1 Korɛnt 13
13
1Me dam lwib bɨlwib bɨ bʉr, nkʉ byaa beengles. ǃMe baabe e kpɛl nɛʼɛ, kʉ gʉa ó, me mu ó mpʉ tuʼ engʉŋa lé eduo e, nkʉ mpʉ bɨnkala lé elwaŋla ɛ. 2Me óbɛm nolɔ bɨntɔɔ bɨ egwih mɨlɔb myé ósyɛɛlɨ ɨ, le byaa bɨ epɛʼle lwib odim yiyɛh, le byaa bɨ egʉa sa yiyɛh. Me óbɛm be e buʼo é mbi ndɨ ó, me pɛʼɛ mocwɨʼ é bɨcye byɔɔ ɛ. Sa gwar, ǃme baabe e kpɛl nɛʼɛ, gʉa ó, me abe sɔʼɔ. 3Me óbɛm kab mobi mam mɨmɛh, nkʉ kɛha nyʉl wam. ǃMe si sa no, me l'abe e kpɛl nɛʼɛ, me l'adira ba nyɔm e bɨsyɛɛla bɨnɨ. 4Kpɛl, yé e bihbe le ncwɨncwɨa. Kpɛl, yé abe e l'egu. Yé ákwoʼ seʼle yé mʉr tɨ. Yé abe e nkɛa nyʉl. 5Yé asa ó, mʉr lama fwon. Yé asaa sɔʼɔ, njɨ nyɔm we. Yé abe é bul duo leme. Yé ákwoʼ niʼe bɨbaa bɨ ebebe, ntɔʼ baʼle é leme we. 6Mʉr ndɨ e kpɛl ɨ, nye abe lé esʉna é jɔʼ nuu mʉr lé esa bɨsyɛɛla bɨ ozyɛhozyɛh ɛ. Nye ekʉ ka mɨɨla ó njɨ e bɨsyɛɛla bɨ ocyecye. 7Kpɛl, yé edime mih e bɨsa bɨ ebebe bibyɛh. Mʉr ndɨ ekpɛl bʉʉ bʉr ɨ, nye ó ndɨ e nkul ebuʼla bɨsa byɔɔ bibyɛh. Leme we, wé lwɨŋla e mbɛla ó, é jɔʼ yiyɛh. Kpɛl, yé edihbe sa yiyɛh.
8Kpɛl, yé ásie. Mɨlɛa mɨ ogwiha o mɨlɔb myɛɛ, myé ósie. Bʉr o mu lé elwib bɨlɔblɔb ɨ, bé ógwaʼ lé esa no. Ngwɨa bʉr, bé a taare be e we e, wé ósie. 9Ebe, bɨna bé ekʉ gʉa ga ó, njɨ peh. Bɨna bé egwih ga mɨlɔb mo Zyɛm ó, njɨ peh, asil. 10É jɔʼ bɨsa bibyɛh, byé óbe si kumo é l'ombɨmbɨa é mɨpaʼ mimyɛh ɛ, nye ópɛʼ yaa yé a be-be peh e.
11É jɔʼ me a be mancyom ɨ, taare é bɨlwib byam, ndwe e bɨjwɨʼ byam, to pyal é mɨpɛhla myam, byé a be-be ó byaa bɨ oncyom. É jɔʼ me a duho é cye mancyom, nʉa cye tamamʉr ɨ, yé ó me a ka ze bir bɨsyɛɛla bɨ oncyom byaa ɛ. 12No ó, banana, sa bɨna lé ebee ga ɛ, yé é mih ga mɨna ó, é dimlɨ-di-dimlɨ. Yé ó mpʉ dweʼle lé enyin é l'enyin ɨ. É jɔʼ sa ndɨ ntinɨ mu si pyal ɨ, bɨna bé óbɛɛla ga mompom. Banana, me dina lé egʉa ó ba bim. É jɔʼ yaa ó me ófuʼla gʉa sa yiyɛh é kpɛhla ɛ, du mpʉ Zyɛm lé ebɛa gʉa me é kpɛhla ɛ.
13No ó, banana, buʼo e mbɛla ndwe e kpɛl, byé ó tɨ: bɨsa bɨlɛl. É bɨsa bɨlɛl byaa, yaa lé elaa bibyɛh ɛ, yé ó kpɛl.
Currently Selected:
1 Korɛnt 13: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
