2 Korɛnt 11

Ocyecye mo Pol

1Nkʉ bɨn be ó be, be e nkul edihbe ba ogʉ wam ba titia nɛʼɛ, mpa mɨ to dolo lé elwib. Sa gwar, bɨn bé ebɛa dihbe me! 2Ebe, me ebaʼ bɨn, mbɔʼ waa lé eduho boo Zyɛm. Mbɔʼ waa, wé ó, ebe, bɨn bé ó mpʉ saŋ ndu esehe me a bɛl njʉm ngwar ɨ. Njʉm waa, nye ó Krɨst. 3Me ejoʼo bʉa. Me ekpɛɛ ó, bɨn bé amu jaa gomlo bɨbɛh é bebebebe zi ebe bɨkʉʉŋʉ. Bɨn bé amu dwibra e Krɨst jɔʼ gwar é dwirɨ, jwɨʼ gwar e gwar e mpʉ nyʉa a kʉa Efa, nye ntɔʼ bil é bɨkʉʉŋʉ ɨ. Bɨn bé amu jaa gwaʼ lé edwiibɨ Krɨst ntinɨ e ntinɨ. 4Bɨn sa ó, bana kʉ dihbe ó, nuu mʉr ntaʼ, ze lɛɛ bɨn lɔɔ mo Yesʉs fih, Yesʉs yaa abe mʉr mpaŋla we bɨh bé a cen ɨ. Bɨn nteme bé é car lé emɛʼle sisim fih le guu lɔɔ fih, abe Sisim le Mbɨambɨa Lɔɔ bɨh bé a tuno e. 5Mbea wam, wé yɛɛ ó: bʉr lé edoʼo le elɛɛ ó, bé ó ndɨ edihbe syɛɛ lʉmlʉ ɨ, sa bé ndɨ e ye e, me nteme, me e ye! 6Yé be ó, me abe e nkul elwib e bʉr e mokan é lʉo-lʉo nɛʼɛ, me yɛɛ ó e ngwɨa bɨsɔʼɔ. É mozi monɨ mɨmɛh ó bɨh bé a lɛʼle bɨn mbi bʉr bɨh ndɨ ɨ, é mih mɨn é pono.

7Me a si lɛɛ bɨn Mbɨambɨa Lɔɔ ndɨ eduho boo Zyɛm ɨ, anʉa myɛna. É jɔʼ me a fil nyʉl si e bɨn, bɨr bɨn kʉ ɨ, zê syɛɛla yaa, yé a be ó syem é mih mɨn? 8Bʉr o mɨmbɛr mɨ Zyɛm ndɨ é bɨgumo bɨfih ɨ, bé ó b'a jɛna-jɛna me ya. Me a be ó si laʼ be é l'enteʼe, lé esea syɛɛ é l'efu lɨn. 9No ó é jɔʼ me a be bɨn ye, me ndɨ é sɔɔlʉ ɨ, me a baafil nuu mʉr mbeʼ modile wam é nyʉl, ebe, obuʼla bé a duho Masedwan ɨ, bé a si ze me e ngula, lé edwe me sa yiyɛh yé a sa me sɔɔlʉ ɨ. No ó, é mozi mɨmɛh, me a si baʼle me mʉr tɨ, agba bɨn tuu é nyʉl. Me óto dolo lé ebaʼle me mʉr tɨʼ no. 10Neme ocyecye mo Krɨst ndɨ é me, me ólɛɛ é lal Akayi mpʉ me a kœʼ ebò e cyen ɨ. Abe e mʉr ndɨ e nkul ekamle me lé edoʼo tɨ. 11Ebe yé me ndɨ ebene lé enʉa bɨmɔn bin ɨ? Zê yé ó ebe me ndɨ akpɛl bɨn ɛ? Zyɛm, nye egʉa ó, me ekpɛl bɨn! 12Syɛɛla me lé esa bɨn nɨ, me óto dolo lé esa ye. Me amu jaa nee bʉr zi ndɨ ó, bé pyala bɨn ye e moseʼla mɔɔ, bé ntɔʼ gba bɨn tuu é nyʉl. Bé amu ka lɛɛ ó, bɨh e boo nɔɔ, bé ó jwɨʼ gwar é nko paʼ ebò e cyen bɨh lé ekœʼ œ. Ebò e cyen lɔɔ, lé ó sa bé lé edoʼo e le e.

13Mɨmbi mɨ bʉr myaa, myé ó mɨmpʉmpʉl mɨlʉmlʉ, osyɛl o mosa o bɨkʉʉŋʉ. Bé eliŋ bé bʉr o tɨʼ mɨlʉmlʉ mo Krɨst. 14No ó, sa yaa, yé abe sa jehe, ebe, Satan nye mʉr tɨ, nye ebɛa liŋ-liŋ nye mʉr tɨʼ engles myɛn! 15Ebe no, yé be ó, osyɛl o mosa mo Satan, bé eliŋ bé bʉr o tɨʼ ocɨcyel o bʉr nɛʼɛ, yé abe sa jehe. Efehle lɔɔ, lé ódu mpʉ bɨsyɛɛla byɔɔ, byé a be e.

16Me ebâʼle lɛɛ ó, mʉr beʼ l'aláa ó, me ó gʉ. ǃBɨn ka lɛɛ ó, «Yaaa! Nye ó gʉ!» nɛʼɛ, dihba ga me mpʉ bɨn ndɨ ebɛa dihbe bɨgʉ ɨ. Ebe no ó bɨn bé ódwe me jɔʼ é l'efu ó, me doʼa e mɛm mʉr tɨʼ ɨ! 17(Sa me lé elɛɛ nɨ, yé ó sa Da Yesʉs ndɨ akpɛl ɨ. É jɔʼ me lé edoʼo yi, me ekʉ lwib ó mpʉ gʉ!) 18É mpʉ yé ndɨ ó, bʉr é buobuo, bé edoʼo e bɨsyɛɛla bɨpuno byɔɔ ɛ, me nteme óbɛm doʼo e me mʉr tɨʼ nteme, 19ebe, bɨn, mɨpɨpɨʼ, bɨn bé emɛʼle lé edihbe bɨgʉ. 20Bɨn bé ebana dihbe mʉr lé edil bɨn é l'okomo e. Bɨn bé edihbe nteme, mʉr lé ede bɨpuno bin ɨ, le waa lé esà bɨn ɨ. Bɨn bé edihbe molɛɛ-nyʉl, le mʉr lé ejaa bɨn mompɛh ɛ. 21Yé esa me fwon lé emɛʼle ó, ecyɛʼ bé lé elwɨɨ-lwɨɨ me e la ɛ, lé ó b'a sa ó, me l'ayi jaa bɨn mompɛh maa!

Yé be ó, yé e nuu mʉr ndɨ e nkul edoʼo e yʉʉ syɛɛla e yʉʉ nɛʼɛ, mɛm nteme, me óbɛm doʼo e mbi syɛɛla ngwar e ngwar waa! (Me mu lwib naa ó mpʉ gʉ!) 22Zê bé ó bɨmpɛh bɨ Ebrœ ɛ? Me nteme, me ó ye! Zê bé ó bɨmpɛh bɨ Ɨzraɛl ɛ? Me nteme, me ó ye! Zê bé ó mpoŋbʉr mo Abraham ɛ? Me nteme, me ó mʉr tɨ! 23Zê bé ó osyɛl o mosa mo Krɨst ɛ? (Me ekʉ lwib ó mpʉ gʉ!) Mɛm ó ndɨ é bul laŋle é nko paʼ waa! É nko paʼ bɨsyɛɛ, mɛm ó ndɨ é bul laŋle. É nko paʼ egbaŋɔ é mbʉʼ, mɛm ó ndɨ é bul laŋle. É nko paʼ mobiʼe, yé abe e tolɔɔ. É nko paʼ efie, me a be ó si jʉŋɔ zɔʼ e zɔʼ. 24OYʉden, bé a si fuura me mɨmbihe zɔʼ tɛn, é jɔʼ yiyɛh mɨmbihe zɔʼ mowʉm molɛl e bu. 25Bé a si kahle me mɨmbɨŋ zɔʼ lɛl. Me a si lumɔ mokoʼ jɔʼ gwar. Zɔʼ lɛl, me a si pamla efie é jɔʼ byɛl wih, wé a dɨ é maŋ ɨ. Moho ntinɨ ndwe e pum ntinɨ, me a si tonbo é l'oboʼo o maŋ. 26Mɨ jaʼra e bɨcyen zɔʼ e zɔʼ. Me a be ó si duho é ka foo lé entaa montibe monɨnɨ. Me a si pamla efie é mobo bɨzilngan, le maa mo kul yam, le maa bɨkul bɨfih. Me a be ó si ngbaa jʉŋɔ é bɨnkana, ndwe é bɨlʉn. Me a be ó si jɨbla, ngbaa dwè é maŋ. Me a si pamla efie é mobo mo okristen o bɨkʉʉŋʉ.

27Me a si jaʼra e mɨtuutuu bɨsyɛɛ le mokɔbla. Me a si di é dia nkehe zɔʼ e zɔʼ, e za ndwe e dweh modibe. Me a si ja za zɔʼ e zɔʼ. Me a si joʼo ejyoo, le edi fufwah. 28Me aka gum láa byaa byʉʉ byɛɛ. Sa lé eka kable tɨʼ kʉ, yaa lé ebul pebre me é leme e, yé ó: dobo lɨlɛh, me esyɛl ba e mɨmbɛr mɨ Zyɛm mimyɛh. 29Yé be ó, nuu mʉr, nye é cyɛʼ nɛʼɛ, yé edwe me ecyɛʼ e nyʉl. Yé be ó, nuu mʉr, nyi kol mbuʼla ebɔʼ nye lé ebɨm é leme nɛʼɛ, yé egba me ediʼa e leme.

30Yé be ó, yé ekʉ jala ó, me doʼa e me mʉr tɨʼ nɛʼɛ, sa me ndɨ e nkul edoʼo e tɨʼ ɨ, yé ó ecyɛʼ lam. 31Zyɛm, waa ndɨ Sɔŋ mo Da Yesʉs ɨ, nye egʉa ó, me alɛɛ mpʉl. Nye e kum njʉmdia e njʉmdia. 32Ɨ nkana Damas, ngoman mo njwɨɨbʉr Aretas a be ó si dible mobe mo nkana yaa ó, nye naʼ ó me mobo é nyʉl. 33No ó, me a ntaa pɨpɨm nkana ó, bʉr ntɛŋ me é wina, filɔ me si é l'ekuro tʉŋlʉ é nteeen, ze pɔhba be e mobo.

Currently Selected:

2 Korɛnt 11: ozmBad

Highlight

Copy

Compare