Génesis 49
49
Wañukunallanpaqña churinkunata Jacob bendecisqanmanta
1Churinkunata qayaykuspam Jacob nirqa:
Huñunakamuychik, hamuq punchawkunapi imayna kanaykichikmanta willas-qaykichik.
2Jacobpa churinkuna,
huñunakamuychik taytaykichik Israelta uyarinaykichikpaq.
3Rubén, qamqa piwi churiymi kanki,
atiyniywan kallpaypa qallariyninmi kanki.
Hatunchasqa hinaspa atiyniyuqmi kanki.
4Lloqlla hina mana harkay atinam kanki,
manañam piwi churiyñachu kanki,
taytaykipa churiwachan warmiwan puñuruspayki
camaytapas qanrachasqaykimanta.
5Simeonwan Leviyqa wawqentinmi kanku,
armankupas mana allinkuna ruwanallankupaqmi.
6Huñunakuyninkumanpas manam yaykuymanchu,
paykunawanqa espirituypas manam hukllawakunmanchu.
Piñakuyninkupim runata wañuchirqaku,
caprichakuspankum toropa ankunta kuchurqaku.
7Piñakuyninkupas ñakasqa kachun,
mana llakipayakuq kayninkupas ñakasqa kachun,
Jacobpa mirayninkuna ukupim mirayninkunata rakinasaq.
Israel nacionpim mirayninkunata cheqechisaq.
8Judá, wawqekikunam qamta alabasunki,
enemigoykikunatam kunkanmanta hapinki,
wawqekikunam ñawpaqnikipi kumuykunqaku.
9 #
Nm 24.9. Churilláy Judá, uña león hinam qamqa kanki,
hapimusqaykiwan saksaspam waqtapanki.
Hatun león hinaraq kurkuykuspa siriykuptiki
¿pitaq rikchachisunkiman?
10Manam pipas Judapa atiynin qechuyta atinqachu,
dueño hamunankamam makinpi varatapas mana qechunqakuchu,
payllatañam lliw runakunapas kasunqaku.
11Uvas sachamanmi malta asnonta wataykunqa,
uvaspa ikllipanmanmi uña asnochanta wataykunqa;
vinowanmi payqa pachantapas taqsanqa,
uvaspa yakunwanmi capantapas taqsanqa.
12Vinomantapas aswan pukam ñawinkunaqa,
lechemantapas aswan yuraqmi kirunkunapas.
13Zabulonmi lamar qochapa patanpi yachanqa,
chaypim barcokunapa sayanan kanqa;
linderonñataqmi Sidón llaqtakama chayanqa.
14Isacarqa kallpan huntasqa asno hinam,
payqa corralninpi waqtapaq asno hinam.
15Samakuyqa allin kasqanta rikuspam,
chaynataq allpapa sumaqllaña kasqanta rikuspam,
wasanta kurkuykachispan qepita aparqa,
criado hinam hukpaq llamkarqa.
16Danqa Israelpa huknin ayllun hinam
castankunata allinta kamachinqa.
17Payqa ñanpa patanpi maqta urum,
pasaq caballokunapa ankunta kachuspam
silladakunata saqtachin.
18Diosnilláy, salvaykuwanaykitam suyachkani.
19Gadqa atacasqam kanqa,
chaymantam paypas kutichikuspa vencenqa.
20Aserpa tantanqa miskillañam kanqa,
reykunamanpas miskillaña mikuytam qonqa.
21Neftaliyqa munasqanpi purikuq tarukam,
kuyayllapaq uñakunatam wachakunqa.
22Joseyqa yakupa patanpi rurusapallaña sacham,
kallmankunapas perqapa hawantam mastarikun.
23Payta cheqnikuspankum flechakunawan flechamunku,
yuya-yuyarispam paytaqa kamimunku.
24Chaywanpas Joseyqa flechanantam allinta takyachin,
brazonkunatapas allin niqtam kallpanchan,
chaynataqa ruwanqa Jacobpa atiyniyuq Diosninraykum,
Israelpa michiqnin Diosninraykum,
Israelpa harkaqnin Diosninraykum.
25Taytaykipa Diosninmi yanapasunki,
Tukuy Atiyniyuq Diosmi bendecisunki,
cielokunapi kaqkunawan, lamar qochapi kaqkunawanmi bendecisunki.
Warmikitapas achka wawakunawanmi bendecinqa.
26Taytaykunapa bendeciwasqanmantapas mastaraqmi bendecichkayki,
wiñaypaq kaq orqokunamantapas mastaraqmi bendecichkayki,
Joseypa umanpiyá kay bendicionkuna wiñaypaq kachun,
qamqa wawqekikunamanta akllasqam karqanki.
27Benjaminqa qechukuq atoqmi,
achikyaramuptin hapimusqanta mikuqmi,
tardeykuruptin qechumusqanta rakinaqmi.
28Kaykunam Israelpa mirayninmanta chunka iskayniyuq ayllukuna. Paykunatam sapakamata taytanku bendeciykurqa.
Jacob wañukuptin pampakusqanmanta
29Churinkunata kamachispanmi Jacob nirqa:
Wañukuptiyqa ñawpaq taytaykunapa pampakusqanpim pampawankichik. Paykunaqa Het casta Efronpa chakranpi kaq machaypim pampakurqaku. 30#Gn 23.3-20.Chay machayqa kachkan Canaán law Mamrepa chimpan Macpela chakrapim. Chay machaytam Abraham rantirqa Het casta Efronmanta, mirayninkuna chaypi pampakunanpaq. 31#Gn 25.9-10.#Gn 35.29.Chay machaypim pamparqaku: Abrahamta, warmin Sarata, Isaacta, warmin Rebecata chaynallataq Leatapas. 32Chay chakrawan machayqa Hetpa mirayninkunamanta rantisqanmi karqa, nispa.
33 #
Hch 7.15. Churinkunaman kamachikuykunata niykuspanmi, waqtapaykuspa Jacob wañukurqa, hinaspam ñawpaq taytankunapa kasqanman huñukuykurqa.
Currently Selected:
Génesis 49: RCQ12
Highlight
Share
Copy
Want to have your highlights saved across all your devices? Sign up or sign in
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012