Rom 6

Bʉr o ndɨ é zyɛŋa wɔɔ boo Yesʉs ɨ, bɨ bi tiʼ molu mo mpoʼ mɨmɛh

1Yé be no nɛʼɛ, bɨna kaʼ lɛɛ ga é yé? Zê bɨna toʼ ga dolo lé esa ga mɨsyem é l'efu ó, Zyɛm lɛʼla bɨna ga mpwaʼ ncwɨncwɨa we ɛ? 2Hɨʼɨ, yé abe ba no! Bɨna bɨ dwè ga é nko paʼ mo Syem#6.2 Dwɛʼa 1 Pyɛr 2.24.. Ebe no, abe e sa yé ósa ó, bɨna toʼ ga dolo le esa mɨsyem. 3Zê bɨn bé agʉa ó, é jɔʼ bɨna bé a nʉa ga ndubo e, bɨna bɨbɛh, bé a si syɛŋa ga é Yesʉs-Krɨst ɛ? É ndubo waa, bɨna bé a si dwè ga é zyɛŋa ga wina boo Yesʉs. 4Bɨna ga e boo Yesʉs ó b'a dwè, dɨlɔ é ndubo waa zyɛŋa é l'efu ó, bɨna pàha ga e nkul mo Zyɛm Sɔŋ ndɨ e kum ɨ. Mpʉ Lœma mulo mo Zyɛm a pàh é foo e, yé ejala ó, bɨna kœʼœ ga ebò e cyen edwan pie ndubo.

5Yé be ó, bɨna ga e boo nɔɔ, bé a dwè ó, efie egwar zyɛŋa nɛʼɛ, lɛɛ ó, bɨna ga e boo nɔɔ, bé ópàh ga jwɨʼ gwar yaa nteme. 6Bɨna bé egʉa ga ó, é jɔʼ Yesʉs-Krɨst a cyèlɔ é klos ɨ, Zyɛm a si bomlo mɨnjʉ̌m motum ga mɨna tɨʼ nteme é l'efu ó, nye dwihɨ bɨna ga nyʉl ndɨ eyɨm bɨna ó, bɨna saʼ ga mɨsyem ɨ, ndwe nteme, bɨna l'ayi ka bâʼle di ga molʉa, lé esil lé esa mɨsyem mimyɛh bɨgwɨma ga bina ndɨ eyɨm bɨna ó, bɨna saʼ ɛ, 7ebe, mʉr ndɨ si dwè e, nye mu ó é dia otî é nko paʼ mɨsyem. 8Yé be ó, bɨna ga e boo Krɨst, bé a si dwè ga zyɛŋa nɛʼɛ, kʉ gʉa ó, bɨna ga e boo nɔɔ, bé óbâʼle tiʼe ga é zyɛŋa. 9Mpʉ bɨna lé egʉa ga ó, Yesʉs-Krɨst a si pàh é foo e, no yé elɛʼle ó, nye aŋa ka bâʼle dwè ó tɨʼ ɨ. Efie, lé aka jwɨ̀ʼ nye. 10É jɔʼ nye a dwè e, nye a dwè ó, é jɔʼ gwar é bɨjɔʼ bibyɛh, é lɔb ejala e mɨsyem mɨ bʉr. Banana, nye mu kʉ ka tiʼe ó njɨ é l'efu mo Zyɛm. 11Saʼ ga nteme no. Toŋla ga ó, bɨn bé ó bʉr o b'a dwè nko paʼ mɨsyem ɨ. Toŋla ga nteme ó, bɨn mu lé eka tiʼe ó, é l'efu mo Zyɛm, é zyɛŋa win boo Yesʉs-Krɨst tʉŋlʉ.

12É mpʉ yé ndɨ no e, daʼ mɛʼle ga ó, Syem, wé bâʼla mɛr bɨn, dil bɨn é dia olʉa. Wé l'ayi jwɨ̀ʼ bɨn é nko paʼ nyʉl ndɨ edwè e. Daʼ bir ga ó, Syem, wé ntaŋa bɨn é nkul, ó bɨn saʼ we mojoʼo, nkʉ du bɨgwɨma bye. 13Abɨlan ga e bɨfum bɨ nyʉl bin ó, byé dɨʼe sea Syem syɛɛ. Syem, wé amu jaa nʉa bye, ze sa bɨsyɛɛla bɨ ozyɛhozyɛh bye e tɨ. Bɨn bɨ dwihɔ é l'odwè, ntɔʼ dweŋɔ tiʼ molu mo mpoʼ mɨmɛh. Timla ga Zyɛm bɨn bʉr o tɨ, ndwe e bɨfum bɨ nyʉl bin, bɨsa nye óbɨlan e bye, ka to le esa mɨmpaŋ bɨsyɛɛla bye e tɨʼ ɨ! 14Ebe, Syem, wé ajala le eka jwɨ̀ʼ bɨn, ebe, bɨn bé aka be é monkara mo mɛra motie. Banana, bɨn mu ó baa Zyɛm a lɛʼle ncwɨncwɨa we e.

Mʉr nyiwɛh, nye ó elʉa mo mʉr lé ejwɨʼ nye e

15No, yé ó, bɨna bé aka be ga é monkara mo mɛra motie. Bɨna ga mu ó baa Zyɛm a lɛʼle ncwɨncwɨa we e. É mpʉ yé ndɨ no e, zê bɨna bé lé ejala le esa ga syem ɛ? Hɨʼɨ, yé abe ba no! 16Bɨn bé egʉa mbɨmbɨa ó, ǃbɨn si sea e mʉr, sa nye mojoʼo mpʉ molʉa nɛʼɛ, bɨn bɨ lihba molʉa é nko paʼ mo njwɨɨ bɨn lé esa mojoʼo e. ǃBɨn si sa syem nɛʼɛ, lɛɛ ó, bɨn bɨ daʼre efie é monyʉl mɨn. ǃBɨn si mɛʼle ó, bɨn sa ó Zyɛm mojoʼo nɛʼɛ, lɛɛ ó, bɨn bé ónʉŋɔ ó, mpʉ ocɨcyel o bʉr. 17Bɨna dweʼ ga Zyɛm ekiba! Bɨn bé a taare be ó mpʉ molʉa, lé esa mɨsyem. No ó, bɨn mu é bananaʼ ó, si sa mojoʼo e mɨleme min mimyɛh, lé edu mbi sikʉlʉ mu lé ebaʼle bɨn ɨ. 18Zyɛm a si sa ó, bɨn diʼe é dia otî é nko paʼ mɨsyem. Bɨn mu é bananaʼ ó, molʉa é l'efu le esa bɨsyɛɛla byaa ndɨ ocɨcyel ɨ.

19Me elwib ó, é mpʉ bʉr lé ebɛa sa-sa ɛ. Me esa no ó, ebe ecyɛʼ bɨn ndɨ e le é mɨsisim ɨ. Bɨn bé a be é jɔʼ mya ó, si kʉ lomo bɨfum bɨ nyʉl win, ó bɨn diʼe é dia olʉa. É cye yaa ó bɨn bé a be ó molʉa lé elama fwon lé edu njɨ bɨjyɛʼ bin ɨ. Bɨn bé a be nteme ó, ontɔɔ o motie mo Zyɛm. Efuʼla e tɨʼ, lé a jaa be ó njɨ entaa motie mo Zyɛm! Banana, loma ga bɨfum bɨ nyʉl win ó, byé sea Zyɛm syɛɛ ndɨ é l'ocɨcyel ɨ. Efuʼla e tɨʼ, lé ó, bɨn bé ódi mɨsaŋ mɨ bʉr é mih me.

20Ebe, é jɔʼ bɨn bé a taare be é dia olʉa é nko paʼ mɨsyem ɨ, bɨn bé a be ó é dia otî, abe lé esa sa gwar ndɨ cɨcyel ɨ. 21Wáa nyɔm bɨn bé a dira e mɨsyem bɨn bé a sa ɛ? Banana, bɨn mu ó lé ejoʼo fwon lé etoŋlo bɨsyɛɛla bɨ ebebe byaa. Byé ó ndɨ eto e bʉr nko efie. 22Banana, Zyɛm, nyi sa ó, bɨn diʼe é dia otî é nko paʼ Syem. Bɨn mu ó é dia osyɛl o mosa mo Zyɛm. Mpumo lé ecyèl é bɨtiʼ bin ɨ, nye ó ndɨ ebò e cyen ndɨ ti é mih mo Zyɛm ɨ. Ndumlo tɨ, wé ó tiʼ molu mo mpoʼ mɨmɛh. 23Myɛna mo mʉr lé esa syem ɨ, mé ó njɨ efie. To kœb ó, ndwɛa Zyɛm a dwe bʉr edwɛna ɛ, wé ó tiʼ molu mo mpoʼ mɨmɛh é zyɛŋa ga wina boo Tî ga wina Yesʉs-Krɨst.

Currently Selected:

Rom 6: ozmBad

Highlight

Copy

Compare