MALAQUIAS 3
3
1Llapallan Kamachiq Tayta Diosmi nin kaynata:
—Ñoqam kachamusaq hamunaypaq allichapuwaq ñoqamanta willakuqta. Qamkunapa maskasqaykichik Señorqa qonqayllamantam temployman chayaramusaq. Ñam chayamuchkanña munayllawanña suyasqaykichik contratomanta willakuqqa —nispa.
2¿Pitaq atinman aguantayta paypa hamunan punchawpiqa? ¿Pitaq sayayta atinman paypa rikurimunan punchawpiqa? Payqariki chayaramunqa metal chulluchiq nina hina chuyanchananpaqmi chaynataq taqsana jabon hina yuraqyachinanpaqmi. 3Señorqa tiyaykunqa qori-qollqe chulluchichkaq hina Leviy castakunata chuyanchananpaqmi. Chaymantañam paykunaqa imaynam ruranankuman hina Tayta Diosman ofrendankuta apamunqaku. 4Tayta Diosqa agradowanñam chaskinqa Juda nacionniyoq runakunapa ofrendantapas chaynataq Jerusalen llaqtayoq runakunapa ofrendantapas, payqa chaskinqa ñawpaq tiempokunapi agradowan chaskisqanman hinam.
5Llapallan kamachiq Tayta Diosmi nin kaynata:
—Qamkunata juzganaypaqmi ñoqaqa kikiypuni hamuchkani. Ñoqapunim testigo kasaq adivinaq runakunapa contranpi, hukwan-hukwan kakuq runakunapa contranpi, yanqamanta juraqkunapa contranpi, llamkaqkunapa pagon hapikuykuq runakunapa contranpi, viudakuna hinaspa mana tayta-mamayoqkuna ñakarichiq runakunapa contranpi chaynataq forastero runakunapa contranpi sayariqkunapa contranpipas. Chayna runakunaqa manam ñoqataqa respetawanchu.
Diezmokunamantawan ofrendakunamanta
6—Ñoqa Tayta Diosqa haykapipas hina kaqllam kani, chayraykum Jacobpa mirayninkunaqa manaraq pasaypaqchu chinkarunkichik. 7Qamkunaqa abueloykichikkunapa tiemponmantaraqmi decretoykunataqa qepanchakurunkichik, manam qamkunaqa kasukuyta munarqankichikchu. Chaynaqa kutirikamuwaychikyá, hinaptinqa ñoqapas qamkunamanmi kutirikamusaq. Chaynatam nin Llapallan Kamachiq Tayta Dios. Ichaqa qamkunam: “¿Imanasqataq qanmanqa kutirikamusaqku?” nisparaq ninkichik. 8¿Yaqachum runaqa Diosmanta suwakunman? Arí, qamkunaqariki ñoqamantam suwakuchkankichik hinaspam kaynataraq tapuwankichik: “¿Imaynanpitaq ñoqaykuqa suwakurqaykiku?” nisparaq. Qamkunaqariki suwakuchkankichik diezmoykunatawan ofrendaykunatam. 9Qamkunaqa suwakuwasqaykichikraykum enteron nacion ñakasqa kachkankichik. 10Chaynaqa lliw diezmokunatayá temploypi qollqe churanaman apamuychik hinaptiyá mikuypas ama pisichunchu wasiypiqa. Kunanyá pruebawaychik ¿manachum ñoqaqa cielokunapa ventananta kichaykuspay bendicionniyta qomusqaykichik llimparinankama? Chaynatam nin Llapallan Kamachiq Tayta Dios.
11—Qamkunapa kawsaynikichik mikuq urukunatapas ñoqapunim qarqorusaq, chakraykichikpi uvas plantaykichikpas mana pisiytam rurunqa. Chaynatam nin Llapallan Kamachiq Tayta Dios. 12Llpallan nacionkunam sutichasunkichik kusikuyniyoq nacionwan, chaynataqa sutichasunkichik munayllapaqña nacion kasqaykichikraykum. Chaynatam nim Llapallan Kamachiq Tayta Dios.
Runankunata Tayta Dios llakipayasqanmanta
13Tayta Diosmi nin kaynata:
—Qamkunaqa rimasqaykichikwan insultawaspam kaynataraq tapuwarqankichik: “¿Imatataq qampa contraykipiqa rimarqaniku?” nispa. 14Kaynatam rimarqankichik: “Yanqapaqmi Diosta adorayqa. ¿Imatataq horqokunchik paypa kamachikusqankunata ruraspaqa? ¿Imatataq horqokunchik Llapallan Kamachiq Tayta Diospa ñawpaqninpi llakillawanña kawsaspanchikqa? 15Ñoqanchikqariki qawachkanchikmi hatunchakuq runakunapas kusisqallaña kawsakusqankuta, mana allin ruraqkunapas tukuy imapim alli-allin lloqsichkanku. Paykunaqa Diosta pruebaman churaspapas manam castigachikunkuchu” nispa.
16Tayta Diosta respetaqkunam kikinkupura rimanakurqaku hinaptinmi Tayta Diosqa atencionwan uyarirqa. Tayta Diospa ñawpaqninpim huk librota qellqarqaku chaynapi Tayta Dios respetaqkunata chaynataq paymanta yuyaymanaqkunata yuyarinankupaq.
17Llapallan kamachiq Tayta Diosmi nin kaynata:
—Ñoqaqa huk punchawtam alistachkani paykunaqa ñoqapa runaykunaña kanankupaq. Imaynam huk taytapas llakipayarikun yanapaqnin churinmanta, chaynam ñoqapas paykunamanta llakipayarikusaq. 18Chaynapim qamkunaqa huktawan cuentata qokunkichik pim allin ruraqqa kasqanmanta, pim mana allin ruraqpas kasqanmanta, pim Dios adoraq kasqanmantapas chaynataq pim mana adoraq kasqantapas —nispa.
Currently Selected:
MALAQUIAS 3: QUEAYA87
Highlight
Share
Copy
Want to have your highlights saved across all your devices? Sign up or sign in