ÉXODO 15
15
Moisespa takin
1Hinaqtinmi Moisespas Israel runakunapas kay takita Señor Diosman takirqanku:
—Señor Diosman takisaq,
payqa hatunchasqa Qollanan.
Caballotapas sillakuqtapas
Puka Qochamanmi wikch'urqan.
2Señor Diosmi kallpachaqniyqa,
chaymi takipuni.
Paymi qespichikuwarqan,
paymi Diosniy, yupaychasaqmi,
paymi taytaypa Diosnin, hatunchasaqmi.
3Señor Diosqa maqanakuqmi,
Señor Diosmi sutinqa.
4Puka Qochamanmi wikch'uykurqan
rey Faraonpa carretankunatapas ejercitontapas.
Allinnin capitanninkunapas
Puka Qochapin heq'eparqanku.
5Rumi hinan pampakama chinkaykurqanku,
ukhullaña qochan paykunata millp'uykurqan.
6Señor Diosnilláy,
paña makiykin ancha atiyniyoq,
Señor Diosnilláy,
paña makiykin awqata ñut'un.
7Manchana atiyniykiwanmi
contrayki sayariqkunata atipanki.
K'arakta phiñakuspaykin
paykunata ichhuta hina rupharparinki.
8Kallpawan phukuykuqtiykin
unuqa huñuykukurqan,
phoqchiqeqkunan perqa hina sayarirqan,
ukhullaña qochan rumiyaykurqan.
9Awqaqa nirqanmi:
Qatisaqmi, hap'isaqmi,
qechusqakunatan rakisaq,
chaykunawanqa amikusaqraqmi.
Espadaytan horqokusaq,
makiymi paykunata chinkachipunqa, nispa.
10Ichaqa phukuykurqankin,
hinan qochaqa paykunata p'ampaykurqan,
titi hinan ati-musphay unuman chinkaykurqanku.
11Señor Diosnilláy,
¿mayqen diostaq qan hinari?
Manan mayqenpas qan hinaqa qhapaq ch'uya kanchu,
musphanakunata manchanakunata ruwaqqa.
12Paña makiykitan haywarirqanki,
hallp'ataq awqakunata p'ampaykurqan.
13Mana p'itiy munakuyniykiwanmi
qespichisqayki llaqtata pusanki,
atiyniykiwanmi ch'uya tiyanaykiman pusanki.
14Hatun suyukunan chayta yachaspa chukchushanku,
Filistea runakunan manchapakushanku.
15Edom kamachikuqkunan mancharikushanku,
Moab umallikunan manchasqa khatatatashanku,
Canaán llapa runakunan chiriyashanku.
16Señor Diosnilláy,
anchatapunin manchapakushanku,
ancha atiyniykita reparaspankun
manaña kuyuripunkuchu llaqtayki pasanankama,
kay rantikamusqayki llaqta pasanankama.
17Señor Diosnilláy,
qanmi orqoykipi tiyachinaykipaq pusanki,
tiyanaykipaq akllakusqaykiman pusanki,
wakichisqayki ch'uya pachaman pusanki.
18Señor Diosmi wiñay-wiñaypaq kamachikunqa, nispa.
Mariaq takisqan
19Rey Faraonpa carretankunan caballopi soldadonkunan Puka Qochaman haykurqan, hinan Señor Diosqa unuta paykunaman kutiykachirqan. Israel runakunataq ichaqa qocha ukhunta ch'akita chimparqanku. 20Chaymi Aaronpa panan profetisa Mariaqa panderetata hap'irqan, llapa warmikunataq paypa qhepanta puririrqanku pandereta hap'intin tusukuspa.
21Mariataq paykunapaq takirqan:
—Señor Diosman takiychis,
payqa hatunchasqa Qollanan.
Caballotapas sillakuqtapas
Puka Qochamanmi wikch'urqan, nispa.
Marapi p'osqo unu
22Moisesmi Israel runakunata Puka Qochamanta pusarqan, chaymi Shur ch'inneqman ripurqanku, chaypitaq kinsa p'unchay mana unuta tarispa purirqanku. 23Chaymantataq Maraman chayarqanku, manataq chaypi kaq unuta ukyayta atirqankuchu p'osqo kasqanrayku. Chaymi chayneqta Mara#Hebreo rimaypi “Mara” sutiqa “p'osqo” ninantan nin. sutiwan suticharqanku. 24Chaypachan runakunaqa Moisés contra chhuchupakuspa tapurqanku: —¿Imatan ukyasun? nispa.
25Hinan Moisesqa Señor Diosman waqyakurqan, Señor Diostaq payman huk sach'ata rikuchirqan. Chaymi chay sach'ata unuman wikch'uykurqan, unutaq misk'i kapurqan. Chaypin Señor Diosqa paykunata probarqan, chayllapitaq paykunapaq kamachikuytapas chaninchaytapas churarqan. 26Nirqanmi: Ñoqa Apu Señor Diosniykichispa simiytachus makilla uyarinkichis, chaninkaqtachus qayllaypi ruwankichis, kamachikuyniykunatapas kasunkichis, tukuy unanchay simiykunatapas hunt'ankichis chayqa, manan Egipto runakunata hap'ichisqay onqoykunawanqa hap'ichisqaykichischu, ñoqaqa qhaliyachiqniykichis Señor Diosmi kani, nispa.
27Chaymantataq Elimman chayarqanku, chaypin qanchis pukyu karqan, qanchis chunka palmerapiwan. Chaypin unu patapi karpakurqanku.
Currently Selected:
ÉXODO 15: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
