Mɨlʉmlʉ 11

Pyɛr lé elɛɛ ompʉn mo Yesʉs sa jehe nye a bee é lima ɛ

1Mɨlʉmlʉ ndwe e l'obuʼla bé a be Yʉda ɛ, ze joʼo lɔɔ ó, bʉr o ndɨ abe oYʉden ɨ, bé nteme, bé a si buʼla lɔɔ Zyɛm bé a lɛɔ ɛ. 2É jɔʼ Pyɛr a bula, pyal ɨ Yerʉsalɛm ɨ, obuʼla bé a be, bé mu si saŋɔ mpʉn ɨ, ze nwahle nye tɨ. 3Bé e nye ó: «Go a si ni mbɛr, di tɨ, bɨn e bʉr o b'a baapa saŋɔ mpʉn ɨ. Bɨn e boo nɔɔ nteme, bé a si bana puhba mobo, de fua gwar!»

4Pyɛr ze taare lé etaŋle be lɔb waa, le elɛɛ mpʉ bɨsa byaa, byé a syɛɛlɨ ɨ. Nye ó: 5«Me a be ó é nkana Yope lé ejwɨʼla e Zyɛm. É jɔʼ yaa, me a si bee yʉʉ sa jehe é lima. Yé a be ó, yʉʉ sɔʼɔ mpʉ bwaʼbwaʼ ndomo lé eduho é jobo kʉ, fulo si é ntiii. Nye a be ó tiila é modumo monâ. Nye ze fulo gumo me a be e. 6Me a si gʉa dwɛʼ nye é tʉʉʉŋ, bee bɨsa byé a be tɨʼ tʉŋlʉ ɨ, ze bee otir, baa ndɨ e mokʉ monâ ɛ, bɨbɛh, le otir ó diʼ, le onyʉa, ndwe e bɨnɔn. 7Me ze joʼo twii. Nye e me ó: “Pyɛr, mʉŋa si. Jʉʼo. Go à de.”

8«No ó me a bɨha e nye ó: “Abana, Da, ebe, mode bɨh ndɨ ecyɛl, maa ndɨ e nkul elœʼ mʉr é mih mo e, me apa de me.”

9«Me ze bâʼle joʼo twii lé eduho é jobo kʉ, lé elɛɛ ó: “Sa Zyɛm mu si pubo e, aka nyamle lɛɛ ó, yé ó sa ndɨ elœʼ mʉr é mih mo Zyɛm ɨ!” 10Sa yaa, yé a pyal me no ó, zɔʼ lɛl. Pie tɨ, sa yaa, yé ntɔʼ bula, sa yaa yiyɛh ntɔʼ daʼrɔ é jobo kʉ. 11É jɔʼ gwar e gwar yaa, bʉrʉm olɛl ze pyal é mbɛr me a be e. Bé a duho ó, Sezare, lé eze saa me. 12No ó Mbɨambɨa Sisim a lɛɛ e me ó, bɨh e boo nɔɔ toʼ. Nye a lɛɛ ó, me l'aliʼa lé eto. Obuʼla tobo baʼ nteme, bé a si liʼle me ɨ Sezare. Bɨh e boo nɔɔ ó b'a to ni mbɛr mo nuu mʉr. 13Nye ze lɛɛ bɨh mpʉ nye a bee engles é mbɛr we e. Engles waa ze lɛɛ e nye ó: “Loma bʉr Yope. Bé toʼ, to jebe Simɔn, ndɨ ejebɔ ó, Pyɛr ɨ. 14Mɨlɔb nye ólɛɛ go e, myé ó ngo lɛʼle mpʉ go óbi tiʼ molu mo mpoʼ mɨmɛh ɛ. Abe njɨ go ome. Mbɛr bʉr go wiwɛh, wé óbi tiʼ molu mo mpoʼ mɨmɛh nteme.”

15«Jɨh tɨʼ me a kʉ nʉa lwib, Mbɨambɨa Sisim ntɔʼ ze fulo é sama yɔɔ yiyɛh. Yé a be ó jwɨʼ gwar mpʉ wé a taare fulo bʉr é l'etɔɔrʉ ɨ. 16No ó, me ze toŋlo sa Da a lɛɛ bɨna ga ɛ. Nye a lɛɛ ó: “Yʉanes a dù-dù bʉr ó e modibe. Bɨn bɛɛ, bé ónʉa ndubo ó é Mbɨambɨa Sisim.” 17To kœb ó, Zyɛm a si dwe nteme be sa gwar e gwar nye a taare dwe bɨna ga é jɔʼ bɨna bé a jyɛʼ ga taa buʼo ga yina boo Da Yesʉs-Krɨst ɨ. É syɛɛla ye yaa, me a baangbaa kamle nye lé edwe be Sisim we.» 18Jɔʼ bé a sil joʼo mɨlɔb myaa ɛ, mɨleme ze fila be si. Bé ze dwe Zyɛm kum. Bé ó: «Yé ó no: Zyɛm, nyi toŋlo nteme baa ndɨ abe oYʉden ɨ, ndwe le edib be zi egwɨma mobebe mɔɔ, le edwir mɨleme, bé nkʉʼ bi tiʼ molu mo mpoʼ mɨmɛh.»

Mbɛr Zyɛm ndɨ Antios ɨ

19É jɔʼ Etyɛn a jʉŋɔ ɛ, bʉr ze tíile ompʉn. Yé ó b'a sa ó, ompʉn, bé gbɛha. Baʼ bʉr o sama yɔɔ, bé a si to cye Fenis; bʉʉ, to é Siprʉs; bʉʉ nteme, to é nkana Antios. Bé a kʉ lɛɛ-lɛɛ lɔɔ Zyɛm ó, njɨ é l'oYʉden bé ome. 20To kœb ó, yé a be nteme ó e bʉʉ obuʼla, bé a duho dine Siprʉs ndwe e nkana Sirɛn ɨ. Bɛɛ ntɔʼ toŋɔ Antios, ze to bɔma e bʉr o Grɛs. Bé ze lɛɛ be nteme Mbɨambɨa Lɔɔ lé etiibe e Da Yesʉs ɨ. 21Nkul mo Da a be ó e be. Bʉr, bé a si bul dwir mɨleme, jyɛʼɔ taa buʼo yɔɔ boo Da Yesʉs.

22Bʉr o mbɛr Zyɛm wé a be Yerʉsalɛm ɨ, bé ze joʼo lɔɔ waa, bé ntɔʼ lomo Barnabas Antios. 23É jɔʼ nye a pyal gʉʼ ɨ, nye a ka bee mpʉ Zyɛm a bul cwɨa e l'ompʉn ɨ. Nye ntɔʼ soho, ze tɨe be ó, bé diʼe twii é zyɛŋa wɔɔ boo Da Yesʉs. 24Barnabas a be ó mbɨambɨa mʉr, lwɨŋla e Mbɨambɨa Sisim ndwe e buʼo. Bʉr é buobuo, bé a si jyɛʼ taa buʼo yɔɔ boo Da Yesʉs.

25No ó, Barnabas a mʉa, to Tarsʉs, lé eto saa Sol. 26É jɔʼ nye a bee nye e, nye ntɔʼ bula e nye, bé e nɔɔ ze to Antios. Bé ze syɛŋa, bé e bʉr o mbɛr Zyɛm wé a be tɨʼ ɨ, tɔɔ mbu ntinɨ. Cye yaa yiyɛh, bé a be-be ó, lé eyeʼle bʉr é buobuo. Tɨʼ Antios ó bé a taare lé ejebe ompʉn mo Yesʉs ó, okristen ɨ.

27É jɔʼ yaa ó ogwiha o mɨlɔb, bé a duho Yerʉsalɛm, to Antios ɨ. 28Nuu mʉr a be ó é l'esama lɔɔ, die le Agabus. Nye a si lɛɛ bʉr é nkul mo Mbɨambɨa Sisim ó, bwaʼbwaʼ za ónyaŋla é molu maa, jala si nwaʼ nyiwɛh. No ó, za waa a ka nyaŋla ó, é jɔʼ mo Kɛɛza Klodiʉs. 29Ompʉn, bé bʉr o tɨ, bé a nʉa tiʼa ó, bé ótoŋlo obuʼla bé a di é Yʉda ɛ, mʉr nyiwɛh é sama yɔɔ lé egul be lé edu bim nye a be e ye e. 30Bé ntɔʼ sa nteme no. Bɨmɔn byaa, byé a lomlɔ ocyɛb be efoʼ o Mbɛr-Zyɛm ó, é zi mo Sol bé e Barnabas.

Currently Selected:

Mɨlʉmlʉ 11: ozmBad

Highlight

Copy

Compare