ÉXODO 22
22
Kutichipunapaq kamachikuykuna
1Pipas torotapas ovejatapas suwakuspa nak'anqapas vendenqapas chayqa, chay toromantan phisqa wakata qopunqa, chay ovejamantataq tawa ovejata.
2Suwachus wasi t'oqoshaqta hap'ichikunqa, hinaspa wañuqllapaqña k'irichikunqa chayqa, wañuchiqqa manan huchachasqachu kanqa. 3Pacha illarimuytachus kanqa chayqa, wañuchiqqa suwa wañuchisqanmantan huchachasqa kanqa.
Suwaqa suwakusqanmantan llapanta qopunqa. Manataq imanpas kutichipunanpaq kaqtinqa, suwakusqanmanta kutichipunanpaqmi pay kikin vendesqa kapunqa.
4Suwatachus suwakusqan animalta kawsashaq hap'ishaqta pipas tarinqa chayqa, iskaytañan pagachikunqa, torotaña, asnotaña, ovejataña kaspapas.
5Pichus campopipas uvas chakrapipas michinqa, uywantaq hukpa camponman haykunqa chayqa, allinkaq campontan allinkaq uvas chakrantan mikhusqamanta qopunqa.
6Pipas ninata hap'ichinqa, hinaspataq khiskaman aqaspa ruphaykunqa arkusqa trigota, otaq sayashaqllataraq, otaq chakrantinta chayqa, nina hap'iykachiqmi ruphasqamanta qopunqa.
7Pipas runamasinman qolqetapas, alhajakunatapas waqaychapunanpaq hap'ichikunqa, chay runaq wasinmantataq suwanqaku chayqa, suwan iskaytaña qopunqa, suwata tariqtinkuqa. 8Manataq tarinqakuchu chayqa, wasiyoqmi Dios yupaychana wasiman rinqa runamasinpa kaqninta mana llamiykusqanta yachanapaq.
9Maypachachus pipas hap'ikapunqa torotapas, asnotapas, ovejatapas, p'achatapas, ima chinkasqatapas, hinaspa pipas:
Kayqa ñoqaqmi, ninqa chayqa, iskayninkun Dios yupaychana wasiman uyarichikuq rinqaku, pitachus Dios huchachanqa, chaymi runamasinman iskaytaña qopunqa.
10Pipas runamasinman hap'ichikunqa asnotapas, torotapas, ovejatapas, ima animaltapas qhawapunanpaq, chay animaltaq wañunqa otaq k'irisqa, otaq mana piqpapas rikusqan suwasqa kanqa chayqa, 11chay runamasin uywayoqpaq Señor Diospa sutinpi juranqa uywayoqpa kaqninta mana llamikusqanta. Uywayoqtaq rimasqanta creenqa, manataq runamasinqa paganqachu. 12Qhawashaqtintaq suwaqtinkuqa, uywayoqmi pagapunqa. 13Phiña animalpa llik'irqarisqantaq kaqtinqa, mikhusqa puchutan sut'inchanapaq apamunqa, chaymi manaña paganqachu.
14Pitaqchus runamasinmanta uywata mañakunqa, hinaspataq uywayoqpa mana rikushasqan k'irisqa kanqa otaq wañunqapas chayqa, mañakuqmi pagapunqa. 15Uywayoqchus chaypi kasharqan chayqa, manañan paganqachu. Uywachus fletasqa karqan chayqa, uywayoqmi fletellantaña chaskikapunqa.
Runaq allinninpaq kamachikuykuna
16Pipas casarakunanpaq manaraq rimaykusqa doncella sipasta q'otunqa, hinaspa payta violanqa chayqa, warmi wawayoqmanmi warmi horqoy qolqeta qonqapuni, hinaspan chay sipaswan casarakunqa. 17Sipaspa taytanña mana casarachiyta munaqtinpas, payqa warmi wawayoqman qonqapunin doncella sipasmanta hina yachasqaña warmi horqoy qolqeta. 18Layqa warmiqa wañuchisqapunin kanqa.
19Pipas uywawan t'inkinakuqqa wañuchisqapunin kanqa.
20Pipas wak dioskunaman sacrificiota haywanqa, manataq ñoqa Señor Diosllamanchu chayqa, wañuchisqapunin kanqa.
21Sumaqtan wak llaqtayoqtaqa rikunki, amataqmi alqochankichu, qankunapas wak llaqtayoqmi Egipto suyupi kamurqankichis.
22Aman pi viudatapas mana tayta-mamayoqtapas ñak'arichinkichu, 23qanchus paykunata ñak'arichinki, paykunataq waqyakamuwanqaku chayqa, ñoqaqa paykunata uyarisaqpunin. 24Ñoqaqa k'arak phiñasqan qankunata espadawan wañuchisqaykichis. Hinan warmiykichispas viuda kapunqaku, wawaykichispas mana tayta-mamayoq kapunqaku.
25Ñoqaq llaqtay llaqtamasiyki wakcha runamanchus qolqeta manunki chayqa, aman payta qolqe manuq hinachu rikunki, amataqmi uñantapas cobrankichu. 26Chay runa-masiykichus ponchonta prendasunki chayqa, inti haykuytan ponchonta kutichipunki, 27chay ponchollanmi kan chiriqtin p'istuykukunanpaq. Mana chayqa, ¿imapin puñuykunqa? Paychus waqyakamuwanqa chayqa, ñoqan uyarisaq, ñoqaqa khuyapayakuqmi kani.
28Aman Diosta ñakankichu, aman llaqtayki kamachiqtapas ñakankichu.
29Usqhayllan ofrendata apamuwanki cosechaykimantapas, vinoykimantapas, aceiteykimantapas.
Phiwi churiykitaqa qopuwankin. 30Qopullawankitaqmi wakaykiq ovejaykiq ñawpaq uñantapas, qanchis p'unchayllan mamanwan kanqa, pusaqkaq p'unchaypiqa qopuwankin.
31Qankunaqa ch'uya runaykunan kanaykichis. Aman campopi phiña animalkunaq llik'irqarisqan aychata mikhunkichischu, alqokunamanmi qaraykapunkichis.
Currently Selected:
ÉXODO 22: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
