Mɨlʉmlʉ 14

Pol bé e Barnabas ɨ nkana Ikoniʉm

1É nkana Ikoniʉm, Pol bé e Barnabas, bé a si ni nteme é mpah mɨnjwɨʼla oYʉden. Bé ze lwib tɨ. É lwiba wɔɔ waa, buobuo bʉr, bé a si buʼla lɔɔ Zyɛm. Baʼ, bé a be ó, oYʉden; bʉʉ, bʉr o bɨkul bɨfih. 2Bʉʉ oYʉden, baa b'a sa lɔɔ Zyɛm ebɨh ɨ, ze soʼlo bʉr o bɨkul bɨfih ó, bé beʼ e mɨpɛhla mɨ ebebe é nko paʼ obuʼla. 3Pol bé e Barnabas, bé a si bul bɛa é nkana Ikoniʉm, lé ekʉ gʉa lwib e nkul mo Da Yesʉs é kpɛŋlɛm, abe e bʉa. Bé a dɨ lwib ó, é lɔb ncwɨncwɨa mo Yesʉs. Yesʉs nyɛɛ ze boʼlo lɔɔ waa é zi bɨdweʼle bɨ nkul we ndwe e bɨsa bɨ jehe nye a sa é zi mobo mɔɔ ɛ. 4Bʉr o nkana ze bɔʼa monkɔm moba. Nwaʼ nkɔm, kɛm oYʉden; nuu, kɛm mɨlʉmlʉ.

5OYʉden, le baa ndɨ abe oYʉden ɨ, ndwe e l'otamabʉr o kul oYʉden, ze bònɔ pɨʼ ó, bé tíila Pol bé e Barnabas le elumo be mokoʼ. 6Sa gwar, Pol bé e Barnabas, bé a be ó si gʉa no. Bé ntɔʼ kpɛɛ, toŋɔ é bɨnkana bɨ Listra ndwe e Dɛrbe, ndɨ é lal Likaonia ɛ. Bé ze to nteme é mokwar mé a be é mompàh ɛ. 7Bé a be ó lé eto le elɛɛ Mbɨambɨa Lɔɔ nteme gʉ.

Pol bé e Barnabas ɨ bɨnkana bɨ Listra ndwe e Dɛrbe

8Ɨ Listra, nuu mʉr a be ó tɨ, e mokʉ é fwam-fwam. Ngbàa nye a byɛl, nye a baapa tibe bɨbwah lʉʉ dobo. 9É jɔʼ nye a be lé ejoʼlo-joʼlo sa Pol a be lé elɛɛ ɛ, Pol ze dwɛʼ nye é tʉʉʉŋ, bee ó, nye a be ó lé ejyɛʼ taa buʼo ye boo Yesʉs le ebuʼla ó, nye óbɛm tiʼ nye. 10No ó Pol a lɛɛ nye e twii kʉ kʉ ó: «Mʉŋa si. Cyɛba cɨcyel é nkʉʼʉ.» Nye ntɔʼ mʉa si é bʉ, taare é cyen! 11É jɔʼ ntuntuma bʉr, yé a bee sa Pol a sa ɛ, yé ntɔʼ bɨn motwii kʉ é lwib lal waa. Bé ó: «Ozyɛm, bɨ lihba bʉr ɔɔ! Bɨ fulo bɨna ga ye ɔɔ!»

12No ó bé a jwɨr Barnabas ó, «Zœs»#14.12 «Zœs», yé ó die e nuu zyɛm bʉr o Grɛs bé a dɨ dwiibɨ ɨ. Zœs a be ó njwɨɨbʉr é paʼ ozyɛm bɔɔ bɨbɛh.; Pol nyɛɛ, «Ermes»#14.12 «Ermes», yé ó die e nuu zyɛm bʉr o Grɛs bé a dɨ dwiibɨ ɨ. Ermes a be ó pulʉm mo Zœs., ebe, nye ó b'a dɨ lwib é l'efu lɔɔ bɨbɛh. 13Fum bé a dwiibɨ-dwiibɨ Zœs ɨ, yé a be ó é l'eniŋlɨ e nkana. Para a sea-sea e Zœs é mbɛr mɨndwɛa waa ɛ, ze tiile mɨnjʉm bɨntɛɛ, ntɔʼ nʉa ofulawa le etie mopʉʼlʉ, ntɔʼ gba me é motwii bɨntɛɛ, to e bye é l'eniŋlɨ e nkana. Nye a di toŋlo ó, Barnabas bé e Pol, bé a be ó ozyɛm. Nye a kpɛl ó, bé e ntuntuma bʉr, bé tiʼa ntɛɛ, lé ediʼ be ya tɔɔ motwina.

14No ó jɔʼ mɨlʉmlʉ, Barnabas, bé e Pol, bé a joʼo lɔb waa ɛ, bé ze nya mɨkan myɔɔ, ntɔʼ fimɔ mɨkam é ntuntuma bʉr yaa tʉŋlʉ, le ebɨnɔ mocel kʉ. 15Bé ó: «Bɨn bʉr o Listra ee! Yé bɨn muno ka sa mpʉnʉ nɨ? Bɨh nteme, bé ó bʉr mpʉ bɨn ndɨ ɨ. Bɨh pyal bɨn ye ó, lé eze lɛɛ Mbɨambɨa Lɔɔ, le elɛɛ bɨn ó nɛɛ, bɨn gwɨma baambɛhambɛha bɨsa, bɨn dwirɨ mɨleme, jyɛʼ taa buʼo yin boo Zyɛm, waa ndɨ kublakubla ɛ. Nye ó b'a cye kʉ e si, le maŋ ndwe e bɨsa bibyɛh ndɨ tɨʼ ɨ. 16Molu pihe, nye a si bir bɨkul bɨ bʉr, tɔɔ mɨmya é buobuo ó, bé toʼ é mɔɔ mozi bé bʉr o tɨʼ, bé a bɛa pɛh ɛ. 17Dam be no, nye a baaliʼe be é mozi maa tɨtoʼo. Nye a si boʼlo, tiibe e nye mʉr tɨ. Nye a si bul cwɨa e bʉr bɨbɛh. É yiʼ jɔʼ, nye efil bɨn ompie, duho é jobo kʉ. É yʉʉ jɔʼ, nye edwe bɨn nkul eto é mɨngol. Nye edwe-dwe bɨn mode, le esa ó, bɨn díla. Nye egba bɨsʉhʉ é mɨleme min.»

18Dam be mpʉ mɨlʉmlʉ, myé a lwib no e, bé a si bi tuu lé ekamle bʉr lé etiʼe bɨntɛɛ bé a ze e bye é l'efu e mɨndwɛa ɛ.

19OYʉden ntɔʼ pyal tɨ: Baʼ duho Antios, yaa Pisidia, bʉʉ duho Ikoniʉm. Bé ze soʼlo ntuntuma bʉr é nkɔm wɔɔ ó, bɨbɛh, bé luma Pol mokoʼ, bé à jʉ nye. Bé ze taare lé elumo nye mokoʼ. Daʼrɔ nye si e si, pɛʼɔ nye é nkana, ebe, bé a jwɨʼ ó, nye a be ó si dwè. 20É jɔʼ ompʉn bé a bʉmra nye é nka, jwɨʼla e Zyɛm ó, nye l'ayi dwè e, nye ntɔʼ mʉa si, fiʼ, bâʼle to nkana. É mɛn tɨ, bé e Barnabas ze mʉa, toŋɔ Dɛrbe. 21Pol bé e Barnabas ze lɛɛ Mbɨambɨa Lɔɔ é nkana Dɛrbe, le esa ó, bʉr é buobuo diʼe ompʉn mo Da Yesʉs. Bé ze fiʼ, to cyɛb é nkana Listra, le Ikoniʉm, le Antios, yaa Pisidia. 22Bé ze dwe ompʉn molele é mɨsisim, ndwe le etɨe be ó, bé toʼ dolo lé edu zi buʼo yɔɔ. Bé e be ó: «Yé é zi buobuo mokɔbla ó bɨna lé ekʉ jala le eni é jwɨ̀ʼa mo Zyɛm.»

23É gumo yiyɛh, bé a be ó lé ecyel ocyɛb be efoʼ é mɨmbɛr mɨ Zyɛm mimyɛh, bé osi pa sa ti mode ndwe le ejwɨʼla e Zyɛm. Bé ze liʼe be é mobo mo Da, mʉr bé a jyɛʼ taa buʼo yɔɔ boo nye e.

Pol bé e Barnabas lé ebâʼle pyal Antios, yaa lal Siria

24No ó bé a ka ze ntaa lal Pisidia, to pyalɔ Pamfilia. 25Jɔʼ bé a sil lɛɛ lɔɔ Zyɛm é Pɛrge e, bé ze to Atalea. 26Tɨʼ ó bé a ze kable é titima, ze tɨŋɔ cyen, to Antios ɨ. Bʉr o Antios ó b'a lomo be é syɛɛ bé a lwanbe sil ɨ. Bé a lomo be ó, bé osi pa jwɨʼla e Zyɛm é l'efu lɔɔ, ó nye dɨʼe cwɨa e be é cyen yaa.

27É jɔʼ bé a pyal Antios ɨ, bé ze baŋle bʉr o mbɛr Zyɛm waa, lɛɔ be bɨsa bibyɛh Zyɛm a sa é zi wɔɔ ɛ. Bé a lɛɛ nteme ó, Zyɛm a si cwɨa nteme e bʉr o ndɨ abe oYʉden ɨ, le edib be zi ejyɛʼ taa buʼo yɔɔ boo nye. 28Bé e l'ompʉn bé a be gʉʼ ɨ, ze di tɨʼ molu é buobuo.

Currently Selected:

Mɨlʉmlʉ 14: ozmBad

Highlight

Copy

Compare