Mɨlʉmlʉ 10
10
Pyɛr bé e Kɔrnɛl
1Nuu mʉr a be ó ɨ Sezare, die le Kɔrnɛl. Nye a be ó njwɨɨ nter bɨzima. Nye ó b'a be njwɨɨ é ntoo bɨzima ndɨ ejebɔ ó, Ntoo lal Italia ɛ. 2Bé e mbɛr bʉr we wiwɛh, bé a be-be ó lé edwaabe Zyɛm. Nye a be nteme ó lé ebul gul baanteʼenteʼe o bʉr oYʉden, le ejwɨʼla e Zyɛm jɔʼ yiyɛh é buobuo. 3Ngbaa le eka be, yé mu lé eto saa mowala molɛl nɛʼɛ, nye ntɔʼ bee sa jehe: engles mo Zyɛm lé eni é mbɛr we, engles waa lé eze lɛɛ e nye ó: «Kɔrnɛl!» 4Nye ze dwɛʼ engles waa é tʉʉʉŋ e bʉa. Nye e nye ó: «Yé mu nyá, Da?» Engles ntɔʼ bɨha e nye ó: «Zyɛm, nyi bɨha mɨnjwɨʼla myo mbɨmbɨa. Nye etoŋlo go ó, ebe ngula go lé egul baanteʼenteʼe e. 5Banana, loma bʉr Yope, bé toʼ, to baŋle Simɔn, waa ndɨ ejebɔ ó, Pyɛr ɨ! 6Nyi fil é mbɛr mo mʉr ndɨ efeh bɨkʉr bɨ otir ɨ, die le Simɔn. Mbɛr we, wé ó é nkpah maŋ.»
7É jɔʼ engles a laa ɛ, Kɔrnɛl ntɔʼ jebe bʉʉ osyɛl o mosa be, oba, ndwe e yʉʉ zima é l'esama e bɨzima byé a sea-sea e nye e. Zima yaa nteme, yé a be ó lé edwaabe Zyɛm. 8Kɔrnɛl ntɔʼ lɛɛ be sa yiyɛh yé a pyal nye e. Pie tɨ, nye ze lomo be Yope.
9É mɛn tɨ, bé dina zi e zi, bé mu lé ekunbo e Yope nɛʼɛ, Pyɛr ze bere kʉ mie, lé eto jwɨʼla e Zyɛm gʉ. Yé a be ó, yé mu lé eto saa teme moho. 10Nye a be nteme ó lé ejɨ de, e za é mo é nyɛʼrɛ. É jɔʼ bʉr o mbɛr, bé a be, bé dina lé ejam nye mode e, nye ze bee sa jehe é lima. 11Nye ze bee ó, jobo lé ebɔa, le yʉʉ sɔʼɔ mpʉ bwaʼbwaʼ ndomo lé eduho é jobo kʉ, fulo si é ntiii. Nye a be ó tiila é modumo monâ. 12É ndomo waa tʉŋlʉ, yé a be ó e l'otir mɨmbi mimyɛh ndɨ e mokʉ monâ ɛ, le onyʉa, ndwe e bɨnɔn. 13Nuu twii ntɔʼ lɛɛ e nye ó: «Pyɛr, mʉŋa si. Jʉʼo. Go à de.» 14No ó Pyɛr a bɨha e nye ó: «Abana, Da, ebe, me apa de mode bɨh ndɨ ecyɛl, maa ndɨ e nkul elœʼ mʉr é mih mo e.» 15Nye ze bâʼle joʼo twii lé elɛɛ e nye ó: «Sa Zyɛm mu si pubo e, aka nyamle lɛɛ ó, yé ó sa ndɨ elœʼ mʉr é mih mo Zyɛm ɨ.» 16Sa yaa, yé ntɔʼ bâʼle pyal nye no byʉʉ bɨjɔʼ bɨba. Cye e cye yaa, ndomo waa ntɔʼ bula, bere é jobo kʉ, aka ntɨhɔ si.
17É mpʉ Pyɛr a bee sa jehe yaa é lima ɛ, nye ze saa egʉa ndumlo tɨ. Nye dina lé epahle ye nɛʼɛ, bʉr ze pyal é kpɨm, duho boo Kɔrnɛl, bé mu é l'ebe e mbɛr mo Simɔn. 18Bé ze taare lé elwib lé eyɨm twii, dîŋɔ ó: «Bʉr o mbɛr wiʼ ɔɔ! Zê bɨn bé e nuu njyoo wâʼ é mbɛr win wi, die le Simɔn, ndɨ ejebɔ ó, Pyɛr ɨ?»
19Pyɛr, nye dina lé epahle sa jehe nye a bee é lima nɛʼɛ, Mbɨambɨa Sisim ze lɛɛ e nye ó: «Bʉr olɛl, bé ó wâʼ lé esaa go. 20Mʉŋa si. Fula. Bɨn e boo nɔɔ, bé à to. Aliʼa lé eto, ebe, me ô lomo be.» 21No ó Pyɛr a ze fulo si, le elɛɛ e bʉr baa ó: «Me ó ndɨ mʉr bɨn lé esaa nɨ. Ebe yé bɨn ze pyal me e?» 22Bé ntɔʼ bɨha ó: «Bɨh ze ó, é lʉmlʉ mo njwɨɨ nter bɨzima wih, die le Kɔrnɛl. Nye ó cɨcyel mʉr lé edwaabe Zyɛm ɨ. Nye é bul jwɨ̂ʼlɨ e bɨsyɛɛla bɨ ncwɨncwɨa nye lé elɛʼle oYʉden bɨbɛh ɛ. Nuu engles mo Zyɛm tɨe nye ó, nye baŋla go, go toʼ, to pyal nye ye, ó nye joʼla sa go ólɛɛ nye e.» 23Pyɛr ze niŋle be mbɛr, komlo be bɨja é mbɛr mo Simɔn.
É mɛn tɨ, bé e boo nɔɔ ze to, bʉʉ obuʼla o Yope lé eliʼle nye. 24É moho wé a ka bɔma ɛ, bé ze pyal Sezare. Kɔrnɛl a be ó lé ebono be, bé e mɨmbyɛl mye, ndwe e l'ofo be nye a baŋle e. 25Nia Pyɛr a ni mbɛr ɨ, Kɔrnɛl ze to bɔma e nye, ze bɨʼ mpom we si é mih me lé edwiibɨ nye. 26Pyɛr nyɛɛ ze gbɛl nye si. Nye e nye ó: «Mʉŋa si, ebe, me nteme, me ó njɨ mʉr.» 27Nye ze lwib e Kɔrnɛl. É jɔʼ bé a to ni mbɛr ɨ, Pyɛr a kœb ó, buobuo bʉr, bé osi fwal tɨ. 28Nye e be ó: «Bɨn bé ekʉ gʉa ó, yé ó kɔmlʉ é nko paʼ wih oYʉden, ó bɨh syɛŋa zi e mʉr kul fih, nkʉ dihle ba nko nye ndɨ ɨ. Sa gwar, Zyɛm, nyi kʉ lɛʼle me ó, me l'ayi ka cyɛl mʉr nkʉ lɛɛ ó: “Mbi mʉr wi, wé e nkul elœʼ mʉr nduo we é mih mo Zyɛm.” 29Ebe no, me baapeere é jɔʼ bɨn jebe me ó, me ntaʼ ɛ. No ó, kaʼ lɛɛ ga me sa bɨn jebe me e tɨʼ ɨ.» 30No ó Kɔrnɛl a bɨha e nye ó: «Yé mu ó, muh molu monâ, é l'ewala lɨ, me a be ó é mbɛr wi, lé esa mɨnjwɨʼla, myaa saŋɔ-saŋɔ é mowala molɛl ɨ. Nuu mʉr ze nyin me motwɨra, e mɨkan é pumo-pumo, ze cyɛb me é mih. 31Nye e me ó: “Kɔrnɛl! Zyɛm, nyi joʼo mɨnjwɨʼla myo mbɨmbɨa! Nyi toŋlo mbi go lé egul baanteʼenteʼe e. 32Banana, loma bʉr Yope. Bé toʼ, to jebe Simɔn, waa ndɨ ejebɔ ó, Pyɛr ɨ. Nye be ó si fil é mbɛr mo Simɔn, mʉr ndɨ efeh bɨkʉr bɨ otir ɨ. Mbɛr we, wé ó, é nkpah maŋ.” 33No ó me ze kpahbe lomo bʉr é sɔɔlʉ go e. Go be ó si kʉ gʉa esa, lé ebana ze. Bɨh bɨbɛh mu si fwal wâʼ bananaʼ é mih mo Zyɛm ó, lé ejɨ joʼlo lɔɔ wiwɛh Da a lɛɛ e go ó, go ntaʼ, ze ntɛŋ bɨh ɨ.»
Lɔɔ mo Pyɛr é mbɛr mo Kɔrnɛl
34No ó Pyɛr a ze nʉa lwib. Nye ó: «Mɨ kʉ gʉa cyecye é bananaʼ ó, Zyɛm, nye adwaabe bʉr é lɔb mompom mɔɔ. 35Zyɛm, nye ebee mbɨmbɨa ó, mʉr nyiwɛh lé edwaabe nye, ndwe le esa syɛɛla ndɨ cɨcyel ɨ. Nye esyɛŋ bʉr baa ó, lé edwih be é bɨkul bibyɛh. 36Bɨn bé egʉa lɔɔ Zyɛm a ntɨh bwa b'Ɨzraɛl ɨ. Mbɨambɨa Lɔɔ waa, wé ó wi: Zyɛm óbula gba mʉr motala é leme ó, dumo e Yesʉs-Krɨst, ndɨ Tî bʉr bɨbɛh ɛ. 37Bɨn bʉr o tɨ, bɨn bé egʉa sa yé a syɛɛlɨ é Yʉda yiyɛh ɛ. Yé a taare ó, é lal Galɨle, pie ndubo Yʉanes a dù bʉr ɨ. 38Bɨn bé egʉa nteme mpʉ Zyɛm a lœm Yesʉs, mʉr Nazarɛt, Sisim we, le edwe nye nkul nɨnɨ ɨ. Bɨn bé egʉa nteme, mpʉ Yesʉs a kœʼ mɨlal e mɨlal, lé eto le esa embɨa, le etiʼ baa bé a sia e Njwɨɨ moleme e, ebe, bé e Zyɛm ó b'a be. 39Bɨh bɛɛ ó ndɨ oboʼla be, bʉr o ndɨ egʉa bɨsyɛɛla bibyɛh nye a sa ɨ Yerʉsalɛm, ndwe e myʉʉ mɨpaʼ mɨ nkɔra oYʉden ɨ. Bé a si cyèl nye é klos kʉ, jʉŋɔ nye. 40Sa gwar, Zyɛm a si pɛ̀h nye é foo é l'elu elɛl. Nye ze sa ó, bʉr bâʼla bee nye. 41Abe yɛɛ oYʉden bɨbɛh. Bɨh ome, bʉr o Zyɛm a bɛa pɛh ɛ, bɨh ó ndɨ eboʼlo é l'ocyecye, tiibe e nye. Bɨh e nɔɔ, bé a si puhba mobo pie jɔʼ Zyɛm a pɛ̀h nye é foo e. 42Nye a lomo bɨh ó, bɨh toʼ le elɛɛ oYʉden Mbɨambɨa Lɔɔ, le eboʼlo ó, Yesʉs ó ndɨ mʉr nye a cyel é dia tiʼà mɨlɔb, waa ótiʼe mɨkubla le odwè mɨlɔb ɨ. 43Nye ó mʉr lɔb we ndɨ tila é l'okalara be ogwiha o mɨlɔb bɨbɛh ɛ. Bé a lɛɛ-lɛɛ ó, mʉr nyiwɛh ójyɛʼ taa buʼo ye boo nye e, Zyɛm ópɛʼ bɨbaa nye lé eniʼe é lɔb mɨsyem mye e. Nye ósa no ó, ebe die mo Yesʉs.»
44Pyɛr l'apa fil lwib nɛʼɛ, Mbɨambɨa Sisim ntɔʼ fulo é mʉr nyiwɛh a joʼo lɔɔ we e. 45Obuʼla bé e boo Pyɛr bé a ze, baa b'a saŋɔ mpʉn ɨ, bé a si bul laŋle jehe lé ebee bʉr o ndɨ abe oYʉden ɨ, lé ebi Mbɨambɨa Sisim nteme. 46Bé a jehe ó, ebe, bé a be ó, bé mu lé elwib bɨlwib bɨfih, le egumlo mpwaʼ kum mo Zyɛm. No ó Pyɛr a ka dî ó: 47«Zê mʉr, nye e nkul eka kamle bʉr baʼ lé enʉa ndubo modibe ɛ? Banana, bé mu ó lé ebi Mbɨambɨa Sisim nteme, jwɨʼ gwar mpʉ bɨna ga!»
48No ó nye a ze lɛɛ e be ó, bé nʉŋa ndubo é nkul die mo Yesʉs-Krɨst. No ó bé a ze jwɨʼla e Pyɛr ó, nye jaʼ mʉʉ molu tɨ.
Currently Selected:
Mɨlʉmlʉ 10: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
