Mɨlʉmlʉ 17

Pol bé e Silas ɨ nkana Tesalonika

1É jɔʼ bé a laa ɨ Anfipolis ndwe e Apolonia ɛ, bé ntɔʼ pyal ɨ Tesalonika, gumo mpah mɨnjwɨʼla oYʉden a be e. 2Pol ntɔʼ syɛŋa zi e bʉr o mpah mɨnjwɨʼla waa, mpʉ njwɨr we, wé a bɛa be e. É mɨmoho mɨ saba mɨlɛl, bé e boo nɔɔ, bé a be ó lé etimle mɨlɔb mo Zyɛm, lé edu mpʉ myé ndɨ mɨtila é Kalara Zyɛm ɨ. 3Pol a sa-sa ó, pɛʼle sa ogwiha o mɨlɔb bé a lɛɛ é lʉ mo Lœma mulo mo Zyɛm ɨ, é l'efu ó, bé gʉŋa ebe yé nye a jala le edihbe mokpaa, dwè, ze pàh é foo e. Nye a si lɛɛ nteme be ó: «Yesʉs me lé elwib e bɨn, tiibe e nye e, nye ó mʉr Zyɛm a lœm mulo e!»

4No ó, bʉʉ bʉr é sama yɔɔ, bé a si twe twii e Pol bé e Silas, ntɔʼ ze syɛŋa sama gwar e be. É bʉr baa, yé a be ó buobuo bʉr o Grɛs bé a be si bɛa ni é buʼo oYʉden ɨ, le buobuo osabene o bʉba. 5OYʉden ze saŋɔ Pol egu, ntɔʼ pɛhɔ baadiajwɨh o bʉrʉm, lomo be ó, bé saʼ bɨntʉ nkana e nkana yɛh. Bé ze to mbɛr mo Yasɔn lé esaa Pol bé e Silas, ó bé pyɛlɨ be, timle ntuntuma bʉr ba. 6Mpʉ bé a baakœb be tɨʼ ɨ, bé ze to le edulo Yasɔn ndwe e bʉʉ oKristen si e si, to pyal e be é mih mo ojwɨɨ o nkana, ntɔʼ lɛɔ ó: «Bʉr ba, bé a si sa bɨntʉ é mɨlal mɨ si nwaʼ mimyɛh. Bé mu nteme ó, si ze pyal e syɛɛla yaa wâ! 7Yasɔn, nyi niŋle be ɨ modwii me! Bʉr baʼ bɨbɛh, bé entaa motie mo Kɛɛza, ebe, bé elɛɛ ó, yé e guu njwɨɨbʉr fih, die le Yesʉs.»

8Mokan maa ze kwɨɨ mompime mo bʉr o lal bé e l'ojwɨɨ o nkana yaa. Ntɔʼ saŋɔ bɨntʉ. 9Bé ntɔʼ tiʼe lɔb ó, Yasɔn bé e jyɛɛ ye, bé ejala le eliʼe bɨmɔn byɔɔ é bɛn, bé òfiʼ, to é mɨmbɛr myɔɔ. Mpʉ bé a liʼe bɛn yaa ɛ, ojwɨɨ o nkana ntɔʼ ka bir be#17.9 Yé a be ó, bé si ka bâʼle sa bɨntʉ wa, bɨmɔn byaa, byé òjɛna mobyaʼ mɔɔ..

Pol bé e Silas ɨ nkana Bere

10Jɨh tɨʼ pum, wé a dwine, obɨɔ bɨna ze cenɔ Pol bé e Silas ɨ Bere. É jɔʼ bé a pyal gʉʼ ɨ, bé ze to é mpah mɨnjwɨʼla oYʉden. 11Bʉr o Bere bé a kœb ɨ, bé a be ó é mbɨa mɨleme, laa oYʉden bé a be Tesalonika ɛ, ebe, mɨleme, myé a be ó be é ntɨɨɨŋ ó, bé jwɨʼɨ sikʉlʉ lé etiibe e Zyɛm ɨ. Dobo lɨlɛh, bé a be ó lé epahle Kalara Zyɛm lé ebee nkʉ sa Pol a lɛɛ-lɛɛ be e, yé a be ó cyecye. 12No ó buobuo oYʉden, bé a ze buʼla sikʉlʉ yaa, dam be nteme buobuo osabene o bʉr o Grɛs, le baa o bʉba le baa o bʉrʉm. 13É jɔʼ oYʉden o Tesalonika, bé a joʼo lɔɔ ó, Pol a be ó lé elɛɛ lɔɔ Zyɛm nteme ɨ Bere e, bé ze to nteme gʉ, ntɔʼ to taarɔ oleŋeleŋe, le esa sʉʼlʉ. 14Obɨɔ bɨna ntɔʼ kpahbe cen Pol nko mpaʼa lé eto nko paʼ maŋ ɨ. Silas bé e Timote bɛɛ ze liʼ tɨʼ ɨ Bere. 15No ó, bʉr o b'a to liʼle Pol ɨ, bé a to e nye, to pyal Atɛn. Pol ze lomlo be mpaŋla ó, bé cenɨ nye Silas bé e Timote ó, bé toʼ, to kœb nye gʉʼ kam e kam. Jɔʼ bé a sil joʼo mpaŋla waa ɛ, bé ze bula, to Bere.

Pol ɨ nkana Atɛn

16Cye yiyɛh Pol a be lé ebono Silas bé e Timote é Atɛn ɨ, leme we, wé a be ó lwɨŋla e l'empime é mbi nye a bee nkana yaa lwɨŋla e bɨbaŋabaŋa bɨdweʼle ndɨ mɨkpɛʼa ɛ. 17Nye a be é jɔʼ yiyɛh ó, é mpah mɨnjwɨʼla, bé e l'oYʉden, ndwe e bʉr o bɨkul bɨfih bé a bɛa ni é buʼo oYʉden ɨ. Bé e boo nɔɔ, bé a be ó lé etimle mɨlɔb mo Zyɛm. É dobo lɨlɛh, é jɔʼ nye a bɔma e bʉr é l'ebɨm e nkana ɛ, nye a dɨ dwe-dwe be nteme mɨyeʼla myaa. 18Oyeʼle o Epikʉrʉs ndwe e baa o Stoyɨke, bé a be ó lé edo e Pol. Baʼ, lé edîila é lʉ we ó: «Agologolo nwa, nye epa kʉ gwɨm lɛɛ yé?» Bʉʉ, bé a lɛɛ-lɛɛ ó: «Yé ó mpʉ sa cɨŋɔ ó, nye elɛʼle bɨna ga ozyɛm o guu lal fih.» Bé a lɛɛ no ó, ebe, nye a be ó lé elɛɛ Mbɨambɨa Lɔɔ lé etiibe e Yesʉs, ndwe e pɛ̀ha foo we e.

19Bé a si liʼle nye é mih mo bʉr o bʉm yé a gwɨhla-gwɨhla é l'ecwɨʼ e Ayeropagos ɨ. No ó bé a dî e nye ó: «Zê bɨh bé e nkul egʉa mbi edwan e sikʉlʉ go lé edwe e? 20Ebe, go esa ó, bɨh joʼa bɨsa ndɨ bɨh modwan ɨ. No ó bɨh bɨ tiʼe é mɨleme mih ó, bɨh paʼ kʉ gʉa sa sikʉlʉ yo nɨ lé ejɨ lɛɛ ɛ.» 21(Ebe, bʉr o Atɛn bɨbɛh ndwe e mɨndìndìl myé a di-di tɨʼ ɨ, bé a kʉ lɛŋ-lɛŋ jɔʼ yɔɔ ó, njɨ lé elɛɛla bɨsa modwan.)

22No ó, Pol a cyɛb é mih mo bʉr o bʉm yé a dɨ gwɨhla é l'ecwɨʼ e Ayeropagos ɨ. Nye e be ó: «Bɨn bʉr o Atɛn ee! Mɨ bee ó, bɨn bé ó bʉr lé ebul laŋle buʼla é mɨpaʼ mimyɛh ɛ. 23Ebe, é jɔʼ me a to le elaa é nkana yin, le edwɛʼ bɨntwaŋ mɨmbɛr bɨn lé edwiibɨ ozyɛm bɨn tɨʼ ɨ, me a si bee yʉʉ taa mɨndwɛa tɨ. Yé e mɨtila tɨʼ ó: “É l'efu le edwiibɨ nuu zyɛm fih, waa bɨh l'apa gʉa ɛ.”

«Joʼa ga ɔɔ! Sa bɨn lé edwiibɨ é l'agʉa ɛ, yé ó me ze lɛɛ bɨn yiʼ ɔɔ! 24Zyɛm, waa a cye si nwaʼ nyiwɛh ndwe e sa yiyɛh ndɨ tɨʼ tʉŋlʉ ɨ, nye ó ndɨ Njwɨɨ kʉ e si. Nye abe lé edi é mɨmbɛr mɨndwɛa lé efumɔ e mobo mo bʉr ɨ. 25Nye nteme, nye abe é l'ejyeb. Nye abe lé ebono nteme ó, bʉr ntaʼ, ze gul nye e mobo mɔɔ, ebe, nyɛɛ ó lé edwe bʉr bɨbɛh tiʼ e swɨh, ndwe e bɨsa bibyɛh. 26Taare é mʉr ngwar#17.26 Mʉr lɔb we ndɨ etilɔ ɛ, a be ó Adam bé e l'Efa., nye a sa ó, bʉr bòna bɨkul bibyɛh ndɨ é si nwaʼ nyiwɛh, nye osi bɛa cyel bɨjɔʼ bé ódi tɨʼ ɨ, le egba mɨnjɨ é si nwa, lé elɛʼle bɨgumo bé ódi ɨ. 27Nye a sa no ó, bé saŋa nye. ǃBé si saa nye, é saa saa nɛʼɛ, bé óbɛm bee nye. É l'ocyecye, Zyɛm, nye acɛra e mʉr ngwar é bɨna ga. 28Ebe, yé ó tila ó:

“Bɨna bé etiʼe ga ó, é zyɛŋa wina boo nye.

Bɨna bé ekubla ga ó, dumo e nye.

Bɨna bé ebi ga tiʼ ó, é mobo me.”

Lɛa wɔɔ nɨ, wé ó mbɨmbɨa. Yé nteme, yé ó sa bʉʉ otila be okalara bɨn bé a boʼlo e. Bé a tile ó:

“Bɨna ga nteme, bé ó bwan be.”

29«Mpʉ bɨna ndɨ ga bwan be e, bɨna bé ajala le eka jwɨʼ ga ó, Zyɛm nye mʉr tɨ, nye enwɨɨla e dweʼle gol, nkʉ mɔn, nkʉ mokoʼ mɨcɨcyoo mɨ bʉr ndwe e mɨpɨpɨʼ lé ekpaʼ ɛ.

30«É jɔʼ mya, bɨmpam bin, byé a be-be ó, lé ejeʼe Zyɛm. Nye a baabul gba ebɨh laa é nkɔb. No ó, banana, nyi ka lɛɛ e bʉr bɨbɛh é bɨgumo bibyɛh ó, bé gwɨma mobebe mɔɔ le edwir mɨleme. 31No ó nye a cyel dobo nye ótiʼe bʉr o si nwaʼ bɨbɛh mɨlɔb myɔɔ é l'ocɨcyel ɨ. Nyi bɛa pɛh nteme mʉr ótiʼe mɨlɔb myɔɔ é dobo laa ɛ. Nyi pɛ̀h mʉr waa é foo. Pɛ̀ha foo waa, wé ó dweʼle, sa lé elɛʼle bʉr bɨbɛh ó, mʉr a pɛ̀hɔ é foo e, nye ó ngo tiʼe mɨlɔb myɔɔ.»

32É jɔʼ bé a joʼo Pol lé elɛɛ mpʉ ndwè a pàh é foo e, baʼ bʉr, bé ntɔʼ pyehɔ nye. Bʉʉ bʉr bɛɛ, bé a lɛɛ ó: «Bɨh bé óka joʼlo lwib yo nɨ ó, é jɔʼ fih.»

33No ó Pol a mʉa é gumo nye a be e. 34Bʉʉ bʉrʉm ze jyɛʼ taa buʼo yɔɔ é Mbɨambɨa Lɔɔ, ntɔʼ syɛŋa e Pol, ntɔʼ buʼla. É sama bʉr baa, yé a be ó Dionisyʉs, a be mʉr bʉm yé a gwɨhla-gwɨhla é l'ecwɨʼ e Ayeropagos ɨ, le nuu mʉma, die le Damaris, ndwe e bʉʉ nteme, bé a be tɨʼ ɨ.

Currently Selected:

Mɨlʉmlʉ 17: ozmBad

Highlight

Copy

Compare