ÉXODO 37
37
Rimanakuy caja ruwasqa
(Ex 25.10-22)
1Bezaleelqa ruwallarqantaqmi cajatapas acacia kurkumanta, wask'anmi huk metro chunka centimetroyoq karqan, anchonmi soqta chunka phisqayoq centímetro, sayaynintaq soqta chunka phisqayoq centímetro. 2Ukhuntawan hawantawanmi ch'uya qori llaphllawan qatarqan, ch'uya qoriwanmi chay patata muyuriqta ribeterqan. 3Ruwallarqantaqmi chaypaq qori tawa argollata tawantin chakinpaq, iskay argollata huknin qhatapaq iskay argollatataq hukkaqnin qhatapaq. 4Ruwallarqantaqmi acacia kurkumanta suskhuq k'aspikunata, chaykunatan qori llaphllawan k'uyurqan. 5Hinaspan caja qhatapi kaq argollakunata chay suskhuq k'aspikunata suskhuchirqan, cajata wantunapaq. 6Ruwallarqantaqmi ch'uya qori kirpanatapas hucha pampachana cheqas kananpaq, wask'anmi huk metro chunka centímetro, anchontaq soqta chunka phisqayoq centímetro karqan. 7Ruwallarqantaqmi iskay qori raphrayoqkunatapas, kirpanapaq iskaynin puntanpin takasqata ruwarqan. 8Huknin puntapi huk raphrayoqta, hukkaqnin puntapitaq hukkaq raphrayoqta, kirpanatawan kuskallataña iskaynin puntapi raphrayoqkunata ruwarqan. 9Hucha pampachana cheqaspi qhawanakushaqmi karqan, raphrankunataq chay cheqas pataman mast'arikurqan llanthuykunanpaq.
Diospa ñawpaqenpi churana t'antapaq mesa
(Ex 25.23-30)
10Hinallataqmi acacia kurkumanta huk mesata ruwarqan, wask'anmi huk metro karqan, anchontaq kuskan metro, sayaynintaq qanchis chunka centímetro. 11Ch'uya qori llaphllawanmi chayta mast'arqan, qoriwanmi muyuriqta ribeterqan. 12Hinallataqmi chaypa puntanta qanchis centímetro anchoyoqta kanchacharqan, chaytataq qori ribetewan muyuchirqan. 13Ruwallarqantaqmi unuyachisqa qorimanta tawa argollatapas, hinaspan chaykunata churarqan tawantin esquina chakiman. 14Argollakunaqa puntawan kuskan karqan, mesa wantuna k'aspikuna chaykunata suskhunanpaq. 15Mesa wantuna k'aspikunataqa acacia kurkumantan ruwarqan, hinaspan qori llaphllawan chaykunata k'uyurqan. 16Ch'uya qorillamantataqmi mesa patapi kananpaq ruwarqan qhata p'ukukunata, pocillokunata, hich'ana ofrendapaq qerukunata, p'uktu p'ukukunatawan.
Qori candelero
(Ex 25.31-40)
17Ruwallarqantaqmi takasqa ch'uya qori candelerotapas. Tiyananpas, k'aspinpas, t'ikankunapas, mukmunkunapas, phanchisqankunapas kikillanmantan karqan. 18Soqta k'allman ladonkunapi karqan:
kinsa k'allma huknin ladopi, kinsa k'allmataq hukkaq ladopi. 19Candelero k'aspimanta p'alqariq soqtantin k'allman almendro t'ika hina kinsa t'ikayoqkama karqan, mukmuntin phanchisqantin. 20Candelero chawpi k'aspipas almendro t'ika hina tawa t'ikayoqmi karqan, mukmukunantin phanchisqakunantin. 21Sapa iskay k'allman chawpi k'aspipas huk mukmu patapi tiyarqan. 22Mukmunkunapas k'allmankunapas kikillanmantan chawpi k'aspipi karqan, llapallanmi ch'uya qorimanta takasqa kikillanmanta karqan. 23Ruwallarqantaqmi ch'uya qorimanta qanchis lamparachakunatapas, pábilo allichanankunatapas, uspha p'ukuchankunatapas. 24Kinsa chunka kinsayoq kilo ch'uya qorimantan ruwarqan candelerota tukuy imaymanantinta.
Incienso ruphachina altar
(Ex 30.1-5)
25Hinallataqmi acacia kurkumanta incienso ruphachina altartapas ruwarqan. Wask'anpas anchonpas kuskan metrokaman karqan, sayaynintaq huk metro. Esquina waqrankunaqa kikillanmantan karqan. 26Hinamantataq patantapas, muyuriq qhatantapas waqrankunatapas ch'uya qoriwan qatarqan, muyuriq patantataq qoriwan ribeterqan. 27Churallarqantaqmi iskay qori argollatapas ribeteq uranpi, huknin qhataman iskayta, hukkaqnin qhatamanpas iskayta, wantunapaq k'aspikunata chaykunanta suskhuchinapaq. 28Suskhuq k'aspikunataqa acacia kurkumantan ruwarqan, hinaspan qoriwan k'uyurqan.
29Ruwallarqantaqmi hawina ch'uya aceitetapas, q'apashaq ch'uya inciensotapas, q'apaqkunata ruwaqpa ruwasqanta hina.
Currently Selected:
ÉXODO 37: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
