Mɨlʉmlʉ 15

Gwɨhla nɨnɨ yé a syɛɛlɨ ɨ Yerʉsalɛm ɨ

1Bʉʉ bʉr, bé a si duho Yʉda, toŋɔ Antios, ntɔʼ dweŋɔ obɨɔ bɨna sikʉlʉ ó: «ǃBɨn bʉr o ndɨ abe oYʉden ɨ, bé si be, asaŋɔ mpʉn, lé edu mɨnjwɨr Moyiz a liʼe bɨna ga nɛʼɛ, bɨn bé ákwoʼ bi tiʼ molu mo mpoʼ mɨmɛh!» 2No ó Pol bé e Barnabas, bé a be ó lé ebul gœa e be, le esaŋɔ mosono. Bé ka ze twe twii ó, Pol bé e Barnabas ndwe e bʉʉ bʉr o Antios, bé toʼ Yerʉsalɛm, lé ebâʼle to timle lɔb waa, bé e mɨlʉmlʉ mo Yesʉs, ndwe e l'ocyɛb be efoʼ o Mbɛr-Zyɛm.

3Bʉr o mbɛr Zyɛm waa ze lomo be é cyen yaa. No ó bé a laa Fenis ndwe e Samari, lé eto le elɛɛ mpʉ bʉr o ndɨ abe oYʉden ɨ, bé a dwir mɨleme, jyɛʼɔ taa buʼo yɔɔ boo Zyɛm ɨ. Obɨɔ bɨna bɨbɛh ntɔʼ soho é buobuo lé ejoʼo lɔɔ waa. 4É jɔʼ bé a pyal Yerʉsalɛm ɨ, mbɛr Zyɛm wé a be tɨʼ ɨ, wé a si bɨlan e be, bé e mɨlʉmlʉ ndwe e l'ocyɛb be efoʼ o Mbɛr-Zyɛm. Bé e Pol ze taŋle be sa yiyɛh Zyɛm a sa é zi wɔɔ ɛ. 5Bʉʉ obuʼla, baa b'a taare be-be é nkɔm oFarizyɛŋ ɨ, bé ze mʉa si, lɛɔ ó: «Bé ejala le esa be yɛɛ mpʉn, le elɛɛ e be ó, bé duʼo motie le mompene mo Moyiz.»

6Mɨlʉmlʉ bé e l'ocyɛb be efoʼ o Mbɛr-Zyɛm, bé ze syɛŋa gumo gwar, lé ejɨ timle lɛa wɔɔ nɨ. 7Jɔʼ bé a be, bé osi do é po e, Pyɛr ze cyɛb cɨcyel, le elɛɛ ó: «Obɨɔ ga bam aa! Bɨn bé egʉa ó, Zyɛm a bɛa pɛh me é bʉr o sama yin tʉŋlʉ ó, me lɛŋɨ Mbɨambɨa Lɔɔ é bʉr o ndɨ abe oYʉden ɨ, ó bé joʼa lɔɔ waa, le ebuʼla we. 8No ó, Zyɛm, waa lé egʉa mɨleme mɨ bʉr ɨ, a si kʉ lɛʼle ó, nyi mɛʼle be, ebe, nyi ntɨh be Sisim we é mbi nye a ntɨh bɨna ga wa ɛ. 9Nye agba mbɛʼ paʼra ga wina boo nɔɔ. Nye a be ó si pubo mɨleme myɔɔ ebe taa buʼo bé a jyɛʼ boo Krɨst ɨ. 10A, ebe yé bɨn ka boblo Zyɛm é bananaʼ ɛ? Bɨn bé ejɨ gba ompʉn baa mbeʼ é dile dile é koo, abe ó, bɨmpam ga bina, nkʉ bɨna ga bʉr o tɨ, bé a si pa taare koʼo we lé enkɛɛ. 11To kœb ó, bɨna bɛɛ, bé ebuʼla ga ó, bɨna bé óbi tiʼ molu mo mpoʼ mɨmɛh ó, njɨ ebe ncwɨncwɨa mo Da Yesʉs, jwɨʼ gwar e gwar e mbi bé óbi nteme nye e.»

12Bʉr o bʉm bɨbɛh ntɔʼ twe é leb é jɔʼ bé a joʼlo Barnabas bé e Pol lé etaŋle be tɔɔlʉ tɨʼ ɨ: mpʉ Zyɛm a bɨlan e be lé esa bɨdweʼle bɨ nkul we ndwe e bɨsa bɨ jehe é mih mo bʉr o ndɨ abe oYʉden ɨ. 13Jɔʼ bé a sil lwib ɨ, Jacques ntɔʼ nʉa lwib. Nye ó: «Obɨɔ ga bam aa! Bɛŋɨ ga mogwal. 14Simɔn, nyi lɛɛ mpʉ Zyɛm a taare lé etoŋlo bʉr o bɨkul bɨfih ɨ. Nyi pɛh bʉʉ bʉr é bɨkul byaa ó, bé diʼe kul bʉr ndɨ yaa ye e. 15Bɨsyɛɛla bɨna lé ejoʼo ga muh bi, byé ebɔma e mokan ogwiha o mɨlɔb, bé a lɛɛ ɛ. Yé ó mpʉ yé ndɨ tila é Kalara Zyɛm ɨ. Yé ó tila ó:

16“Jɔʼ, yé óbe si laa ba, me óbula ze,

ze bâʼle cyel saʼ mo David cɨcyel.

Yé a si bɛa bwiʼ, duma si.

No ó, me óbâʼle cyel ye cɨcyel,

17ó ma dœh e bʉr, nye saŋa Da.

Bé e bʉr o bɨkul bibyɛh lé ejwɨrɔ die lam ɨ, bé ósáa nye.

No ó Da lé elɛɛ ɛ, mʉr lé esa bɨsyɛɛla byaa,

18waa lé ebɛa gʉa bye, taare mya ɛ.”»

19Jacques, nye ó: «No ó, mɛm lɛɛ ó: mʉr, nye ajala le entɨʼ bʉr o bɨkul bɨfih é jɔʼ bé lé edwir mɨleme, le ejyɛʼɔ taa buʼo yɔɔ boo Zyɛm ɨ. 20Bɨna tila ga yɛɛ kalara ó, bé ejala le edi é l'ecyooŋʉ, lé esyɛhle mɨlɔb mɨnâ mi: lɔb ede tir a bàŋɔ é mpah bé ndɨ edwiibɨ bɨbaŋabaŋa bɨdweʼle e, lɔb esa bɨmala e mɨfyɛba, lɔb ede tir a baasyɛhɔ twii, motié pʉʼa ɛ, ndwe e lɔb ede motié.

21«Bé e nkul emɛʼle sa no, ebe, taare é molu pihe, ze pyal é muh é dobo lɨ, bʉr, bé eláa motie mo Moyiz é bɨnkana bibyɛh. Bé eláa me é mompah mɨnjwɨʼla é moho saba wiwɛh.»

Kalara a cenɔ bʉr o Antios ɨ

22No ó mɨlʉmlʉ, bé e l'ocyɛb be efoʼ o Mbɛr-Zyɛm ndwe e bʉr o Mbɛr-Zyɛm bɨbɛh, bé a si bee embɨa ó, bé pɛhɛ bʉʉ bʉr é sama yɔɔ, bé òlomo be Antios, bé e boo Pol, ndwe e Barnabas. No ó bé a pɛh Yʉda, waa bé ndɨ ejebe nteme ó, Barsabas ɨ, bé e Silas. Bʉr baa bɨbɛh oba, bé a be ó ocyɛb be efoʼ é l'obuʼla tʉŋlʉ. 23Bé a lomo be ó, bé toʼ e kalara nwa.

Mɨlʉmlʉ bé e l'ocyɛb be efoʼ o Mbɛr-Zyɛm, obɨɔ ga!

Bɨh bé etile ó, obuʼla o Antios, baa ndɨ abe oYʉden ɨ, le bʉr o lal Siria ndwe e baa o lal Silisia.

Bɨh bé esoho bɨn!

24Bɨh bé etile bɨn ó, ebe, bɨh bé ejoʼo ó, bʉʉ bʉr o sama yih, bé a si mʉa kaʼ, ze gʉʼ bɨn ye, ze ntɨʼ mɨsisim min e mopɨʼ mɔɔ, abe ó, bɨh bé a si lomo be ó, bé saʼ no. 25Ebe no, mɨleme, myé a be ó bɨh é ntɨɨɨŋ ó, bɨh pɛhɛ bʉʉ bʉr, lomlɔ bɨn ba, bé e l'obɨɔ o kpɛl bɨh, Barnabas bé e Pol ɨ. 26Bé ó b'a kɛha bɨtiʼ byɔɔ ebe die mo Tî ga wina Yesʉs-Krɨst. 27No ó, bɨh bɨ lomlo bɨn nteme Yʉda bé e Silas. Bé bʉr o tɨ, bé ókʉ gʉa lɛɛ bɨn sa bɨh tile bɨn yi. 28Ebe, bɨh e Mbɨambɨa Sisim, bé a si bee embɨa ó, bɨh beʼ l'akɛl bɨn mbeʼ fih, njɨ bɨsyɛɛla ndɨ é buo nyɔm ɨ. 29Diʼe ga é l'ecyooŋʉ, lé esyɛhle lɔb ede tir a bàŋɔ é mpah bé ndɨ edwiibɨ ozyɛm bé a dɨ kpaʼ ɛ, lɔb ede motié, lɔb ede tir a baasyɛhɔ twii, motié pʉʼa ɛ, ndwe e lɔb esa bɨmala e mɨfyɛba.

ǃBɨn si baʼle monyʉl mɨn mbɨmbɨa é mbi wiʼ nɛʼɛ, lɛɛ ó, bɨn bé ókʉ gʉa esa syɛɛla ndɨ é mbɨa ɛ. Diʼe ga mbɨmbɨa.

30No ó bé a ze bir mɨlʉmlʉ myaa ó, myé toʼ. Myé ntɔʼ to pyal Antios. Jebɔ bʉr o mbɛr Zyɛm bɨbɛh, syɛŋɔ be é gumo gwar, ze dweŋɔ be kalara waa. 31Jɔʼ bé a sil láa nye e, bʉr bɨbɛh ntɔʼ bul laŋle soho motɨɨ maa, ebe, mé a si bul gba be nkul é monyʉl. 32Yʉda bé e Silas, bé a be nteme ó ogwiha o mɨlɔb. Bé a si bul lwib e l'obɨɔ bɨna baa, le etɨe be, le egba be nkul é monyʉl. 33Bwa molu, bé osi laa nɛʼɛ, obuʼla ntɔʼ bir be ó, bé bula é motala, bé toʼ nko bʉr o b'a lomo be, bé a be e. [34No Silas a bà jwɨʼ ó, nye liʼɨ gʉ.]

35No ó, Pol bé e Barnabas, bé a ze di ba Antios. Bé e bʉʉ bʉr é buobuo, ze taarɔ lé eyeʼle bʉr ndwe le etuno mɨlɔb mo Da.

Pol bé e Barnabas, lé ebɔʼa mozi

36Bwa molu, bé osi laa nɛʼɛ, Pol ze lɛɛ e Barnabas ó, bé toʼ, to bee obɨɔ bɨna é bɨnkana bibyɛh bé a tuno mɨlɔb mo Da ɛ. Nye a gwɨm ó, bé toʼ le edwɛʼ be, gʉa nteme mpʉ bé mu ka tiʼe e.

37Barnabas nyɛɛ a be e gwɨma ó, bé toʼ é cyen yaa e Yʉanes, waa ndɨ e lʉʉ die ó, Markus ɨ. 38É paʼ mo Pol, yé a baambɨa jwɨʼ, ebe, Markus a si pa taare to ntwiŋ be e syɛɛ ɨ Pamfilia, bé e boo nɔɔ aka to dolo. 39No ó bé a ze bul gœa é gœa gœa, ze bɔʼa mosama, nwaʼ aka syɛŋa zi ngwar e nuu. É mpʉ bé a sa no e, Barnabas a ze nʉa Markus, bé e nɔɔ ze toŋɔ Siprʉs. 40Pol nyɛɛ ze pɛh Silas. Bé e nɔɔ ntɔʼ to, obɨɔ, bé osi pa jwɨʼla e Da ó, nye cwɨa e be le ebaʼle be. 41No ó bé a ze to, to laa lal Siria ndwe e waa Silisia, le egba mɨmbɛr mɨ Zyɛm nkul é monyʉl.

Currently Selected:

Mɨlʉmlʉ 15: ozmBad

Highlight

Copy

Compare