1 Korɛnt 10

Syɛhla ga bɨbaŋabaŋa bɨdweʼle ndɨ mɨkpɛʼa ɛ

1Obɨɔ ga bam aa! Me egwɨm ó, bɨn gʉŋa sa yé a pyal é bɨmpam bih ɨ, é kpɛhla. Bé e boo Moyiz ó b'a kœʼ é nkur tʉŋlʉ. Bɨbɛh, bé a si ntaa Maŋ mo Akaa-e-kaa e mokʉ. 2Bɨbɛh, bé a si syɛŋa é Moyiz é jɔʼ bé e boo nɔɔ, bé a kœʼ é nkur tʉŋlʉ, le é jɔʼ bé a ntaa maŋ ɨ. Tɨʼ ó bé a ze nʉa ndubo é Moyiz ɨ. 3Mode mompwar Mbɨambɨa Sisim a dwe be e, bɨbɛh, bé a be ó si de me, 4bɨbɛh nyʉlɔ modibe mompwar Mbɨambɨa Sisim a dwe be e. Bé a nyʉl-nyʉl modibe ó, maa mé a gʉ-gʉ é l'ekoʼ Zyɛm a ntɨh be e. Ekoʼ laa, lé a be ó lé edu be zi e zi. No ó, ekoʼ laa, lé a be ó Krɨst. 5Dam be ó, bé a si nʉa ndubo é Moyiz, buobuo bʉr o sama yɔɔ, bé a baabe cɨcyel é mih mo Zyɛm. Ebe no ó bɨha, bé a sie lé edwè é feha si ɨ. 6Bɨsyɛɛla byaa, byé ó bɨna ga dweʼle, sa lé elɛʼle bɨna ga ó, bɨna l'ayi be ga e bɨbebebebe bɨgwɨma mpʉ bé a be e bye e. 7Yé ajala ó, bɨn bula dwiibɨ bɨbaŋabaŋa bɨdweʼle mpʉ bʉʉ bʉr o sama yɔɔ, bé a sa-sa ɛ. Yé ó mpʉ yé ndɨ tila é Kalara Zyɛm ɨ. Yé ó tila ó: «Bʉr, bé a be ó, ze diŋɔ si, deŋɔ mode, nyʉlɔ monwoʼ; mʉŋɔ si, bwalɔ mozɔɔ.» 8Bɨna l'ayi gba ga monyʉl lé esa bɨmala mpʉ bʉʉ bʉr o sama yɔɔ, bé a dɨ sa, to pyal é jɔʼ ebebe, lé a ka laŋle e. Bʉr otɔɔyin mowʉm moba e l'olɛl (23 000), bé ntɔʼ dwè é moho ngwar, lé ejala e syɛɛla yaa. 9Bɨna bé ajala le eboblo ga Krɨst, mpʉ bʉʉ bʉr o sama yɔɔ, bé a sa ɛ. Onyʉa ze lʉ be, bé ntɔʼ sie lé edwè. 10Atooro ga Zyɛm, mpʉ bʉʉ bʉr o sama yɔɔ, bé a dɨ tooro nye e, engles efie ntɔʼ jʉ be. 11Bé a bɔma e bɨsyɛɛla byaa ó, dweʼle yɔɔ, yé nkʉʼ bal bʉr, bʉʉ bʉr ze tile é lʉ wɔɔ é Kalara Zyɛm ó, bɨna liʼɨ ga lé epahle tɨ, ndwe le edweʼe sa bɨna mu lé ebee ga é l'esie e mbi jɔʼ yiʼ ɨ. 12No ó, mʉr lé ebuʼla ó, nye ó cɨcyel é lyanbe e, nye diʼe ncye, lé ekpɛɛ ó, nye amu jaa twe, aka mʉa! 13Mobʉbla bɨn bé a ntaa ɛ, mé epyal bɨn e bʉr bɨbɛh no. To kœb ó, Zyɛm, nye ó mʉr ebuʼla. Nye aŋa bir ó, bɨn boblɔ e mbi mobʉbla wé óntaa bɨn é nkul ɨ. É jɔʼ mobʉbla, mé ópyal-pyal bɨn ɨ, nye ókar bɨn zi fih. Bɨn bé òjyɛl tɨ, bɨn nteme l'aka sa bɨsyɛɛla bɨ ebebe bɨn bé a ngbaa sa ɛ.

14Ebe no, obɨɔ o kpɛl bam aa! Anyamle dwiibɨ ga bɨbaŋabaŋa bɨdweʼle. 15Me elwib e bɨn ó, mbi mʉr lé ejala le elwib e mɨpɨpɨʼ mɨ bʉr ɨ. Bɨn bʉr o tɨ, pahla ga sa me lé elɛɛ ɛ. 16Bele monwoʼ ga yina, yé nyá ɛ? Yé ó bɨna ga zi Zyɛm lé esʉ bɨna ga mocyɛʼ mo mpom me tɨʼ ɨ. Bɨna bé edwe ga nye ekiba é lɔb bele yaa. É jɔʼ bɨna mu lé enyʉl ga monwoʼ mo tɨʼ ɨ, bɨna bé esyɛŋa ga lé enʉa nkɔb é motié mo Krɨst. Bler bɨna lé epɛ̂ʼla ga é jɔʼ bɨna mu lé ede ga ɛ, tɨʼ ó bɨna lé esyɛŋa ga lé enʉa nkɔb é nyʉl mo Krɨst ɨ. 17Bler, yé ó njɨ gwar. Bɨna dam buo ga, bɨna ga bé yɛɛ ó nyʉl ngwar, ebe, bɨna ga bé ó e nkɔb e bler gwar.

18Bwa b'Ɨzraɛl, baa lé ebyɛl no é nko paʼ bɨpuno e, mbe ga mpʉ bé ndɨ ɨ. Bʉr o ndɨ ede nkɔb tir a diʼɔ é taa mɨndwɛa tɔɔ motwina ɛ, bé edi é zyɛŋa wɔɔ boo Zyɛm é zi edɨɨ laa. 19Yé me be lé egwɨm lɛɛ ɛ? Me alɛɛ ó tir a bàŋɔ é mpah bé ndɨ edwiibɨ bɨbaŋabaŋa bɨdweʼle e, nye a be ó si dweŋɔ nuu zyɛm é l'ocyecye. Me alɛɛ ó, bɨbaŋabaŋa bɨdweʼle ndɨ mɨkpɛʼa ɛ, byé ó ozyɛm. 20Me ekʉ lɛɛ ó nɛɛ: ntʉʼ Zyɛm bé lé edwiibɨ ɨ. Mɨndwɛa mɨnjeʼe-Zyɛm lé etiʼe e, myé edweŋɔ ó moleme. Me akpɛl ó, bɨn diʼe é zyɛŋa win boo bɨbaŋabaŋa bɨdweʼle byaa ebe ndɨa tir go. 21Bɨn bé abe e nkul ede bele monwoʼ mo Da Yesʉs le yaa moleme. Bɨn bé abe e nkul ede mode mo Da Yesʉs ndwe e maa moleme. 22Zê bɨna bé lé ejɨ ga ó, Da Yesʉs taara baʼ bɨna ga ɛ? Zê bɨn bé lé ebuʼla ó, bɨna ó ndɨ elaa ga nye é nkul ɛ?

Mʉr, nye ejala le esea ó, njɨ ebe kum mo Zyɛm

23Bʉʉ bʉr, bé elɛɛ ó: «Yé abe e syɛɛla ndɨ kɔmlʉ.» Yé ó no! Sa gwar, ntʉʼ sa yiyɛh ndɨ e nyɔm. «Yé abe e syɛɛla ndɨ kɔmlʉ.» Yé ó no! Sa gwar, ntʉʼ sa yiyɛh ndɨ e nkul elɨl bʉr é buʼo mbɨmbɨa. 24Mʉr beʼ l'asaa nyɔm we, wé ome. Mʉr saŋa sa ndɨ e nyɔm é l'efu e bʉʉ bʉr ɨ. 25Deʼ ga sa yiyɛh bé lé ebɛma é mompɛma ɛ, abe e tia é mɨleme min! 26Ebe, yé ó tila ó: «Si nwaʼ ndwe e sa yiyɛh ndɨ tɨʼ ɨ, byé egumo ó e Da.»

27ǃƗ mʉr ndɨ abe mbuʼla, si jebe go ó, go toʼ, to de dina é mbɛr we nɛʼɛ, ǃgo si mɛʼle to nye ye wa, deʼ sa yiyɛh nye ódwe go e, abe e tia é leme go. 28ǃƗ mʉr si ka gwih e go ó: «Tir nwaʼ kʉ bàŋɔ muh ó, é mpah bé ndɨ edwiibɨ ozyɛm bé a dɨ kpaʼ» nɛʼɛ, gwɔɔ bene. Go ejala le ebir tir waa l'adeŋɔ é l'efu le ecwɨa e mʉr a gwih go lɔb waa ɛ. Go ejala le esa no ebe mɨpɛhla mɨ leme. 29Me alɛɛ ó, go saʼ no ebe mɨpɛhla mɨ leme go. Me ekʉ lɛɛ ó, go duʼo myaa mɨ leme mo nyiha mʉr. Zê yé ó cɨcyel é jɔʼ mʉr lé edwe me mobe é lɔb bɨsyɛɛla me lé esa ngbàa me mu é dia otî ɨ? 30ǃMe si dwe Zyɛm ekiba é lɔb sa me lé ede nɛʼɛ, bʉr bé ajala le efœʼ me é lɔb ndɨa mode waa, mɛm yɛɛ si kʉ dwe Zyɛm ekiba tɨ!

31Ebe no, bɨn dam de mode nkʉ nyʉl monwoʼ, nkʉ bɨn dam sa yaa sɔʼɔ: saʼ ga syɛɛla yaa yiyɛh é l'efu le edwiibɨ Zyɛm tɨ! 32Kœʼœ ga mpaŋ ebò e cyen é mbi ndɨ ó, bɨn l'ayi ka sa syɛɛla ndɨ ekol oYʉden ebɔʼ lé ódumo be e. Syɛhla ga nteme syɛɛla ndɨ ekol bʉr o bɨkul bɨfih ebɔʼ lé ódumo be e. Akol bʉr o Mbɛr-Zyɛm ebɔʼ lé ódumo be e. 33Saʼ ga mpʉ me. Me egba nyʉl ó, bʉr bɨbɛh, bé kpɛlɨ me é sa yiyɛh me lé esa ɛ. Me asaa nyɔm wam, njɨ waa buobuo bʉr, ó bé biʼe tiʼ molu mo mpoʼ mɨmɛh.

Currently Selected:

1 Korɛnt 10: ozmBad

Highlight

Copy

Compare