Milʉ́mlʉ́ 27

Pɔ̂l lɨ́ etyenɔɔ̌ Rôm

1Jɔʼ nyé á kam ó, bɨ̌h e nɔ́ɔ́ tôʼ ɨ́ sitíma ɨ́ sí Italî yɨ́, bê nzě tyěn Pɔ̂l, bé e myúú mímbʉʼ miswîh, e nyʉ́ʉ́ kapitɛ̂n, díé lé Yʉlíos. Sɔ́má bísója bí Rôm yé, yé á be ɨ́ jwɨ́ɨ́ yé yɨ́, yé á jébɔɔ ó: “Sɔ́má bísója mé Kɛ́ɛza”. 2Nó ó bɨ́h á kalwo ɨ́ sitíma yé á duhǒ Adramît yɨ́. Yé ó b'á jala le etô lɨ́ ebʉ́m é sí Azía. Arîstark, mʉr Masedónia á duhǒ Tesaloníka nyá, á be ntémé ó, ɨ́ sɔ́má yɨ́h. 3Ɨ́ mɛ́n tɨ̂, bɨ̌h bé á be ó sí tó pyâl Sidɔ̂n. Nó ó, Yʉlíos á be ɨ́ nʉǎ Pɔ̂l mbɨ̂mbɨá, le ebîr ó, nyɨɛ tôʼ kwá osó bé. Jáŋá, bé ósúʼo nyé ɨ́ tyen. 4Bɨ̌h nzě mɔa tɨ̂, cɨɨ témé mâŋ. Pubó kʉ́ nzě kamle bɨ́h lɨ́ ecɨɨ ntɨ̂n. Sá tɨ̂ʼ ó bɨ́h á ka cɨɨ ɨ́ nkǒ páʼ tíhé Swiprʉ̂s, wé á kamle e bɨ̌h e nkúo wɨ́ yɨ́. 5Jɔʼ bɨ́h á sil entaa mâŋ me dí ɨ́ kúnwo e sí Silisía le yaá Pamfilía má yɨ́, bɨ̌h nzě pyâl ɨ́ Míra, dí ɨ́ sí Lísia yɨ́. 6Gʉ̂ʼ ó kapitɛ̂n á bee sitíma yé á duhǒ Alɛksandrî yɨ́, yɨ́ɛ lɨ́ etô sí Italî. Nye nzě kɛl bɨ́h tɨ̂.

7Bɨ̌h nzě tô le etye ɨ́ sitíma twîtwǒʼ twîtwǒʼ, melû ɨ́ buo buo. Bɨ̌h bé á ka kúnwo e Kanídus ó, píe mitúú ɨ́ buo buo. Ɨ́ mpʉ̌ pubó, yé á be lɨ́ elôʼlo bɨ́h ó, bɨ̌h ayɨ́ tô ká ká ɨ́ nzɨ̌ nyaá yɨ́, bɨ̌h bé á ka cɨɨ ó, ɨ́ tíhé mâŋ dí ɨ́ Salmóne wɨ́, ó bɨ̌h tô pyâl ɨ́ tíhé Krɛ̂t. 8Bɨ̌h bé á si bu bi mitúú ɨ́ jɔʼ bɨ́h á be lɨ́ etô dóló le ekpâh tíhé yɨ́. Bɨ̌h nzě pyâl ɨ́ lʉ́ʉ́ ébʉ̂m, díé tɨ̂: “Mbɨambɨa ebʉ́m é bísitíma”. Yé á be ɨ́ kúnwo e Lasê.

9Bɨ̌h bé á si dímle jɔʼ ɨ́ buo buo. Yé á si sâ bɨ̌h bʉ́á ɨ́ jɔʼ yaá, lɨ́ etô ɨ́ sitíma, ebě, Móhó-éjâ-nzâ, wé á be ó sí boó laa. Sá tɨ̂ʼ ó Pɔ̂l á cɨ̂l bʉr ó sitíma e mekǎn mâʼ yɨ́, ó: 10«Odâ, mě beé ó, tyen yɨ̂, yé ɨ́ kɔbla, ebě, sitíma, ndu e sá yɨ́yɛ̂h dí tɨ̂ʼ tʉ́ŋlʉ̌ yɨ́, byé ódîm. Ndu e ntémé ó, mɨná bé óbɛ̌m dímle gá bicwiʼ gá bíná, mɨná bʉr o tɨ̂.»

11Sâ gwár, kapitɛ̂n bisója bí Rôm nyɨɛ á bu kam ó, lɔ́ɔ́ mé ndûl sitíma, ndu e waá mé kúm sitíma, laǎ lɔ́ɔ́ mé Pɔ̂l. 12Mpʉ ébʉ̂m, lé á be ambɨa ɨ́ jɔ̌ʼ kóló yɨ́, nó ó bʉ̂r ɨ́ buo buo, bé á be ɨ́ sitíma tʉ́ŋlʉ̌ bá, bé á kam ó, bé mɔ́aa tɨ̂, tô e tyen dóló yɨ́. Bé á bee ó, yé óbána nó, bé ɨ́ jala le epyâl ɨ́ Feníkas. Ebʉ̂m laá, lé ó gúmó bʉ̂r dí ebuú gwɨ̂m étó lɛ̌ŋ kóló yɨ́. Lé á be ó, ɨ́ tíhé Krɛ̂t. Lé á dwɛ̂ʼ ó, nko dʉ́o dí ejâ yɨ́.

Nkúo-mbɛ́ʼ-mímbû lɨ́ ekwoolo ɨ́ mâŋ

13Jɔʼ mâ pubó á taare epublo lɨ́ eduhǒ díbé tie yɨ́, bé á nyɛɛ jwɨʼ ó, bé óbɛ̌m dirǎ lɔ́ɔ́ wɔ́ɔ́. Bé ntɔ̂ʼ pɛ̌ʼ nkóho yé á mɛ̂r sitíma yɨ́, bê nzě tô le ekpâh pɨ̌n tíhé Krɛ̂t. 14Sâ gwár, agúm bea nɛ́ɛ: nkúo-mbɛ́ʼ-mímbû kʉ́ nzě kwoolo e nkul duho ɨ́ nkǒ páʼ tíhé. Bé á jɨjébe nkúo nyaá ó, “Nkúo dí eduhǒ páʼ díbé kʉ́ le nko dʉ́ó dí ejɨma yɨ́”. 15Jɔʼ nkúo nyaá á mɛ̂r sitíma yɨ́, yé á be ɨ́ lele lɨ́ emɛ̂r yé ó, nkúo ayɨ́ lôʼlo yê. Bɨ̌h bé á jaa ka bîr ó, nkúo tôʼ e bɨ̌h ɨ́ nko nyé á be lɨ́ etô yɨ́. 16Jɔʼ bɨ́h á pyâl ɨ́ gúú tíhé mâŋ, dí e díe ó, Kawʉ́da wɨ́ yɨ́, sitíma nzě laa ɨ́ páʼ tíhé díbé tie. Bɨ̌h bé á si sia e mitúú ɨ́ buo buo lɨ́ etyeele mâ byɛ̂l ɨ́ sitíma. 17Bé ntɔ̂ʼ pɛʼ mâ byɛ̂l waá ɨ́ medíbé, bɨ̂r nyé ɨ́ sitíma tʉ́ŋlʉ̌. Bê nzě kâʼ sitíma e mikǒl ó, myé díraa mebɔ́m mé tɨ̂ʼ ɨ́ kpɨ́ɨ́ɨ́. Ɨ́ mpʉ bé á kpɛ́ɛ ó, bé ámû tó mɛ́ʼa ɨ́ mepum mé ósɨ́ǎ me dí ɨ́ pɨ̌n Sírti má yɨ́, nó ó bé á sul sá dí emɛ̂r sitíma yɨ́ ɨ́ medíbé, ó yé ayɨ́ kǎ tye kám e kám. Nkúo nzě kǎ tʉ̂to e bɨ̌h gúmó yɨ́yɛ̂h nyé á tʉtô yɨ́. 18Nó ó, nkúo á bu ntyeŋ bɨ̌h e nkul, mbi dí ó, ɨ́ mɛ́n tɨ̂, bê nzě táare éguho mímbeʼ bísâ ɨ́ medíbé. 19Ádwií ɨ́ móhó lɛ̂l nɛ́ɛ: odûʼ ó sitíma, bé ntɔ̂ʼ guho ókuluu le bisá bí sitíma ɨ́ medíbé e mebó mɔ́ɔ́ bé bʉr o tɨ̂. 20Ɨ́ melû ɨ́ buo buo, bɨ̌h á bé abe e nkul ekǎ bee nkʉ̂ dʉ́o, nkʉ̂ twítwén. Nkúo á kwoolo ó, ɨ́ bea bea, ndu e ntémé nkul e nkul. Bɨ̌h bé á bé akǎ bûʼla ó, bɨ̌h bé ókǎ tiʼe.

21Baá bé á be ɨ́ sitíma bá, bé á si lɛŋ jɔʼ ɨ́ bea bea, ade. Nó ó, Pɔ̂l á nze tyɛ̂b tîtyěl ɨ́ mpǒm nyɔ́ɔ́. Nye ó: «Jyɛɛ́ yâm, yé á kʉ jala ó, bɨ̌n jóʼaa me ɨ́ jɔʼ mé á boo lɛ́ɛ e bɨ̌n ó, bɨ̌n ayɨ́ pɔʼǎ tíhé Krɛ̂t yɨ́. Mɨná bé á gwa be gá ɨ́ jɔʼ yaá ó, mbɨ̂mbɨá, akǎ dímle bísɔ̂ʼ ɨ́ buo buo. 22Nó ó, ɨ́ báánâ, mě lɛ́ɛ́ bɨ́n ó: mɨná díʼee gá e menyan ɨ́ miléme, ebě, abe e mʉr ngwár ódwe ɨ́ mâŋ. Sitíma, yé omér ó ngá jaá dîm. 23Ebě, ɨ́ pum wɨ̂ʼ mûh, éngeles mé Nzyɛ̌m, mʉr mé dí egúmo e né, waá mé dí eséǎ syɛ́ɛ́ yé nyá, nye sí nzě gúmó mê bé yɨ́. 24Nó ó nyê lɛ́ɛ́ e me ó: “Pɔ̂l, ajóʼo bʉ́á. Yé jala ó, go tôʼ tyɛ̂b ɨ́ mpǒm mé Kɛ́ɛza. Nzyɛ̌m ótiʼ bʉ̂r bɨ́bɛ̂h o bɨ́n le onɔ́ɔ́ dí ɨ́ sitíma bá, ɨ́ kpɛ̌l nyé dí ekpɛl gó yɨ́.” 25Nó dyɛɛ́ yâm ɛ̌, diʼee gá e menyan ɨ́ miléme, ebě, mě e búʼó e Nzyɛ̌m ó, sâ yaá yɨ́yɛ̂h, yé ósyɛ́ɛ ɨ́ mpʉ nyê lɛ́ɛ́ mé yɨ́. 26Sâ gwár, mɨná bé ɨ́ jala le esyel gá sitíma ɨ́ lʉ́ʉ́ ébʉ̂m ɨ́ gúú tíhé mâŋ.»

27Yé á be ó, yé mû témé pum, bɨ̌h bé osí lɛŋ mélû kám e menâ ɨ́ nkúo nyaá. Nó ó nkúo á lôʼlo bɨ̌h, tô e bɨ̌h ɨ́ mâŋ Adriatique má. Kúnókúno e témé pum nɛ́ɛ: odûʼ ó sitíma, bê nzě jwɨʼ ó, bé á be ó, bé mû lɨ́ ekúnwo e yʉ́ʉ́ sí swîh. 28Nó ó bé á tyen jwɨʼ ɨ́ mâŋ. Nó ó bé á bee ó, medíbé, mé á be ó, mé dína ɨ́ díme, tâŋ oméra mekám mélɛ̂l e nzaangbá. Nó bé á lɛŋ mâ jɔʼ, bé ntɔ̂ʼ báʼǎ tyěn jwɨʼ, nzě beɔɔ ó, yé á be ó, yé mû oméra mekám mébá e mwom, lɨ́ etô sí. 29Bé á kpɛ́ɛ ó, sitíma yɔ́ɔ́, yé ámû jaá mɛ́ʼa ɨ́ mekóʼ. Sá tɨ̂ʼ ó bé á guho binkóho binâ byé á mɛ̂r sitíma bí, ɨ́ medíbé yɨ́. Píe tɨ̂, bé á jaa ka gwɨgwɨ̂m ó, njɨ mɛ́n, wé lɔ́maa. 30Nó ó, odúʼ ó sitíma, bé á be ó, lɨ́ edǐ kpɛ́ɛ, líʼɔɔ̌ sitíma. Bê nzě sul mâ byɛ̂l ɨ́ medíbé, sâ mpʉ̌ sá lɛ́ɛ́, bé guho ó binkóho ɨ́ mâŋ tʉ́ŋlʉ̌, ɨ́ páʼ émpǒm é sitíma dóló. 31Nó ó, Pɔ̂l á lɛ́ɛ e kapitɛ̂n ti e byúú bísója ó: «Bʉ̂r bâ, bé adi ɨ́ sitíma yɨ̂ʼ tʉ́ŋlʉ̌ nó, lɛ́ɛ́, mɨná bé abe e nkul etiʼe gâ.»

32Jɔʼ yaá ó bísója, byé á tíʼe mikǒl myé á mɨmɛ̂r byɛ̂l mí, ntɔ̂ʼ bírɔɔ nyé ó, nye tôʼ.

33Jɔ̌ʼ mɛ́n, wé á be, wé mû lɨ́ elɔ́ma yɨ́, Pɔ̂l nzě lɛ́ɛ e bʉr bɨ́bɛ̂h ó, bé dêʼ mede. Nye e bé ó: «Paá bee gâ: yé mû múh ó, melû kám e menâ, bɨ̌n l'adě sɔ̂ʼ, njɨ ɨ́ mpʉ̂n, pyâl pyáláa ɨ́ báánâ, bɨ̌n adě sɔ̂ʼ. 34Nó ó mé dí elɛ́ɛ e bɨ̌n ó, bɨ̌n dêʼ mede yɨ́, ebě, bɨ̌n bé lɨ́ egwɨ̂m ó, bɨ̌n tíʼaa. Mʉr ngwár ɨ́ sɔ́má yɨ́n, nye ádímlě damá be ó mpuo lʉ́ yé gwár.

35Jɔ̌ʼ Pɔ̂l á sil elɛ́ɛ bé nó yɨ́, nye nzě nʉǎ blêr, nzě dwě Nzyɛ̌m nzyǒo, mʉr nyɨnyɛ̂h lɨ́ ebee. Nye nzě pɛ̂ʼ yê, ntɔ̂ʼ táare éde. 36Nó ó, bɨ́bɛ̂h, bé á nze bi nkul ɨ́ miléme. Bɨ́bɛ̂h nzě de. 37Bɨ̌h bé á be ɨ́ sitíma tʉ́ŋlʉ̌ ó, bʉr minter mimbá e mekám nzaangbá le bʉr ósaman. 38Jɔʼ bɨ́h á de bím yé á jala ó, bɨ̌h dêʼ yɨ́, bê nzě guho bímpubuʼó méde ɨ́ medíbé, lɨ́ esáa ó, sitíma, yé dwɛ̂hwaa.

Búhó sitíma ɨ́ mâŋ

39Jɔ̌ʼ mɛ́n wé á lɔ́ma yɨ́, odûʼ ó sitíma, bé á bé adweʼě sí bé á be tɨ̂ʼ yɨ́. Bê nzě bee ébʉ̂m le mepum mé ósɨ́ǎ, ntɔ̂ʼ jwɨʼ ó, bé óbɛ̌m syěl sitíma yɔ́ɔ́ tɨ̂. 40Sá tɨ̂ʼ ó bé á tíʼe mikǒl myé á mɨmɛ̂r sitíma gúmo gwár mí, líʼɔɔ bínkóho bi tɨ̂ʼ ɨ́ medíbé yɨ́. Jɔʼ yaá ntémé ó bé á tii mikǒl myé á sɨsâ ó, sitíma dwíraa mí. Bé ntɔ̂ʼ tyeelě péh kán ɨ́ sitíma. Nó ó bé á tyen empǒm é sitíma nko ébʉ̂m laá. 41Sâ gwár, bé dína apǎ kumo ɨ́ pɨ̌n, bé ntɔ̂ʼ mɛ́ʼa ɨ́ lʉ́ʉ́ épum lé ósɨ́ǎ lé á be ɨ́ medíbé lɨ́, nzě bil tɨ̂. Páʼ émpǒm é sitíma nzě nî lɨ́ osɨ́ǎ sí, akǎ be e nkul epɨ̂ʼla. Enzuʼ é sitíma lɨ́ɛ, ntɔ̂ʼ jaá bʉ̂l bʉ́lɨ́ɨ ɨ́ lɔ̌b nkûl obóʼó.

42Bisója, byé á be ó lɨ́ edǐ jʉ̂ mímbʉʼ, ebě, bé á be lɨ́ ekpɛ́ɛ ó, mimbʉʼ, myé ámû kpɛ́ɛ e nzɨ̌ medwâʼ. 43Nó ó kapitɛ̂n á tíʼe ɨ́ lémé wé ó, nyě kamlé ó e twiʼ mé Pɔ̂l. Nye nzě kamle bé lɨ́ esâ mpʉ bɨ́ɛ, bé á tíʼe ɨ́ milémé myɔ́ɔ́ ó, bé sá ó nye yɨ́. Nó nyé á lɛ́ɛ e bé ó, baá bɨ́bɛ̂h bé á be e nkul edwâʼ bá, bé lyáhaa ɨ́ medíbé esôʼ, tóŋɔɔ tín. 44Nye e bʉ́ʉ́ bʉ̂r ó, bé dúʼaa, lɨ́ emɛ̂r mébɔ́m, nkʉ̂ bipéh bí sitíma. Nó yaá ó bɨ́bɛ̂h, bé á kumo tín, sɔ̂ʼ asâ bé yɨ́.

Currently Selected:

Milʉ́mlʉ́ 27: ozm

Highlight

Copy