Yʉanes 19

1Pilat ntɔʼ lomo bɨzima bye, dwe bye nkul ó, byé nʉŋa Yesʉs, le efuura nye mɨmbihe. 2Bɨzima ze pene nye epʉʼlʉ e kol modwaʼ, ntɔʼ dilɔ nye la é lʉ, ze bœrɔ nye len kʉr akaa-e-kaa. 3Bé a be ó lé edihle kunokuno e nye, le elɛɔ ó: «Moswɨhlɨ, njwɨɨbʉr oYʉden!» Bé ntɔʼ jaa nye mompɛh.

4Pilat ze bâʼle pyal kʉl. Nye e ntuntuma bʉr ó: «Joʼla ga: me ze bɨn e mʉr nwaʼ kaʼ kʉl ó, bɨn gʉŋa ó, me abee sa ebebe nye pa kʉ sa ó, nye dweŋɔ mobe mo jala e l'efie e.» 5Yesʉs ze pyal kʉl e epʉʼlʉ e kol modwaʼ laa é lʉ ndwe e len kʉr akaa-e-kaa é nyʉl. Pilat, nye e be ó: «Nye be!»

6Jɨh tɨʼ ojwɨɨ be opara ndwe e bɨpulʉm byɔɔ, bé a bee nye, bé ze lwib lé eyɨm twii ó: «Cyèlɨ nye é klos kʉ. Cyèlɨ nye é klos kʉ.» Pilat, nye e be ó: «Nʉŋa ga be nye, bɨn bʉr o tɨ. Toʼ, to bomlo ga nye é klos, ebe, me abee sa ebebe nye pa kʉ sa ó, nye dweŋɔ mobe mo jala e l'efie e.» 7OYʉden, bé e nye ó: «Bɨh bé edu lʉʉ etie ndɨ elɛɛ ó, bɨh jʉʼo mbi mʉr we, ebe, nye a be ó si bana lɛɛ ó, nye ó Mwan mo Zyɛm.»

8É jɔʼ Pilat a joʼo mokan maa ɛ, nye ze joʼo bʉa, 9ze bâʼle ni é mpah a be é bii ye e, to dî e Yesʉs ó: «Go duho nko?» Yesʉs nyɛɛ l'abɨha. 10Pilat ze dî e nye ó: «Zê go akpɛl bɨha e me ɛ? Go agʉa ó, me ó e nkul mojwɨ̀ʼa ndɨ ó, me birɨ go, nkʉ nteme lɛɛ ó, bé cyèlɨ go é klos kʉ ɨ?»

11Yesʉs, nye e nye ó: «Nkʉ nkul mo Zyɛm a be ó be, apyal boo go nɛʼɛ, mpa go abe e nkul é me. Ebe no, mʉr lé ekɛha me, cen me é mobo mo e, nyɛɛ ó b'a bul sa syem, laa go.»

12Ebe no ó Pilat a taare lé esaa mozi mo ebir Yesʉs ɨ. OYʉden bɛɛ kʉ bɨr-bɨr mocel kʉ kʉ ó: «ǃGo bana kʉ bir nye nɛʼɛ, kʉ lɛɛ ó, go abe fo mo Kɛɛza! Mʉr nyiwɛh lé edwiŋ bɨr, lɛɛ ó, nye ó njwɨɨbʉr ɨ, nye etɨ mɨlɛa mo Kɛɛza.» 13É jɔʼ Pilat a joʼo no e, nye ze pyɛl Yesʉs kʉl, ze di é dia tiʼà mɨlɔb é gumo ndɨ ejebɔ ó, Ebɛhɛ e mokoʼ e. (É lwib arameyɛŋ, yé ó Gabata.)

14Yé a be ó, moho bé a jam-jam mode bé óde é moho saba ɛ, wé osi liʼ e moho ngwar, wé òsyɛɛlɨ. Yé a be ó, yé mu lé eto saa teme moho. Pilat ze lɛɛ e l'oYʉden ó: «Mbe ga: njwɨɨbʉr win ó wi!» 15Bé ze bâʼle taare lé ebʉ bɨtim. Bé ó: «Ó jʉʼo nye. Jʉʼo nye. Cyèlɨ nye é klos kʉ.» Pilat, nye e be ó: «Zê me bomla njwɨɨbʉr win é klos ɛ?» Ojwɨɨ be opara, bé ó: «Bɨh bé abe e guu njwɨɨbʉr fih pie Kɛɛza.» 16No ó Pilat a ka ze twe twii ó, bé toʼ, to cyèl nye é klos kʉ.

Zi mɨtuu mɨ efie é klos

(Mataos 27.32; Markus 15.21; Lʉkas 23.26)

Bɨzima ze nʉa Yesʉs, 17bé ntɔʼ mʉa nkana, nye mʉr tɨʼ lé enkɛɛ klos ye. Bé e boo nɔɔ ze toŋɔ gumo ndɨ ejebɔ ó, Gumo koko lʉ ɨ. (No é lwib arameyɛŋ, yé ó Golgota#19.17 É lwib latɛn, yé ó Calvaire..) 18É gʉʼ ó bɨzima, byé a to bomlo Yesʉs e mosen, bɨnɔ nye é klos kʉ ɨ. Byé a si cyèl nteme bʉʉ bʉr oba é bɨklos kʉ. Nwaʼ, é l'emyɛl le; nuu, é l'ejʉm; Yesʉs teme tɨ.

19Pilat ze nʉa ebɔm, tile tɨ, ze pɛn le é klos mo Yesʉs. Lé a be tila ó: «Yesʉs, mʉr Nazarɛt, njwɨɨbʉr oYʉden ó nwa.» 20Buobuo oYʉden, bé a be ó lé eláa tila waa, ebe, gumo bé a cyèl Yesʉs é klos kʉ ɨ, yé a be ó kunokuno e nkana, ndwe nteme, tila waa, wé a be ó é bɨlwib bɨlɛl: lwib arameyɛŋ, le lwib latɛn ndwe e lwib grɛk. 21No ó, ojwɨɨ be opara, bé a ze lɛɛ e Pilat ó: «Laa ó, go tila “njwɨɨbʉr oYʉden”, fuo tile yɛɛ ó: “Mʉr nwaʼ a lɛɛ-lɛɛ ó: Mɛm ó ndɨ njwɨɨbʉr oYʉden.”» 22Pilat, nye e be ó: «Hɨʼɨ, sa me ndɨ si tile e, mɨ tile!»

23Jɔʼ bɨzima, byé a sil cyèl Yesʉs é klos kʉ ɨ, byé ze nʉa mɨkan mye, ze kabɔ monkɔb monâ, zima yiyɛh e we nkɔb. Bé ze nʉa dur ye. Yé a baabe lɛra; yé a be ó kan ntinɨ, tia taare kʉ, pyal si. 24Bé ze lɛɛla ó: «Bɨna l'ayi nya ga dur yi. Bɨna doʼ ga ye ebya é l'efu le egʉa mʉr ónʉa ye e.»

Syɛɛla yɔɔ yaa, yé a syɛɛlɨ no ó, lé edira lɔɔ ndɨ tila é Kalara Zyɛm ó:

«Bé a si kabla mompor mam paʼra wɔɔ.

Bé ze do ebya é dur yam.»

Ntɔʼ ze saŋɔ nteme no.

25Kunokuno e klos mo Yesʉs, nyɔŋ we a be ó tɨ, bé e mɨɔ mo nyɔŋ we,#19.25 Bʉʉ bʉr, bé etoŋlo ó, mɨɔ mo Maaria, nyɔŋ mo Yesʉs, a be die ó Salʉma, a be mʉma mo Zebede, sɔŋ mo Yʉanes, mʉr a tile kalara nwaʼ ɛ. ndwe e Maaria, mʉma mo Kleopas, ka kɛl Maaria, sile Magdala. 26Yesʉs ze bee nyɔŋ lé ecyɛb kunokuno e nye, bé e mpʉn nye a bul kpɛl ɨ.#19.26 Yʉanes, nye efol die le é Mbɨambɨa Lɔɔ nye a tile e. Dwɛʼa nteme Yʉanes 13.23, 20.2, 21.7, 21.20. Nye e nyɔŋ we ó: «Mʉma, mbe mwan go?» 27Nye e mpʉn we ó: «Mbe nyʉŋ ɨ?» Taare é jɔʼ gwar yaa ó mpʉn waa a ze nʉa Maaria, niŋle nye ɨ modwii me e.

Efie mo Yesʉs

(Mataos 27.45; Markus 15.33; Lʉkas 23.44)

28Pie tɨ, mpʉ Yesʉs a gʉa ó, bɨsa bibyɛh, byé a be ó, byé mu ó lé elwɨŋlɨ ɨ, nye ntɔʼ lɛɛ ó: «Me ejoʼo dweh modibe#19.28 Dwɛʼa Sam 69.22..» (Yé a syɛɛlɨ no ó, lé edira lɔɔ ndɨ tila é Kalara Zyɛm ɨ.) 29Mpɨ a be ó tɨʼ e monwoʼ. Bɨzima ze nʉa éponge, dubɔ é monwoʼ, pɛnɔ le é lɨ ɨzɔb, ze cenɔ nye la kunokuno e nʉm, ó nye duʼo me. 30Jɔʼ Yesʉs a sil du monwoʼ maa e nʉm ɨ, nye ó: «Bɨsyɛɛla bibyɛh, bi lwɨŋlɨ!» Nye ze gœr lʉ si, ntɔʼ fil mɨswɨh mɨ epihe.

Mʉr bɨzima lé ekar Yesʉs ekʉa é bɨmpah

31Yé a be ó moho bé a jam-jam mode bé óde é moho saba ɛ, é bii kʉʼ, moho saba, wé osi taare. (Moho saba waa nteme lé elaa myʉʉ mɨmoho mɨ saba mimyɛh!) No ó, oYʉden, bé a baakpɛl ó, bʉr liʼɔ é bɨklos é moho saba. Bé ze to dî e Pilat ó, bé to ó, buʼo bʉr baa mokʉ, pɛʼ be é bɨklos. 32É bʉr oba bé a be mɨmbœmla é bɨklos kʉ, bé e Yesʉs ɨ, bɨzima ntɔʼ buʼɔ mʉr efoʼ modʉ̀, ntɔʼ buʼɔ modʉ̀ mo waa mba. 33Ngbaa le eka be, bé mu si pyal é Yesʉs nɛʼɛ, bé ntɔʼ kœb ó, nye osi bɛa dwè. Ebe no ó bé a baaka buʼo nye modʉ̀ ɨ. 34Dam be no, yʉʉ zima, yé a si kar nye ekʉa é bɨmpah. Mbah motié ndwe e modibe ntɔʼ sah. 35(Mʉr lé eboʼlo bɨsyɛɛla bɨnɨ ɨ, nye ó ndɨ mʉr a sil bye lé ekʉ bee e.#19.35 Yʉanes, nye efol die le é Mbɨambɨa Lɔɔ nye a tile e. Nye ó «mpʉn Yesʉs a bul kpɛl ɨ». Yʉanes 13.23, 19.26, 20.2, 21.7, 21.20. Sa nye lé eboʼlo e, yé ó bana kʉ be cyecye. Nye nteme, nye egʉa ó, nye elɛɛ ó ocyecye, ó bɨn buʼla.) 36Bɨsyɛɛla bɨnɨ, byé a syɛɛlɨ no ó, lé edira lɔɔ ndɨ tila é Kalara Zyɛm ó: «Bé ákwoʼ buʼo nye dam be dwehe gwar#19.36 Dwɛʼa Sam 34.21..» 37Yé ó tila é Kalara Zyɛm nteme ó: «Bé ógʉa bee mʉr bé a kar ekʉa ɛ#19.37 Dwɛʼa Zakari 12.10..»

Dɨla mo Yesʉs

(Mataos 27.57; Markus 15.42; Lʉkas 23.50)

38Pie tɨ, Yoseb, mʉr nkana Arimate, ze dî Pilat nkul ó, nye pɛʼɛ muu mo Yesʉs é klos lé eto dɨl we é foo. (Yoseb a be ó mpʉn mo Yesʉs, a dɨ jyɛʼ taa buʼo ye boo nye e. Sa gwar, buʼo ye, yé a be ó sa nye a fol e bʉʉ bʉr ɨ, ebe, nye a be ó lé ekpɛɛ oYʉden.) Mpʉ Yoseb a dî tia waa ɛ, Pilat ntɔʼ mɛʼle. Yoseb ze fiʼ, ntɔʼ to, to nkɛɛ muu mo Yesʉs, to e we. 39Nikodɛm, mʉr a bee Yesʉs é pum nɨ, ze nʉa mulo bé lé elœm mɨmuu ɨ. Yé a be ó mpaŋ labina ndɨ é mbɨa monumo e: myrrhe ndwe e l'aloɛs#19.39 Yé a be ó labina bʉr bé a lœm-lœm mɨmuu ɨ., okilo mowʉm molɛl e l'okilo oba, byé a be ó tɨʼ tʉŋlʉ. 40Bé e Yoseb ze nkɛɛ muu mo Yesʉs, lœmɔ we mir waa, le edîblɔ we ɨ mɨmyɔʼ mɨ dɨla ndwe e labina.#19.40 Mɨmyɔʼ myaa, myé a be ó mɨsɛa e ndomo kan é pumo-pumo. Bé a sa no ó, lé edu mɨnjwɨr mɨ oYʉden, é mbi bé lé esa dɨla ɛ. 41Gumo bé a cyèl Yesʉs é klos kʉ ɨ, peme, yé a be ó tɨ. É peme yaa, yé a be ó e l'edwan e foo, mʉr l'apa debe tɨ. 42Mpʉ yé a be, yé mu dobo oYʉden, bé a dɨ kʉmsa ebʉʼ ɨ, bé ze to dɨl muu mo Yesʉs é foo waa, ebe, nye a be ó kunokuno.

Currently Selected:

Yʉanes 19: ozmBad

Highlight

Copy

Compare