywanki chayqa, ninapi hank'asqa mut'illaraq rurukunatapas poqosqaña ch'aqesqa rurukunatapas haywankin. 15Chay patamanmi aceiteta hich'aykunki, inciensotapas churaykunki. Chay hinatan haywanki. 16Llapallanta Señor Diosman apamusqa kasqanta rikuchinapaqmi sacerdoteqa ch'aqesqa rurumantapas aceitemantapas wakillanta hoqarinqa, chaytan llapan inciensontinta ruphachinqa, Señor Diospaq mikhuna ofrenda kananpaq.
Currently Selected:
LEVÍTICO 2: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
