1 Korɛnt 12
12
Bɨntɔɔ Zyɛm lé edwe bwan be e
1Obɨɔ ga bam aa! Me akpɛl ó, bɨn jeʼa lɔb bɨntɔɔ Zyɛm lé enol bɨna ga ɛ. 2Bɨn bé egʉa ó, é jɔʼ bɨn bé a be mɨnjeʼe-Zyɛm ɨ, bɨn bé a be ó lé edwiibɨ bɨbaŋabaŋa bɨdweʼle, bibyɛh njɨ bɨgʉ́ʼ e bɨgʉ́ʼ! É til jɔʼ yaa, bɨsa bɨ ozyɛm baa, bé a yɨm bɨn ó, bɨn saʼ syɛɛla yiyɛh bé a kpɛl ɨ. 3No ó, me mu ó lé eze tɨe bɨn é nko paʼ waa: mʉr ndɨ elwib é zi Sisim mo Zyɛm ɨ, nye abe e nkul elɛɛ ó: «Yesʉs, nye e bɨkɔ́ɔlʉ!» Ndwe nteme, ǃɨ Mbɨambɨa Sisim be l'abe é mʉr tʉŋlʉ nɛʼɛ, kʉ gʉa ó, mʉr waa, nye abe e nkul elɛɛ ó: «Yesʉs ó ndɨ Tî!»
4Yé é buo mɨmbi bɨntɔɔ Mbɨambɨa Sisim lé enol bɨn ɨ. Sa gwar, Sisim wɛɛ njɨ ngwar. 5Yé é buo mɨmbi bɨsyɛɛ bɨna lé esea ga ɛ. Sa gwar, bɨna bé esea ga bɨsyɛɛ byaa ó, é l'efu e Njwɨɨ ngwar. 6Yé é buo mɨmbi bɨsyɛɛla Mbɨambɨa Sisim ndɨ e nkul esa é zi bʉr ɨ. To kœb ó, Sisim ngwar e ngwar waa ó lé esa bibyɛh é bʉr be bɨbɛh. 7Mʉr nyiwɛh, nye e bɨntɔɔ Mbɨambɨa Sisim a nol nye ó, nye toʼ, to gul bʉr e bya ɛ. 8Mbɨambɨa Sisim, nye enol nwaʼ mʉr bɨntɔɔ ó, nye diʼe e l'ocyoo é lwib. Nye enol nuu mʉr bɨntɔɔ bɨ ngwɨa é bɨsa nye lé elwib ɨ. 9Nye enol nwaʼ mʉr bɨntɔɔ bɨ buʼo; nol nuu mʉr bɨntɔɔ bɨ etiʼ mɨsyoblʉ. 10Nye enol nwaʼ mʉr bɨntɔɔ bɨ esa mosima; nol nuu mʉr bɨntɔɔ bɨ egwih mɨlɔb mo Zyɛm. Nye enol nuu mʉr bɨntɔɔ bɨ egʉa mɨmbɛʼ paʼra moleme bé e Mbɨambɨa Sisim. Nye enol nuu mʉr bɨntɔɔ bɨ elwib bɨlɔblɔb. Nye enol nuu mʉr bɨntɔɔ bɨ edwir bɨlwib byaa. 11Yé ó e mʉr ngwar ó ndɨ esa bɨsyɛɛla byaa bibyɛh: Mbɨambɨa Sisim. Nye enol mʉr nyiwɛh bɨntɔɔ ó, mpʉ nye lé ekpɛl ɨ.
Nyʉl ngwar, bɨfum bɨ nyʉl é buobuo
12Krɨst, nye ó mpʉ nyʉl mʉr. Nyʉl, nye ó sa gwar, nye yɛɛ e bɨfum bɨ nyʉl é buobuo. Nye dam be e bɨfum bɨ nyʉl é buobuo, nyʉl waa, nye ó njɨ ngwar. 13Bɨna ga bɨbɛh bé a si nʉa ndubo ngwar, ntɔʼ ka di nyʉl ngwar é zi Sisim ngwar. Sisim ngwar ó b'a ze di é mɨleme ga mina. Bɨna ga bé ó jwɨʼ gwar yaa, mʉr dam be Yʉden, nkʉ mʉr kul fih, nye dam be elʉa, nkʉ mʉr ndɨ é dia otî ɨ.
14Nyʉl, nye abe njɨ fum nyʉl gwar. Nye ó bɨfum bɨ nyʉl é buobuo. 15ǃƗ kʉ si lɛɛ ó: «Me abe mbo. Ebe no ó me ndɨ, abe fum nyʉl» nɛʼɛ, wé aŋa di, abe fum nyʉl ebe no. 16ǃƗ egwal si lɛɛ ó: «Me abe dih. Me abe fum nyʉl» nɛʼɛ, lé aŋa di, abe fum nyʉl ebe no. 17Nkʉ nyʉl be ó be, be njɨ dih e dih nɛʼɛ, mpa nye be ó, l'aka joʼo bɨduu. Nkʉ nye be ó be, be njɨ egwal le egwal nɛʼɛ, mpa nye be ó, l'aka joʼo monumo. 18É l'ocyecye, Zyɛm a gba bɨfum bɨ nyʉl bibyɛh é nyʉl ó, mpʉ nye a kpɛl ɨ. 19Nkʉ nyʉl a be ó be, be njɨ fum nyʉl gwar nɛʼɛ, mpa bɨna bé aka lwib ga é lɔb «nyʉl». 20Bɨfum bɨ nyʉl, byé ó é buo, nyʉl nyɛɛ yɛɛ ngwar. 21Dih, lé abe e nkul elɛɛ e mbo ó: «Me agwɨm sɔʼɔ e go.» Lʉ, wé abe e nkul elɛɛ e mokʉ ó: «Me agwɨm yʉʉ sɔʼɔ e bɨn.» 22To kœb ó, bɨfum bɨ nyʉl bɨna lé ecyɛl ga ɛ, byé abe e nkul edi, abe. 23Bɨfum bɨ nyʉl bɨna lé ebul bee ga ó, byé ó, abe e duu ɨ, byé ó bɨna lé elaŋle komlo ga, laa byʉʉ ɨ. Bɨfum bɨ nyʉl lé esa bɨna ga fwon ɨ, byé ó ndɨ ebula buurɔ e mɨmpaŋ mɨkan. 24Byaa ndɨ asa bɨna ga fwon ɨ, byé agwɨm buurɔ e sɔʼɔ. Zyɛm a dira bɨfum bɨ nyʉl ó, lé edwe fum nyʉl ndɨ esa bɨna ga fwon ɨ, modile. 25No ó, mpɔʼa monkɔm, nye abe é nyʉl. Bɨfum bɨ nyʉl bibyɛh, byé ecwɨɨla paʼra wɔɔ. 26ǃƗ fum nyʉl gwar si bi tuu nɛʼɛ, byʉʉ bibyɛh, byé ósia e tuu waa nteme. ǃƗ yʉʉ fum nyʉl si dweŋɔ modile nɛʼɛ, bé e byʉʉ bɨfum bɨ nyʉl bibyɛh, byé ósoho.
27Bɨn bɨbɛh, bé ó nyʉl mo Krɨst. Mʉr nyiwɛh ndɨ é l'esama lɨn ɨ, nye ó ndɨ fum nyʉl waa. 28No ó, Zyɛm a cyel bʉr é Mbɛr-Zyɛm ó, é mbi wi: é cye efoʼ, mɨlʉmlʉ; é cye mba, ogwiha o mɨlɔb; é cye lɛl, oyeʼle o mɨlɔb mo Zyɛm. Pie tɨ, nye a si cyel osyɛl o mosima be e bʉr nye a nol bɨntɔɔ bɨ ejomo bʉr ɨ, ndwe e baa nye a nol bɨntɔɔ bɨ efuʼo mɨnjyebnjyeb ɨ, kɛl baa nye a nol bɨntɔɔ bɨ ejwɨʼ bʉr o mbɛr Zyɛm ɨ, bé e baa nye a nol bɨntɔɔ bɨ elwib bɨlɔblɔb ɨ. 29Ntʉʼ bɨbɛh ndɨ mɨlʉmlʉ, nkʉ ogwiha o mɨlɔb, nkʉ oyeʼle o mɨlɔb mo Zyɛm, nkʉ osyɛl o mosima, 30nkʉ bʉr o ndɨ etiʼ mɨsyoblʉ ɨ. Ntʉʼ bɨbɛh lé elwib bɨlɔblɔb, nkʉ dwir sa bʉr lé elɛɛ é zi bɨlwib byaa ɛ. 31Gwɨmɨ ga mɨndwɛa lé ejala le ebul dweŋɔ modile e.
Kpɛl
Me muno ze lɛʼle bɨn zi fih, zi ndɨ elaa mozi monɨ mɨmɛh lé embɨa ɛ.
Currently Selected:
1 Korɛnt 12: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
