ZACARIAS 5
5
Pawachkaq wankusqa qellqa rikusqanmanta
1Huktawanmi revelacionniypi qawarispay rikururqani pawachkaq wankusqa qellqata. 2Hinaptinmi angelñataq tapuwarqa:
—¿Imatataq qawachkanki? —nispa.
Hinaptinmi ñoqañataq nirqani:
—Ñoqaqa qawachkani pawachkaq wankusqa qellqatam, wak qellqapa largonqa kasqa isqon metrom, anchonñataqmi kasqa tawa metro parten —nispa.
3Chaymi payñataq niwarqa:
—Wakpiqa lliw nacionniki ñakasqa kananmantam qellqasqa kachkan, huklawninpim qellqasqa kachkan llapallan suwakuqkuna puchukachisqa kananmanta, huklawninpiñataqmi qellqasqa kachkan llapallan yanqamanta juraqkuna puchukachisqa kananmanta. 4Llapallan Kamachiq Tayta Diosmi nin kaynata: “Kay ñakaykusqaytaqa ñoqam apachichkani suwakuqpa wasinman yaykunanpaq chaynataq sutiyrayku yanqamanta juraqpa wasinmanpas yaykunanpaq. Chay apachisqay ñakayqa chay wasikunapim kanqa qerunkunapas hinaspa ruminkunapas chinkachisqa kanankama” nispa.
Tupuna canastapi tiyachkaq warmita rikusqanmanta
5Chay rimapayawaqniy angelñataqmi asuykuwaspan niwarqa:
—Kunanñataqyá qawariy wak imam rikurimuqta —nispa.
6Chaymi ñoqañataq tapurqani:
—¿Imamá wak qawasqayqa? —nispa.
Hinaptinmi payñataq niwarqa:
—Wak qawasqaykiqariki huk tupuna canastam. Wak tupunaqa nacionnikipi llapallan runakunapa mana allin rurasqanku tupuqmi —nispa.
7Chay tupuna canastaqa kasqa titimanta tapayoqmi, chay tapanta huk kaqnin hoqariykuptinmi chay canastapa ukunpiqa warmi tiyachkasqa. 8Hinaptinmi chay angel niwarqa:
—Kay warmiqa rikchakun chay runakunapa mana allin rurasqanmanmi —nispa.
Chaynata niykuwaspanmi chay angelqa tupuna canasta ukuman chay warmita tanqaykurqa hinaspam wichqarurqa chay titimanta tapanwan.
9Huktawan qawarispaymi rikururqani iskay warmikuna rikurimuqta, chay warmikunaqa kasqa wayrapa tanqasqan raprayoqkamam, chay raprankunaqa kasqa cigueñapa raprankuna hinam. Paykunamá chay tupuna canastata altollanta aparqaku.
10Hinaptinmi ñoqañataq chay rimapayawaqniy angelta tapurqani:
—¿Maymantaq apachkanku wak tupuna canastataqa? —nispa. 11Hinaptinmi payñataq niwarqa:
—Waktaqa apachkanku Sinar sutiyoq Babilonia nacionpi templota ruranankupaqmi. Chay templota qespirachiptinkum chaytaqa churaykunqaku maymi tiyananpi —nispa.
Currently Selected:
ZACARIAS 5: QUEAYA87
Highlight
Copy
Compare
Share
Want to have your highlights saved across all your devices? Sign up or sign in
