Milʉ́mlʉ́ 20

Tyen mé Pɔ̂l ɨ́ sí Masedónia le yaá Grɛ̂s

1Jɔʼ bíntʉ̌ byé á síe yɨ́, Pɔ̂l nzě jébe ómpʉ́n mé Yésʉs, nzě gbâ bé nkul ɨ́ nyʉ̂l. Nye ntɔ̂ʼ jána e bê, mɔa, tô ɨ́ sí Masedónia. 2Nó ɨ́ jɔʼ nyé á be lɨ́ entaǎ sí yaá yɨ́, nye á be lɨ́ etô le egbâ bɨ́ɔɔ́ bɨ́ná nkul ɨ́ miléme, ɨ́ buobuo metwɨ́ɨ́ nyé á dwidwe bé má. Píe tɨ̂, nye nzě kǎ tô Grɛ̂s. 3Nye á to di gʉ̂ʼ ó ongɔn olɛ̂l. Nye á jwɨʼ ó, nyě nʉá ó sitíma, tô sí Sirî. Píe tɨ̂, oYúden ntɔ̂ʼ kǎʼ bébebébe bʉm ɨ́ lɔ̌b wé. Nó nyé á jwɨʼ ó, nye kǎ cɨɨ yé ó, ɨ́ sí Masedónia yɨ́. 4Sópatros, mwân mé Píros, mʉr Bére, tó lîʼlɔɔ bé e Arîstark, ndu e Sekúndos, bʉr ó Tesaloníka. Gáywis, mʉr Dɛ́rbe, ndu e Timotɛ̂, Tisikôs, bé e Trofímos, bʉr ó Azía, bé á si to lîʼle nyé ntémé. 5Bʉr baá o b'á sámle. Bé á ka to bóno bɨ̌h ó Troâs. 6Bɨ̌h bʉr o tɨ̂ʼ bé á si kalwo ɨ́ sitíma lɨ́ ebʉ́m é Fílipi, píe nzɔɔ biblêr bi dí abe e levure bí. Píe melú métɛ̂n nɛ́ɛ: bɨ̌h ntɔ̂ʼ tó kœb bé Troâs, gúmó bɨ́h le onɔ́ɔ́ bé á jâ sóno ntinɨ̂ yɨ́.

Pahá mé Etwíswih

7Ádwií gúú móhó sóno ɨ́ bíí kʉ̌ʼ nɛ́ɛ: bɨ̌h nzě syɛŋǎ gúmo gwár lɨ́ epûhla mébô lɨ́ ede. Nó, ɨ́ mɛ́n tɨ̂ʼ ó Pɔ̂l nyɨɛ á be ó, nye ólaa wɨ́. Nó ó nyé á nze dwe bʉr milɛ́ʼlá ɨ́ bea bea, tó pyâl témé pum. 8Meláma, mé á be ɨ́ buo ɨ́ ntɔ́ɔ ɨ́ tólóm mbɛ̌r bɨ́h á gwɨ̂hla tɨ̂ʼ wɨ́. 9Yé á be ó e yʉ́ʉ́ loʼo, díé lé Etwíswih. Yé á be ó ndîndǐl ɨ́ wínɨ. Yê nzě tô ɨ́ jô ɨ́ súgúgú. Ɨ́ mpʉ̌ Pɔ̂l á to le elɛ̂ʼle bé ɨ́ bea bea yɨ́, le mpʉ̌ jô yé á bu mɛ̂r yé yɨ́, yé ntɔ̂ʼ dwina ɨ́ wínɨ ɨ́ tólóm mbɛ̌r, duma sí ɨ́ sɨŋ. Bé á ka nkɛ́ɛ yé ó, nkɛ́yɨ́ɨ yé osí boó dwe yé. 10Pɔ̂l nzě sulo sí, tó búrwo yé ɨ́ nyʉ̂l, mɛ̂r yé ɨ́ mbô, nye ntɔ̂ʼ lɛ́ɛ ó: «Ayɨ́ jóʼo gá bʉ́á. Nye lɨ́ ekubla. Nyé adwe.»

11Nye ntɔ̂ʼ báʼǎ bére, pɛ̂ʼ nyé blêr, nye ntɔ̂ʼ de. Nó nyé á nze baʼa lwib ɨ́ buo buo, tó pyâl ɨ́ melɔ́ma mé mɛ́n. Nye nzě mɔa, tô. 12Nó ó bé á nze e loʼo yaá, yé mû sí kʉ́ tiʼe. Bɨ́bɛ̂h ntɔ̂ʼ bǐ buobuo nkul ɨ́ miléme ɨ́ syɛ́ɛla yaá.

13Bɨ̌h nzě ja nzɨ́, kalwo ɨ́ sitíma yé á nkɛ́ɛ bɨ̌h yɨ́, yê nzě tô e bɨ̌h lɨ́ ebʉ́m lé Ásos, gúmó bɨ́h á be ó, bɨ̌h bé ónʉǎ Pɔ̂l, kɛl nyé ɨ́ sitíma yɨ́. Yé ó sá nyé mʉr tɨ̂ʼ á pa boo tíʼe ɨ́ lémé wé yɨ́, ebě, nyɨɛ á kpɛl ó, nyě cɨɨ́ ó nkpǎʼ e nkpǎʼ, tó pyâl gʉ̂. 14Jɔʼ nyé á kœb bɨ̌h ɨ́ Ásos yɨ́, bɨ̌h ntɔ̂ʼ nʉa nyé náǎ, tô e né ɨ́ Mitilɛ̂n. 15Bɨ̌h nzě duho tɨ̂. Ádwií ɨ́ mɛ́n tɨ̂ʼ nɛ́ɛ: bɨ̌h ntɔ̂ʼ pyâl bǎʼ e Kíos. Ɨ́ móhó wé á bɔma wɨ́, bɨ̌h bé á si laa, pyâl ɨ́ Sámos. Ɨ́ móhó wé á ka bɔma wɨ́, bɨ̌h ntɔ̂ʼ pyâl ɨ́ Míletos. 16Ebě, Pɔ̂l á boo tíʼe ɨ́ lémé wé ó, nyě laá yé ó e byɛ̂l, atyɛ̂b Éfɛsɔs. Nye á bene etyɛ̂b ó, nye ámû dímlě jɔʼ ɨ́ sí Azía. Nye á tʉtô ó, kám e kám, nye nkʉ̂ tó kumǒ Yerʉ́zalɛm ɨ́ jɔʼ nzɔ́ɔ Paŋtekôt, yé bé yé á bě e nkul ebána nó.

Pɔ̂l lɨ́ ejána le otyɛ̂b bé ésôʼ ó Mbɛ̌r-Nzyɛ̌m Éfɛsɔs

17Jɔ̌ʼ Pɔ̂l á be ɨ́ Míletos yɨ́, nye á si tyen mempáŋla Éfɛsɔs, lɨ́ ebáŋle ótyɛ̂b bé ésôʼ ó Mbɛ̌r-Nzyɛ̌m ó, bé tô bee nyê. 18Jɔʼ bé á pyâl gúmó nyé á be yɨ́, nye e bé ó: «Bɨ̌n bé lɨ́ egʉ́ǎ mpʉ mé á didi ɨ́ sɔ́má yɨ́n ɨ́ jɔʼ mɨ́ná bé á didi gá, táare ɨ́ dʉ́ó lé ésôʼ mé á tyêl ebo lâm ɨ́ sí Azía, tó kumǒ kumáa ɨ́ dʉ́ó mɨ́ná bé á bɔ́ʼa gá yɨ́. 19Me á sɨséa Tî Yésʉs syɛ́ɛ́ ɨ́ jɔʼ yɨ́yɛ̂h ó, le ejɔr nyʉ̂l nyǎm, e myɛ́ɛlé ɨ́ míh, oYúden bɨ́ɛ lɨ́ esáa mépɨʼ mé ébóblo mê. Sâ yaá ó b'á bu dwe me túú yɨ́. 20Bɨ̌n bé lɨ́ egʉ́a ó, me á bé alíʼa lɨ́ edwe bɨ́n milɛ́ʼlá mímyɛ̂h myé á be e nkul ebe bɨ́n e nyɔm mí. Me á lɨlɛ̂ʼle bɨ̌n ó, ɨ́ bigúmó bʉ̂r dí esisyɛŋa bí ti e mímbɛ̌r e mímbɛ̌r myɛ̂h. 21Me á si boʼlo kwá oYúden, ndu e baá o dí abe óYúden bá ó, yé jɨ ó, bé túmaa mikoo e mebébe mɔ́ɔ́, le edwira míléme. Bé e dyɛ́ʼwó e Tî gá wɨ́ná Yésʉs. 22Tó kœb ó, ɨ́ báánâ, me mû ó lɨ́ enzě tô Yerʉ́zalɛm ɨ́ mpʉ̌ Sísǐm mé Nzyɛ̌m dí etíne ó, me sâʼ yɨ́. Sâ gwár, mé agʉ́a yɨ́ɛ sá dí ebóno mé gʉ̂ʼ yɨ́. 23Mě jaá gʉ́a ó, njɨ ɨ́ nkana yɨ́yɛ̂h mé dí ecɨɨ yɨ́, Sísǐm mé Nzyɛ̌m jaá lɨlɛ́ɛ ó, njɨ me ókáʼɔɔ e mikǒl, tíblɔɔ ntémé. 24Mɛm bee yɨ́ɛ ó, twiʼ yâm, yé abe mé dimé sɔ̂ʼ. Nyɔm wâm, wê njɨ ó, me swímɨɨ ɨ́ duo bíjʉ́ʉ́, tó pyâl lɨ́ odumo, le eswâhlě syɛ́ɛ́ Tî Yésʉs á líʼe me e yǎ yɨ́: yé ó, etúnǒ Mbɨambɨa Lɔ́ɔ́ mé Nzyɛ̌m.

25«Sâ gwár mé dí egʉ́a ɨ́ báánâʼ yɨ́, yé ó, abe e mʉr ɨ́ sɔ́má yɨ́n ókǎ báʼǎ bee mê, damá be mʉ̂r ngwár ɨ́ sɔ́má bʉ̂r bɨ́bɛ̂h o b'á bee me lɨ́ elaa páʼ nyɨ́n, le elɛ́ɛ̌ lɔ́ɔ́ dí edumo e Mpóʼo mé Nzyɛ̌m wɨ́ bá. 26Sá tɨ̂ʼ ó mé dí elɛ́ɛ e bɨ̌n múh ó: nyʉ́ʉ́ mʉ̂r ɨ́ sɔ́má yɨ́n ótó dîm nó, bé l'akǎ dî mé yɨ́. 27Ebě, me á si dwe bɨ̌n metwɨ́ɨ́ mé Nzyɛ̌m mɨ́mɛ̂h, asol bɨ́n tɔʼ e sâ gwár dí tɨ̂ʼ yɨ́. 28Gwá dwɛ̂ʼ gá tyé yɨ́n, bɨ̌n bʉr o tɨ̂, le mpʉ̌ sɔ́má óbûʼla bɨ́bɛ̂h dí yɨ́. Sísǐm mé Nzyɛ̌m, wé á tyêl bɨ̌n ɨ́ Mbɛ̌r-Nzyɛ̌m ó, ɨ́ dǐ óbɔʼlʉ. Nó, gwá baʼle gá bé Mbɛ̌r-Nzyɛ̌m waá. Nzyɛ̌m á bwâm wé ó, ɨ́ nzɨ̌ metié mé Mwân wé nye mʉr tɨ̂. 29Me lɨ́ egʉ́a ó, jɔʼ mé ngá laa, tô e tyen yâm dóló yɨ́, bʉr o dí enwɨɨla le onkœœ, dí ɨ́ buú nyan bá, bé ópyâl gúmó bɨ́n dí yɨ́. Bé ákamle e sɔ́má óbûʼla. 30Damá jóʼo ɨ́ sɔ́má yɨ́n tʉ́ŋlʉ̌, bʉ́ʉ́ bʉ̂r, bé ómɔa, nzě lɛ́ɛ míkóo, le edulo ómpʉ́n ó, bé dúʼoo bê. 31Diʼee gá ɨ́ mpʉ̂n, mekʉá ɨ́ binyâ. Bɨ̌n a símsá bísyɛ́ɛla bɨ́h á sâ, le myɛ́ɛlé ɨ́ mîh bí. Me á bé akâr túú écɨ̂l mʉ̂r ngúngwár ɨ́ sɔ́má yɨ́n, móhó e pum, tâŋ mimbú mílɛ̂l.

32«Nó ó, ɨ́ báánâ, me lɨ́ etímle bɨ́n ɨ́ mebó mé Nzyɛ̌m. Nyɨ́ lɛ̂ʼle bɨ́n mpam nyé e nzɨ̌ mekǎn mé. Nye bâʼlaa bɨ̌n e mekǎn maá. Mé e nkul elɨl bɨ́n ɨ́ búʼó le edwe bɨ́n nkɔb bilíʼe jwɨʼ gwár e gwár e baá bɨ́bɛ̂h dí egúmo e né bá. 33Me á bé agwɨ̂m damá bě nkóhó mɔnɨ́, nkʉ̂ gʉ̂l, nkʉ̂ mikán mí mʉ̂r. 34Bɨ̌n bʉr o tɨ̂ʼ bé lɨ́ ekʉ́ gʉ́a ó, ɨ́ mbó éjʉ́m wâm ó bɨ́h le osó bâm, bé ábǐ sá bɨ́h á be lɨ́ egwɨ̂m yɨ́. 35Bisyɛ́ɛla byâm bíbyɛ̂h, byê bɨ̌n ó mveʼle. Byé lɛ́ʼlé bɨ́n ó mpʉ bɨ́n jálá le eséǎ syɛ́ɛ́, le ekɛm bʉ̂r mû sí tyɛʼ bá yɨ́, ebě, mɨná bé lɨ́ esímsa gá mekǎn Tî Yésʉs mʉr tɨ̂ʼ á lɛ́ɛ má. Mé ó: “Le mʉr dí edwe nyá, le waá dí enʉa nyá, waá dí edwe nyá ó dí ebuú sʉŋɔɔ métyɛʼ me mpóm.”»

36Jɔʼ nyé á sil elwib nó yɨ́, bé e bʉr baá bɨ́bɛ̂h nzě bɨʼ mébóó sí. Nye nzě jɨʼla e Nzyɛ̌m lɨ́ esú lɔ́ɔ́. 37Bʉr bɨ́bɛ̂h ntɔ̂ʼ jɨŋɔɔ médwê, le ebeŋlɔɔ̌ Pɔ̂l, ndu e l'edû nyé emúʼ ɨ́ swííá. 38Bé á bu jóʼo yɨ́ɛ ebúʼ ó, ebe nyé á lɛ́ɛ ó, bé ákǎ báʼǎ bee nyê. Nó ó bé á to lîʼle nye, tó pyâl gúmó sitíma yé á be yɨ́.

Currently Selected:

Milʉ́mlʉ́ 20: ozm

Highlight

Copy