1 Korɛnt 9

Nkul mojwɨ̀ʼa mo lʉmlʉ mo Yesʉs-Krɨst

1Zê me abe mʉr ndɨ é dia otî ɨ? Ntʉʼ me ndɨ lʉmlʉ mo Krɨst ɛ? Zê me a baasi bee Da Yesʉs ɛ? Ntʉʼ bɨn ndɨ mpumo a gumo, duho é syɛɛ me a sea é zi Tî ga wina ɛ? 2ǃƗ bʉr ofih si kɛla ó, me abe lʉmlʉ mo Krɨst nɛʼɛ, gʉŋa ga ó, me ó kʉ be lʉmlʉ we cyecye é nko paʼ win! Mpʉ bɨn mu é zyɛŋa win boo Da Yesʉs ɨ, bɨn mu ó dweʼle, sa ndɨ elɛʼle ó, me a si sea syɛɛ lʉmlʉ mo Krɨst.

3Bɨn bʉr o ndɨ ebee ó, bɨn bé e nkul elwib lɔb wam ɨ, mbi me lé ekomo nkar si ɨ, wé ó wi: 4Bé dɨʼe dwe bɨh mode e monwoʼ. Mode monɨ, mé ó dɔɔ. 5Bɨh e Barnabas, bɨh bé ejʉʼa ó, bɨh beʼ e bʉba ndɨ okristen ɨ, é jɔʼ bɨh bé óto é bɨcyen bih ɨ. Ntʉʼ syɛɛla yaa mɨlʉmlʉ mɨfih bé e l'obɨɔ mo Da ndwe e Sefas nye mʉr tɨʼ lé ebɛa sa-sa ɛ? 6Myʉʉ mɨlʉmlʉ, mi dweŋɔ nkul ó, bé filɨ mobo si, aka sea bɨsyɛɛ. Zê bɨh e Barnabas bé ome ó b'a baadweŋɔ nkul waa ɛ?

7Wáa mʉr bɨzima ndɨ esea syɛɛ bɨzima, nyɛɛ lé ejɛna nye mʉr tɨʼ mɔn ngɔn ɨ? Wáa mbèl motin mo orezɛŋ ndɨ ebè peme, ntɔʼ tìne mpumo ndɨ eka cyèl é motin maa ɛ? Wáa mʉr ndɨ ekoblo daa e bɨntœme mo nuu mʉr, ndɨ anʉa modibe monyaŋ, de me e? Yé abe e mʉr! 8Atoŋlo ga ó, mɨnkar myam, myé ebɔma ó, njɨ e myaa mɨ bʉr, ebe, lɔɔ ngwar me lé elɛɛ ɛ, wé ó tila nteme é motie mo Moyiz. 9Yé ó mpʉ yé ndɨ tila é motie mo Moyiz ɨ. Yé ó tila ó: «É jɔʼ ntɛɛ mu lé esea syɛɛ epɛʼ mɨlœla e mpʉn ɨ, apɨr ntɛɛ nʉm ó, yé l'ayi de.#9.9 Dwɛʼa Motie 25.4 ndwe e 1 Timote 5.18.» Zê Zyɛm, nye elɛɛ no ebe nkʉnkoo nye ejoʼo bɨntɛɛ ɛ? 10Zê nye a baalwib no é l'efu lɨh ɛ? É l'ocyecye, lwib yaa, yé a kʉ tilɔ ó, é l'efu lɨh! Yé ejala ó, mbèl mompœʼ bé e waa ólwal ɨ, bɨbɛh, bé sea ó, e mbɛla é mɨleme, ó bé óbi nkɔb mpumo wɔɔ. 11Bɨh o b'a sea é l'esama lɨn, mɨsisim min ntɔʼ dira nyɔm e syɛɛ yih yaa. Zê yé ó bwaʼbwaʼ sɔʼɔ ó, bɨh tœbɨ mobi mɨn ɛ? 12Bʉʉ bʉr pa taare be e nkul esa syɛɛla yaa é l'esama lɨn, a dwɛʼra e bɨh bɛɛ! Bɨh ó ndɨ e nkul ngwar waa é buobuo.

To kœb ó, bɨh bé a baadira nyɔm e nkul waa. Bɨh bé edihbe sa yiyɛh ó, lé ekpɛɛ ó, bɨh bé amu jaa gba bʉʉ bʉr mokɔbla é zi, bé l'aka koʼo lé ebuʼla Mbɨambɨa Lɔɔ mo Krɨst. 13Zê bɨn bé agʉa ó, opara ndɨ esea é Mpah Zyɛm ɨ, bé ebi sa ede yɔɔ tɨʼ ɛ? Zê bɨn bé lé ejeʼe ó, baa ndɨ ediʼ otir tɔɔ motwina ɛ, bé edwe Zyɛm ma é taa mɨndwɛa ye? Bé ede nuu nkɔb motwina maa, jala e nkɔb wɔɔ. 14É mbi waa ó Da Yesʉs a bɛa lɛɛ ɛ. Nye a lomo bʉr o ndɨ elɛɛ Mbɨambɨa Lɔɔ ó, bé biʼe tiʼ yɔɔ e we.

15Sa gwar, mɛm, me apa dira ba nyɔm e sa gwar me a jala le ebi ɨ. Me nteme, me atile bɨn mɨlɔb miʼ ó, me nkʉʼ taare lé edira nyɔm waa e bɨn. Yé a ngbaa bul mbɨa me ó, me dwèʼ, abe ó, bɨn jɛna me syɛɛ yaa. Nkʉ mʉr a be ó be, jɛna me syɛɛ yam bɨn ye nɛʼɛ, mpa mɨ fib zi lé edoʼo e syɛɛ yam! 16Mpʉ me lé elɛɛ Mbɨambɨa Lɔɔ ɛ, me abe lé esa no ó, me óbi zi lé edoʼo tɨ, ebe, me é mpila ó, me lɛŋɨ we. A vwaʼ e me, nkʉ me alɛɛ lɔɔ waa. 17Nkʉ me a be ó be, pɛh syɛɛ elɛɛ lɔɔ waa nɛʼɛ, mpa yé ó syɛɛ me lé ebono myɛna e tɨʼ ɨ. No ó, é mpʉ yé ndɨ ó, me a lomɔ ó loma, agban gbana syɛɛ yaa ɛ, me ekʉ lɛɛ lɔɔ we ó, é l'efu le eloŋlo syɛɛ me a timlɔ ɛ. 18No ó, myɛna mam, mé yé? Mé ó, me lɛŋɨ Mbɨambɨa Lɔɔ edwɛna. Me dam be lé elɛɛ Mbɨambɨa Lɔɔ, me apa dira nyɔm e nkul mojwɨ̀ʼa wam me ndɨ e nye e.

19Me dam be mʉr ndɨ é dia otî ɨ, me a si bana dwir me mʉr tɨʼ elʉa é nko paʼ mo mʉr nyiwɛh, ó me gʉa sea e nye. Yé eduho é gwɨma ó, me dula bʉr é buobuo. 20É jɔʼ me ndɨ esyɛŋa zi e l'oYʉden ɨ, me ekʉ nwɨɨla ó, e l'oYʉden, ó me dula be. Me dam be, abe é monkara mo mɛra motie, é jɔʼ me lé esyɛŋa zi e bʉr o ndɨ é nkara waa ɛ, me mu ó lé enwɨɨla ó, e waa ndɨ é nkara waa ɛ. Me esa no ó, me dula baa dina é nkara waa ɛ. 21É jɔʼ me ndɨ esyɛŋa zi e bʉr o ndɨ adu motie mo Moyiz ɨ, bɨh e boo nɔɔ, bé e l'ebò e cyen egwar. Yé anwɨɨla ó, me ó é monkara mo mɛra motie. Me esa no ó, me nkʉʼ dulo bʉr o bɨkul bɨfih onɨ. É l'ocyecye, me agwɨm dwih nyʉl wam é nkara motie mo Zyɛm, ebe, me ó é nkara mo Krɨst. 22É jɔʼ me ndɨ esyɛŋa zi e bʉr l'apa nʉa pim é buʼo e, me enwɨɨla ó, mpʉ bʉr l'apa nʉa pim é buʼo e. Me esa no ó, me nkʉʼ dulo be. Me esaa enwɨɨla e mɨmbi mɨ bʉr mimyɛh é l'efu le etiʼ bʉʉ bʉr. 23Me esa bɨsyɛɛla byaa bibyɛh ó, é l'efu le elɛɛ Mbɨambɨa Lɔɔ. Me esa no nteme ó, me nkʉʼ bi mombɨa mo tɨ, jala e nkɔb wam.

24Zê bɨn bé agʉa ó, yé é buo ofima é jwɨʼla mɨkam mokʉ ɛ? Ntʉʼ bʉr bɨbɛh lé epaʼlɔ mompɔʼ, njɨ mʉr ngwar. No ó, fimɨ ga, bɨn gaʼ, bi mompɔʼ! 25Bʉr o ndɨ efwɛmla ɛ, bé emɛr mɨleme é mɨlɔb é buobuo é l'efu ó, bé ntaŋa, bœrɔ mopʉʼlʉ ndɨ elaa mpʉ ngul mpaa ɛ. No ó, bɨna bɛɛ, bé esaa ga ó, bɨna biʼe ga myɛna mé ódi njʉmdia e njʉmdia ɛ. 26No nteme ó me ndɨ efim ɨ. Mih mam, mé ekʉ ka dwɛʼ ó njɨ fum bé a tulo njɨ kam ɨ. No nteme ó me ndɨ mpʉ mpaŋ ŋmɛha bɨkura ɛ. Me aŋmɛh bɨŋmɛhŋmɛh. 27Me ejwɨʼ nyʉl wam é buobuo. Me egba nye é dia olʉa. Me amu jaa fib mompɔʼ, mɛm, mʉr a bɛa lɛɛ bʉr Mbɨambɨa Lɔɔ ɛ.

Currently Selected:

1 Korɛnt 9: ozmBad

Highlight

Copy

Compare