Mɨlʉmlʉ 5

Ananias bé e myɛl Safira

1Nuu mʉr, die le Ananias, a be ó e mʉma, die le Safira. Bé e nɔɔ, bé a si bɛa di twii ó, bé nteme, bé óbɛma mobi mɔɔ. 2No ó Ananias a ka ze nara e guu paʼ mɔn Mbɛr-Zyɛm, nɛŋ we é l'efu lɔɔ bé bʉr o tɨ, ze nʉa paʼ mɔn wé a ka buʼo e, liʼe we paʼra mokʉ mɨlʉmlʉ. Myɛl a be ó lé ekʉ gʉa syɛɛla yaa. 3No ó Pyɛr a ze lɛɛ e nye ó: «Ananias, ebe yé Satan bana cyɛb go é leme, ze sa ó, go lɛŋɨ Mbɨambɨa Sisim mpʉl mpʉnʉ nɨ ɨ? Ebe, gɨ nara e guu paʼ mɔn Mbɛr-Zyɛm go a nʉa é l'ebom e peme yo e, komo é l'empàh! 4Go l'apa bɛma peme yo, yé a dɨ gumo ó e go mʉr tɨ. Nteme, é jɔʼ go a bɛma ye e, mɔn yaa, yé a be ó mɔn yo, yé abe no? A yé pa kʉ tine go ó, go saʼ mpʉnʉ? Yé be yé? Go baakʉa mʉr. Go kʉa ó Zyɛm!»

5Jɨh tɨʼ Ananias a kʉ joʼo mokan maa, nye ntɔʼ kʉ nɔʼa nɔʼa, dwè. Bʉr bɨbɛh bé a joʼo lɔɔ waa ɛ, ze laŋle joʼɔ bʉa. 6Mɨsoho myé a be tɨʼ ɨ, myé ze diblɔ muu e ndomo, ntɔʼ toŋɔ e we, to dɨlɔ.

7Mowala, mé osi laa kwoʼ be molɛl nɛʼɛ, myaa mo Ananias ntɔʼ pyal, apa gʉa sa yé a laa ɛ. 8No ó Pyɛr a dî e nye ó: «Lɛŋɨ me. Bim tɔɔ nwaʼ ô bɨn e njʉmo bɛma peme e?» Nye ze mɛʼle ó: «Eee, bim yaa ó nɨ.» 9No ó, Pyɛr a lɛɛ e nye ó: «Ebe yé bɨn bé a bòno pɨʼ ó, bɨn boblo ó, Sisim mo Da ɛ? Mɨsoho to dɨl muu njʉmo e, myé mu ó é l'ebe. Myé ónkɛɛ nteme go jwɨʼ gwar yaa.»

10Jɨh tɨʼ Pyɛr a kʉ sil lwib, Safira ntɔʼ ze nɔʼa é mokʉ me, dwè. Mɨsoho mɨnɨ ze ni, kœbɔ nye mu muu. Bé ntɔʼ ka nkɛɛ nteme muu we, to dɨlɔ we kunokuno e foo mo njʉm. 11No ó Mbɛr-Zyɛm wiwɛh, ndwe e bʉr o b'a joʼo mɨlɔb myaa ɛ, bé a bul joʼo bʉa ɛ.

Buobuo mosima

12Mɨlʉmlʉ, myé a si bul sa bɨdweʼle bɨ nkul wɔɔ ndwe e bɨsa bɨ jehe é mih mo bʉr é buobuo. Obuʼla bɨbɛh, bé a gwɨhla-gwɨhla ó, gumo gwar é sikuo yé a dweŋɔ die e Salomɔŋ, yaa ndɨ mbɨembɨe e Mpah Zyɛm ɨ. 13Dam be mpʉ bʉʉ bʉr, bé a dwaabe be e, yé a baabe e mʉr a dihbe ó, nye baʼra e be. 14Bʉr o b'a jyɛʼ taa buʼo yɔɔ boo Da Yesʉs, baa b'a ni é mbɛr Zyɛm ɨ, bé a be ó é buo, bʉba e bʉrʉm. 15No ó bé a ze taare lé ezeŋɔ e mɨsyoblʉ myɔɔ, jyɛʼɔ-jyɛʼɔ mye é nkpah mɨmpaʼa Pyɛr a duula-duula ɛ. Bé a jyɛʼ-jyɛʼ mye no ó, é mɨtɔɔ ndwe e bɨkala, lé ebono Pyɛr. Bé a dɨ bɛla ó, ǃnye si fuuba laa tɨʼ nɛʼɛ: sisîm ye, yé óbɛm kuna e nuu mʉr é sama mɨsyoblʉ myaa, nyiha ntɔʼ tiʼe. 16Ntuntuma bʉr, yé a si tɨbla é bɨnkana bɨ nkɔra Yerʉsalɛm, lé eze e mɨsyoblʉ ndwe e bʉr o b'a sia e bɨbɨbla mɨsisim ɨ. Bɨbɛh ntɔʼ tiʼe.

17No ó njwɨɨ opara bé e bʉr o nduo ye, oSadwisyɛŋ, bé a ze mʉa, lwɨŋla e l'egu, 18ze naʼɔ mɨlʉmlʉ mobo é nyʉl, gbaŋɔ mye é mbʉʼ. 19No ó, é pum waa, engles mo Da ze dib mobe mo mbɛr mɨmbʉʼ, ntɔʼ pyɛl mɨlʉmlʉ kʉl. Nye ó: 20«Toʼ, to cyɛb ga é jahla bii mo Zyɛm. Bɨn bé à dwe bʉr sikʉlʉ yiyɛh lé etiibe e l'edwan e tiʼ yiʼ ɨ.»

21É dwine mɛn kuno, mɨlʉmlʉ ntɔʼ to cyɛb é jahla bii mo Zyɛm, ze taare lé eyeʼle bʉr. Bɛɛ njɨ lé esa no, njwɨɨ opara bé e bʉr o nduo ye, bé a be ó lé esyɛŋ bʉr o Bʉm Nɨnɨ bɨbɛh. Yé ó gwɨhla nɨnɨ osabene o bwa b'Ɨzraɛl. Bé ze lomo bʉr ó, bé toʼ, to nʉa mɨlʉmlʉ é mbɛr mɨmbʉʼ. 22Sa gwar, jɔʼ bɨpulʉm, byé a pyal é mbɛr mɨmbʉʼ tʉŋlʉ ɨ, byé a baakœb be tɨ! Ze fiʼɔ, to lɛɔ bʉr o gwɨhla ó: 23«Bɨh kœb mbɛr mɨmbʉʼ ó, mobe mɨpɨra, obɔʼlʉ o mbɛr mɨmbʉʼ ocɨcyel é mobe. É jɔʼ bɨh dib mobe, dwɛʼ é tiʼe tʉŋlʉ ɨ, bɨh bé abee mʉr ngwar tɨ!»

24Njoʼa njwɨɨ bɨpulʉm bɨ Mpah Zyɛm bé e l'ojwɨɨ be opara, bé a joʼo mɨlɔb myaa ɛ, bé a be ó, mɨleme é mo é zaaama, aka gʉa mpʉ ndumlo lɔb waa, wé óbe e. 25É jɔʼ yaa ó nuu mʉr a ze ka pyal. Nye ó: «Mbe ga! Bʉrʉm bɨn bé a gba é mbʉʼ ɨ, bé mu ó é jahla bii mo Zyɛm lé edwe lal sikʉlʉ yɔɔ!»

26Njwɨɨ bɨpulʉm bɨ Mpah Zyɛm bé e bɨpulʉm bye, bé ntɔʼ to, to bula e mɨlʉmlʉ. Sa gwar, bé a baatine be nkul e nkul, ebe, bé a kpɛɛ ó, bʉr, bé amu jaa lumo be mokoʼ.

27É jɔʼ bé a bula e mɨlʉmlʉ ɨ, bé ze cyel be é mih mo Bʉm Nɨnɨ ó, njwɨɨ opara ntɔʼ ze ntɛŋ mye motia 28ntɔʼ ka lɛɛ e mye ó: «Bɨh bé a si cyel bɨn mpene ó, bɨn l'anyamle dwe mʉr sikʉlʉ é die e mʉr nɨ. To kœb ó, bɨn bɨ bâʼle to dolo njɨ lé esa no. Sikʉlʉ yin, yi ka jala nkana Yerʉsalɛm yiyɛh! Bɨn nteme mu ka sa mɨmbi mimyɛh ó, bɨn dwe ó bɨh mobe, mpʉ sa lɛɛ ó, bɨh ó b'a jʉ mʉr nɨ!»

29No ó, Pyɛr bé e mɨlʉmlʉ, bé a ze bɨha e be ó: «Yé ekʉ jala ó, bɨh joʼa Zyɛm, laa ó bɨh joʼa bʉr. 30Zyɛm bɨmpam ga bina a si pɛ̀h Yesʉs é foo, waa bɨn bé a jʉ lé ecyèlɔ nye é klos kʉ ɨ. 31To kœb ó, Zyɛm nyɛɛ, nyi bɨr nye kʉ, dil nye é mbo ejʉm we, cyel nye é dia Cyɛb efoʼ ndwe e Tiʼbʉr é l'efu e bʉr bɨbɛh. Nye a sa no ó, nye nkʉʼ dib bwa b'Ɨzraɛl zi egwɨma mobebe mɔɔ, le edwir mɨleme, ó nye nkʉʼ pɛʼ bɨbaa nye lé eniʼe-niʼe é lɔb mɨsyem myɔɔ ɛ. 32Bɨh e boo Mbɨambɨa Sisim nteme ó ndɨ oboʼla o tɨ. Sisim waa ó Zyɛm lé entɨh bʉr o ndɨ esa Yesʉs mojoʼo e.»

33Bʉr o b'a ze é gwɨhla ɛ, bé ntɔʼ kpaa empime é jɔʼ bé a joʼo mɨlɔb myaa ɛ. Bé ze saa ó, bé jʉ ó mɨlʉmlʉ myaa, jʉ jʉʼo. 34Nuu Farizyɛŋ a be ó tɨ, die le Gamalyɛl. É sama oyeʼle o motie bɨbɛh, nye ó b'a be waa bʉr, bé a be lé edwaabe e. Nye ze cyɛb teme bʉr o Bʉm Nɨnɨ. Nye ó, bé paʼ pyɛl mɨlʉmlʉ kʉl é ma jɔʼ. 35Nye e bʉr o gwɨhla ó: «Mbɛngɛɛ! Bɨn bwa b'Ɨzraɛl ɔɔ! Gʉa di ga ncye é nko paʼ syɛɛla bɨn muno kpɛl sa bʉr baʼ yi ɛɛ! 36Yé l'apa gum bɛa: Tœdas a si tɨʼ bɨr le esa jaale, lé elɛɛ ó, nye a be ó bwaʼbwaʼ sɔʼɔ, bʉrʉm kwoʼ be mɨnter mɨnâ, lé edu nye. Nye ze jʉŋɔ é lɔb pyeh ye. Bʉr bɨbɛh bé a du nye e, bé ntɔʼ gbɛha, lɔb we ntɔʼ dwè ntuʼ. 37Pie tɨ, é jɔʼ láŋ-bʉr, Yʉdas, mʉr Galɨle, a si tɨʼ bɨr, nyɛɛ nteme e buobuo bʉr é koo we pihe. Nye nteme a si bura e pyeh ye. Bʉr bɨbɛh bé a du-du nye e, bé ntɔʼ gbɛha. 38No ó, é lɔb lé elɛb é bananaʼ ɛ, me etɨe bɨn ó, bɨn l'ayi ka bâʼle sa bʉr onɨ sɔʼɔ. Birɨ ga be, bé toʼ. ǃƗ bɨjwɨʼ byɔɔ ndwe e syɛɛla yɔɔ, byé be byaa lé eduho é pɨʼ bʉr nɛʼɛ, kʉ gʉa ó, byé aŋa to ká ká. 39Sa gwar, yé si ka pyal ó, byé eduho boo Zyɛm nɛʼɛ, bɨn l'abe e nkul elwimla e bye mbɨmbɨa. Diʼe ga ncye! Bɨn bé amu jaa to twɨra é l'epihe ó, mpa bɨn bé a be-be ó, lé elwimla e Zyɛm, bɨn l'agʉa!»

Bʉr o gwɨhla ze twe twii e nye, 40jebɔ ntɔʼ mɨlʉmlʉ, bîŋɔ mye, é bîŋɔ bîŋɔ, ntɔʼ cyelɔ be mpene ó, bé l'anyamle lwib é die mo Yesʉs, ntɔʼ birɔ be. 41No ó mpʉ mɨlʉmlʉ myé a duho é Bʉm Nɨnɨ ɨ, myé ntɔʼ loŋlo e bɨsʉhʉ, ebe, Zyɛm a láa ó, bé ó bʉr o jʉʼa le edihbe pyeh ebe die mo Yesʉs ɨ. 42Moho wiwɛh, bé a be ó é jahla bii mo Zyɛm tʉŋlʉ le é mɨmbɛr mɨ bʉr, lé eto dolo lé eyeʼle bʉr ndwe le etuno Mbɨambɨa Lɔɔ. Lɔɔ wɔɔ, wé a be ó, Lœma mulo mo Zyɛm ó ndɨ Yesʉs.

Currently Selected:

Mɨlʉmlʉ 5: ozmBad

Highlight

Copy

Compare