Rom 7

Bɨn mu ó é dia otî, aka be mɨmɛra é mpila motie mo Moyiz

1Obɨɔ ga bam aa! Bɨn bé ekʉ gʉa motie mo Moyiz. Bɨn bé egʉa ó, etie, lé ejwɨʼ mʉr ó, njɨ é jɔʼ nye dina kʉ ɨ. 2Me paʼ dwe dweʼle: Motie, mé elɛɛ ó, mbɛa mʉma, wé edi nɛra e njʉm we ó, cye yiyɛh njʉm we dina kʉ ɨ. ǃƗ njʉm waa si ka dwè nɛʼɛ, mʉma waa, nyi duho é mpila eba laa é pololo. 3Cye yiyɛh njʉm we dina kʉ ɨ, ǃɨ myɛl we si to ni é l'eba boo mʉr fih nɛʼɛ, bé ónʉa nye ó, mpʉ syɛl mɨfyɛba. To kœb ó, ǃɨ njʉm we si dwè nɛʼɛ, mʉma waa óbɛm ni é l'eba boo nuu mʉr fih, antaa etie lé elɛɛ ó: «Yé mpene ó, mʉr asa mɨfyɛba» ɛ. Nye mu ó mʉma ndɨ é dia otî ɨ.

4Obɨɔ ga bam aa! Bɨn nteme, bé ó é dia otî, motie mo Moyiz l'aka jwɨ̀ʼ bɨn, ebe, é zyɛŋa win boo Krɨst, bɨn bé a si dwè é nko paʼ bɨpuno. Bɨn bé a dwè ó, bɨn nkʉʼ di baa mo Krɨst, mʉr Zyɛm a pɛ̀h é foo ó, bɨna nkʉʼ gumo ga mpumo é l'efu mo Zyɛm ɨ. 5É jɔʼ yiyɛh bɨna bé a be lé edu ga bɨgwɨma bɨ nyʉl bɨpuno ga wina ɛ, motie mo Zyɛm, mé a be-be nteme ó, lé eto le eyɨm bɨfum bɨ nyʉl ga bina ó, byé loŋla bɨsyɛɛla bɨ ebebe bɨna bé a kʉ gwɨm ɨ. Byé ntɔʼ daʼre efie é monyʉl ga mɨna. 6No ó, banana, bɨna bɨ dwihɔ é mpila motie. Bɨna mu ó si dwè ga é nko paʼ motie maa. Mé ó b'a mɛr bɨna ga é dia olʉa é molu pihe. Bɨna bé a dwihɔ tɨʼ ó, bɨna nkʉʼ di é dia osyɛl o mosa mo Zyɛm, lé esea e nye é zi dwan, waa Mbɨambɨa Sisim lé elɛʼle bɨna ga ɛ. Bɨna bé aka sea ga e nye lé edu sa okalara o motie, bé a tilɔ é l'epeb ɨ.

Ebebe, ndwe e motie

7Yé be no nɛʼɛ, bɨna bé ólɛɛ ga é yé? Zê motie mo Moyiz, mé ó sa lé esa ó, mʉr saʼ syem ɨ? Hɨʼɨ, yé abe ba no! Me abe e nkul egʉa sa ndɨ «syem» ɨ, nkʉ yé abe é zi motie maa. Nkʉ motie, mé a be ó be, alɛɛ ó: «Acen mih é sa yoonkan, nkʉ gwɨm ye» nɛʼɛ, mpa me agʉa lɔb esa bɨgwɨma. 8Sa gwar, jɨh tɨʼ motie, mé a nee Syem zi, wé ntɔʼ ze mara me. Me ntɔʼ taare lé egwɨm bɨsa byoonkan, mɨmbi mimyɛh. Ebe, nkʉ motie, mé a be ó be, abe nɛʼɛ, mpa Syem, wé a be ó si bɛa dwè. 9Molu pihe, é jɔʼ me a baapa gʉa motie maa ɛ, me nteme a be ó lé etiʼe. To kœb ó, jɨh tɨʼ me a kʉ gʉa motie maa, mé ntɔʼ jɨm Syem é dwo, me ntɔʼ dwè. 10Zyɛm a tiile bʉr motie ó, bé nkʉʼ bi tiʼ molu mo mpoʼ mɨmɛh ebe mbi bé lé edu motie e. To kœb ó, motie maa, mé a ka ze jʉ mɛm ó, jʉ jʉʼo. 11Jɨh tɨʼ motie, mé a nee Syem zi, wé ntɔʼ bee ó, wé mu ó e zi mbeʼ ó, wé dimla me é zi bɨkʉʉŋʉ bye. Wé a jʉ me ó, jʉ jʉʼo, lé ebɨlan e motie Zyɛm a tiile e. 12To kœb ó, motie, mé ó sa ndɨ ti ɨ. Mɨtiila mo Zyɛm, myé ó sa ndɨ ti ɨ. Myé nteme, myé ó cɨcyel le mbɨmbɨa.

13Zê no, yé elɛɛ ó, sa ndɨ é bul mbɨa é mpʉ motie maa ɛ, yé a si jʉ me ɛ? Hɨʼɨ, yé abe ba no! Sa yé a jʉ me e, yé a be ó njɨ Syem. Wé a si bana bɨlan e sa mpa yaa, wé ntɔʼ jʉ me e tɨ. Syɛɛla yaa ó ndɨ elɛʼle bɨna ga sa ndɨ syem ɨ. Syem, wé a ka bul nyin é l'ebebe ó, é jɔʼ yaa. 14Bɨna bé egʉa ga ó, motie, mé ó sa lé eze bɨna ga e sikʉlʉ ndɨ ejala e Mbɨambɨa Sisim ɨ. No ó, tiʼ yam yɛɛ, yé eduho ó, njɨ é nyʉl bɨpuno. No ó me a ka liʼ e sɔʼɔ ó, njɨ dia olʉa mo Syem. 15Me apa kʉ gʉa sa lé eyɨm me ó, me saʼ bɨsyɛɛla me lé esa ɛ. Me abe lé esa bye ebe kpɛl yam. Bɨsyɛɛla me lé ebul nwim ɨ, byé ó me lé esa. 16ǃMe si sa bɨsyɛɛla me ndɨ akpɛl sa nɛʼɛ, lɛɛ ó, mɨ mɛʼle ó, motie, mé é mbɨa. 17Yé be no nɛʼɛ, syem me lé esa ɛ, ntʉʼ mɛm mʉr tɨʼ lé esa we. Lɛɛ ó, sa lé esa we e, yé ó njɨ syem ndɨ é me e. 18Ebe no, me egʉa mbɨmbɨa ó, sa mpa, yé abe é me. (Me si jala le etile yɛɛ ó: «é nyʉl bɨpuno wam tʉŋlʉ».) Ebe sa lé ekunbo e me e, yé ó, me gwɨmɨ mɨmpaŋ bɨsyɛɛla. To kœb ó, nkul ndɨ ó, me saʼ bɨsyɛɛla byaa ɛ, nye akunbo e me. 19Embɨa me lé egwɨm sa ɛ, ntʉʼ le me lé esa. Me esa ó, njɨ ebebe me lé ebul bene e. 20Sa me ndɨ akpɛl sa ɛ, ǃme si sa ye nɛʼɛ, no yé elɛʼle ó, ntʉʼ me ndɨ e gwɨma esa ye. Syem ndɨ é me e#7.20 Nkʉ «mɨnjwɨr myam, myaa ndɨ egwɨm sa syem ɨ, myé ó lé etine me ó, me saʼ ye.», wé ó lé etine me ó, me saʼ ye.

21No ó, sa me lé ebee é jɔʼ yiyɛh ó yi: é jɔʼ me lé egwɨm sa embɨa ɛ, ebebe lɛɛ ó me lé eka koʼo lé esa ɛ. 22Gwɨma, yé eduho me é mo si ó, me duʼo motie mo Zyɛm. 23To kœb ó, me ebee é bɨpeh bɨ nyʉl wam ó, yé e lʉʉ etie lé elwimla e l'etie lé eduho é mɨpɛhla mɨ leme wam ɨ. Syem ndɨ é me e#7.23 Nkʉ «Mɨnjwɨr myam, myaa ndɨ egwɨm sa syem ɨ, myé ó lé entaa ocyoo wam, me ntɔʼ lihba elʉa mo Syem.», wé ó lé entaa ocyoo wam, me ntɔʼ lihba elʉa mo Syem ndɨ me é bɨfum bɨ nyʉl ɨ. 24A vwaʼ e me! Zé ósyɛb me é nkul nyʉl bɨpuno nwa? Nye ejɨ jʉ me! 25Bɨna dweʼ ga Zyɛm ekiba é zyɛŋa ga wina boo Tî ga wina Yesʉs-Krɨst!

Yé ó mpʉ me ndɨ e nkul elɛɛ ó, mɨpɛhla mɨ leme wam, myé egwɨm sea syɛɛ ó, yaa motie mo Zyɛm ndɨ etɨe e. Nyʉl bɨpuno wam nyɛɛ, nye ekʉ ka kpɛl ó njɨ me diʼe elʉa mo Syem#7.25 Nkʉ «elʉa é paʼ mɨnjwɨr myam, myaa ndɨ egwɨm esa syem ɨ»., le edu mɨnjwɨr mye.

Currently Selected:

Rom 7: ozmBad

Highlight

Copy

Compare