Mɨlʉmlʉ 24

OYʉden lé epur Pol

1Molu motɛn, mé osi laa nɛʼɛ, njwɨɨ opara, die le Ananias, ntɔʼ pyal é Sezare, bé e bʉʉ otamabʉr, ndwe e mʉr nkɔm, die le Tɛrtulos. No ó bé a ze cyɛb é mih mo ngoman Felik, lé eto cen ngoman pura bé a pur Pol ɨ. 2É jɔʼ bé a baŋle Tɛrtulos ɨ, nye ze taare lé epur nye é mih me. Nye ó:

«Tamamʉr Felik, go ó lé esa ó, bɨh tiʼa é motala é lal ga wina. Go nteme ó lé esaa mopɨʼ mɨmbi mimyɛh ó, motie, mé kwɨmlɨ mpʉ yé ójala e kul yih ɨ. 3Bɨh bé esoho jwɨɨ yo é jɔʼ yiyɛh, ndwe e ɨ gumo yiyɛh, le ekʉ dwe go ekiba tɨ. 4Sa gwar, me akpɛl dimle go jɔʼ. Ebe no, me ejwɨʼla e go ó nɛɛ: go lɛʼla me talatala njwɨr go, le ejoʼlo bɨh ba ma peh jɔʼ titia ɛ.

5«Bɨh bé a si bee mʉr nwaʼ lé edulo oleŋeleŋe é l'oYʉden bɨbɛh ndɨ é si nwaʼ ɛ. Nye ó sa bɨbla mʉr! Nye nteme, nye ó ndɨ lʉ nkɔm bʉr o Nazarɛt! 6Nye a be nteme ó, si ngbaa lœʼ jahla bii mo Zyɛm wih ndɨ é buo ekɛn ɨ! Ebe no ó bɨh bé a naʼ nye mobo é nyʉl, zeŋɔ e nye e. [Bɨh bé a be lé egwɨm ó, bɨh tiʼa nye lɔb, lé edwe nye mobe lé edu motie mɨh. 7Sa gwar, Lisyas, njwɨɨ bɨzima nɨnɨ, a si fuuba pyal tɨʼ é gumo yaa, ze pɛʼ bɨh nya é mobo e buobuo nkul, ze pyal e nye wâ, 8lé elɛɛ e bʉr o b'a pur nye ó, bé nteme ntaʼ nko go ndɨ ɨ.] ǃGo si dî nye motia nɛʼɛ, go mʉr tɨ, go óka gʉa ó, bɨpura bibyɛh bɨh lé epur nye e, byé ó kʉ be tɨʼ cyecye.»

9OYʉden bé a be tɨʼ ɨ, ntɔʼ diŋɔ twii e bʉr o bé a nwahle nye e, le elɛɔ ó, bɨsa byaa bibyɛh, byé a kʉ be ó tɨ.

Pol lé ekar lɔb we é mih mo Felik

10É jɔʼ ngoman a dwe Pol lwib ɨ, Pol ze lɛɛ ó: «Me egʉa ó, go ó ndɨ tiʼà mɨlɔb wâʼ é kul yiʼ mɨmbu é buobuo. No ó me e bɨsʉhʉ é jɔʼ me lé ekomo nkar si é mih mo e. 11É mpʉ go ndɨ e nkul etimle, ntɔʼ kʉ gʉa ɛ, ngbàa me a pyal ɨ Yerʉsalɛm, ó me ntaʼ, ze dwiibɨ Zyɛm, yé mu ó, apa pyal molu ewʉm e moba. 12Bé a baakœb bɨh e bʉʉ bʉr é jahla bii mo Zyɛm lé etimle mɨlɔb mɨ buʼo. Bé a baakœb me lé esoʼlo ntuntuma bʉr, nkʉ é mompah mɨnjwɨʼla mɔɔ, nkʉ ntɔʼ é guu paʼ nkana tʉŋlʉ. 13Ebe no ó bé ndɨ abe e dweʼle gwar ndɨ elɛʼle ó, mɨ byaʼ, ó me e lɔb bé lé epur me tɨʼ é bananaʼ ɛ. 14No ó, me ekʉ mɛʼle yɛɛ ó, me edwiibɨ Zyɛm bɨmpam bih lé edu Zi Tiʼ. Zi waa, nye ó buʼo bɛɛ lé elɛɛ ó, yé é bebe e. Mɛm, me ebuʼla sa yiyɛh ndɨ tila é motie mo Moyiz ndwe e sikʉlʉ ogwiha o mɨlɔb bé a dwe e. 15Bɨh bʉr o tɨ, mɨleme mih boo nɔɔ, myé ó lwɨŋla e mbɛla é nko paʼ Zyɛm. Bɨh bé ebuʼla ó, nye ópɛ̀h bʉr, taare é l'ocɨcyel o bʉr, to pyal é l'ozyɛhozyɛh o bʉr. 16Ebe no, me egba nyʉl lé ekœʼ ebò e cyen ndɨ cɨcyel é mih mo Zyɛm le maa mo bʉr ɨ. Mɨpɛhla mɨ leme wam, wé ó é pyɛɛɛ.

17«É jɔʼ me a bɔʼa lé eto Yerʉsalɛm mɨmbu mɨmba e mpuʼ ɨ, me a ka bâʼle to é jɔʼ yaa ó e bɨmɔn lé eto gul kul yam e tɨ, le eto dwe Zyɛm mɨndwɛa myam. 18Tɨʼ ó bʉʉ oYʉden bé a duho lal Azia ɛ, bé a kœb me é jahla bii mo Zyɛm tʉŋlʉ lé edwe Zyɛm kum ɨ. Yé a be ó, me osi puba. Me a baasyɛŋ ntuntuma bʉr tɨ. Bɨntʉ nteme, abe. 19Sa gwar, oYʉden bé a duho lal Azia ɛ... Nkʉ yé a be ó be, jala nɛʼɛ, mpa bɛɛ ó lé ecyɛb é mih mo wâ, lé epur me, ǃbé óbe e yʉʉ sɔʼɔ etɛɛ me wa. 20Nkʉ ntɔʼ ó, bʉr baʼ bé bʉr o tɨ, bé paʼ lɛɛ mobe mo jala e l'efie bé a bee me lé esa ɛ, é jɔʼ me a be é mih mo bʉr o Bʉm Nɨnɨ yih ɨ. 21Sa bé ndɨ bɛm lɛɛ go e, yé óbe ó mpʉ me a lwib lé eyɨm twii é mih mɔɔ ó: “Me ebuʼla ó, odwè, bé ópàh! Ebe no ó me lé ecyɛb wâʼ é mih mɨn é nkar ɨ!”»

22Tina, yé ó, Felik a be ó si bul gʉa sikʉlʉ é lɔb Zi Tiʼ. No ó, njoʼa nye a joʼo Pol ɨ, nye ze cyel lɔb. Nye ó: «É jɔʼ Lisyas, njwɨɨ bɨzima nɨnɨ óze e, é jɔʼ yaa ó me ógʉa epahle lɔb win nɨ ɨ.» 23No ó nye a liʼe nʉm e njwɨɨ nter bɨzima a baʼle Pol ó, nye paʼ pɨr nye é mbɛr mɨmbʉʼ tʉŋlʉ. Sa gwar, nye à bir-bir nye ɨ byʉʉ bɨjɔʼ. Nye a mɛʼle nteme ó, ofo be, bé ntaʼ, ze dɨ tʉŋ nye.

Pol é mih mo Felik bé e Drosila

24Bwa molu, bé osi laa nɛʼɛ, Felik bé e myɛl Drosila, bé ze pyal é fum Pol a be mɛra ɛ. (Drosila a be ó sile Yʉden.) No ó nye a lomo bʉr ó, bé toʼ, to jebe Pol, lé eze joʼlo sa nye a lɛɛ-lɛɛ, tiibe e buʼo é Yesʉs-Krɨst ɨ. 25Pol ze taare lé eyeʼle nye mɨlɔb mo Zyɛm, taare é mpʉ mʉr lé ejala le ekœʼ ebò e cyen é l'ocɨcyel ɨ, le mpʉ mʉr lé ejala le emɛr leme é lɔb ebebe e, to pyal é mbi Zyɛm ótiʼe bʉr bɨbɛh mɨlɔb ɨ. Felik ntɔʼ joʼo bʉa. Nye e nye ó: «Go ejala le efiʼ é banana! É jɔʼ me óbe e l'epʉla ɛ, me óbaŋle go.» 26Nye a be e mbɛla é leme ó, Pol ókolo nye e mɔn. Ebe no ó nye a jebe-jebe nye é jɔʼ yiyɛh ó, bé e nɔɔ, bé lɛɛla mɨlɔɔ ɛ.

27Pie e mɨmbu mɨmba, Pɔrkios Fɛstwis ze nʉa dia mo Felik. Mpʉ ngoman Felik a be lé ekpɛl ó, oYʉden, bé beŋɨ nye mbɨmbɨa ɛ, no ó nye a liʼe Pol é mbɛr mɨmbʉʼ ɨ.

Currently Selected:

Mɨlʉmlʉ 24: ozmBad

Highlight

Copy

Compare