Milʉ́mlʉ́ 19

Pɔ̂l ɨ́ Éfɛsɔs

1Jɔ̌ʼ Ápolos á bě Kórɨnt yɨ́, Pɔ̂l á si cɨɨ ɨ́ sí Frigía, ntɔ̂ʼ tó pyâl Éfɛsɔs. Nye nzě kœb bʉ́ʉ́ ómpʉ́n mé Tî Yésʉs gʉ̂. 2Nye nzě dî e bé ó: «Nzê bɨ̌n bé á si bi Sísǐm mé Nzyɛ̌m ɨ́ jɔʼ bɨ́n á bûʼla yɨ́ ɛ́?»

Bé ntɔ̂ʼ yala e né ó: «Bɨ̌h dína apǎ jóʼo jóʼáa bé lɨ́ elɛ́ɛ ó, yʉ́ʉ́ sɔ̂ʼ, yé ó “Sísǐm mé Nzyɛ̌m”.»

3Nó ó Pɔ̂l á dî e bé ó: «Á bɨ̌n bɨɛ bé á pʉgʉ duŋɔɔ wáǎ mbǐ ndubó ɛ́?»

Bé ntɔ̂ʼ yala e né ó: «Yé á be ó, ndubó mé Yʉánɛs Ndubʉr.»

4Nó ó, Pɔ̂l á lɛ́ɛ e bé ó: «Yʉánɛs á dudu ó, baá bé á túmo mikoo e misyóm myɔ́ɔ́, le edwira mílémé bá. Nye á lɨlɛ́ɛ e bʉr o b'Ɨ́zraɛ̂l ó, bé dyɛ̂ʼwaa e mʉr dí enze nyé píe koo nyá. Nó yé ó Yésʉs.»

5Jɔʼ bé á sil ejóʼo mekǎn maá yɨ́, bê nzě duŋɔɔ ɨ́ díé mé Tî Yésʉs. 6Ɨ́ jɔ̌ʼ Pɔ̂l á kɛl bé mebô yɨ́, Sísǐm mé Nzyɛ̌m ntɔ̂ʼ sulo bé ɨ́ menyʉ̂l, bé ntɔ̂ʼ táare élwib bílwǐb biswîh, le egwîh mísolá mílɔ̌b mé Nzyɛ̌m. 7Bʉr baá bɨ́bɛ̂h, bé á be ó, kúnókúno e bʉr kám le obá.

8Lɨ́ ongɔn olɛ̂l, Pɔ̂l á be ó lɨ́ etʉ̂to ɨ́ mpáh minjɨʼla oYúden lɨ́ edwidwe bé milɛ́ʼlá, abe e bʉ́á, ɨ́ lɔ̌b Mpóʼo mé Nzyɛ̌m, le esáa édulo bʉ̂r o b'á jʉ̂joʼlo nye bá. 9Sâ gwár mpʉ bʉ́ʉ́ bʉ̂r bɨ́ɛ, bé á sâ elele é léme, adyɛ̂ʼwo e Nzyɛ̌m, le epyaŋɔɔ nzɨ́ mé Krîst ɨ́ kpɛŋlɛm yɨ́, Pɔ̂l nzě pʉʼa tɨ̂ʼ ɨ́ sɔ́má yɔ́ɔ́, ntɔ̂ʼ nʉa ómpʉ́n bé, tô le elɨlɛ̂ʼle bé milɔ̌b mé Nzyɛ̌m dʉ́ó lɨ́lɛ̂h ɨ́ sʉkʉ́lʉ mé Tíranos tʉ́ŋlʉ̌. 10Pɔ̂l á sâ nó ó, tâŋ mimbú mímbá, tó pyâl ɨ́ jɔʼ bʉ̂r bɨ́bɛ̂h bé á be ɨ́ sí Azía bá, oYúden ndu e bikúl bíswîh, bé á jóʼo lɔ́ɔ́ dí edumo e Tî Yésʉs wɨ́ yɨ́.

11Nzyɛ̌m á sɨ̂sa mesimá ménɨ́nɨ́ɨ́ ó, cɨɨ e nzɨ̌ mé Pɔ̂l. 12Nó ntémé, osana o míkán ndu e bipéh míkán Pɔ̂l á kúna e byé bí, bʉr nzě nʉnʉa byê, nzě gɔ́na le ebɨ̂bab mímbêl byǎ ɨ́ menyʉ̂l, myé ntɔ̂ʼ tiʼe. Mimbɨ́a mísísǐm ntémé duho bé ɨ́ menyʉ̂l.

Bwán mé Skevâ

13Nó ó, bʉ́ʉ́ óYúden, bé á be lɨ́ etʉ̂to mékwár e mékwár mɛ̂h, lɨ́ etô le eso mímbɨ́a mísísǐm ɨ́ bʉr. Bé á jwɨʼla lɨ́ eso mímbɨ́a mísísǐm myaá ó, lɨ́ etwóolo díé mé Tî Yésʉs. Bé á lɨlɛ́ɛ e byé ó: «Mě lɛ́ɛ́ bɨ́n ɨ́ díé mé Yésʉ̌s Pɔ̂l dí etúnǒ lɔ́ɔ́ wé nyá ó, bɨ̌n dúhaa!»

14Nó ó yé á be ó e nyʉ́ʉ́ Yúden á be njwɨ́ɨ opara nyá, díé lé Skevâ, e bwá ó bʉrʉ̂m nzaangbá. Ádwií ɨ́ gúú móhó, ɨ́ jɔʼ bɨ́ɛ bé á be lɨ́ esâ syɛ́ɛla yaá yɨ́ nɛ́ɛ: 15mbɨ́ǎ sísǐm, wé ntɔ̂ʼ yala e bé ó: «Me lɨ́ egʉ́ǎ Yésʉs. Me ntémé, mɨ́ gʉ́ǎ sɔ̂ʼ ɨ́ nkǒ páʼ mé Pɔ̂l. Á bɨ̌n bɨɛ, bé ó onzé?»

16Mʉr á be e mbɨ́ǎ sísǐm nyá, ntɔ̂ʼ nkaŋa bé ɨ́ menyʉ̂l, ntaa bé ɨ́ nkul, dumo bé sí. Bé ntɔ̂ʼ bumɔɔ míkám, pyálɔɔ̌ kʉ̌l, duhɔɔ ɨ́ mbɛ̌r wé, tóŋɔɔ mísuswáh ɨ́ kpâ le mepɨ́ɨ́ ɨ́ menyʉ̂l. 17Bʉr o Éfɛsɔs bɨ́bɛ̂h, oYúden le baá bé á be abe oYúden bá, bê nzě jóʼǒ lɔ́ɔ ɨ́ lɔ̌b syɛ́ɛlǎ nɨ̌, ekɛ̂n ntɔ̂ʼ swɨɨ bɨ́bɛ̂h ɨ́ nyʉ̂l. Nó ntémé ó díé mé Tî Yésʉs lé á nze gúmo yɨ́. 18Bʉr ɨ́ buo buo bé á dyɛ̂ʼwo e né bá, bé á si gwîh bisyɛ́ɛla bí ébébe bé á boo sɨsâ bí. 19Oleme omyâ ɨ́ buo buo ntɔ̂ʼ nzɨnze le mekaná mɔ́ɔ́ bé á lɛ̂ʼle mimǐr mí éleme má, nzě díʼɔɔ mé ɨ́ kpɛŋlɛm, bʉr bɨ́bɛ̂h lɨ́ ebee. Nó bé á sâ metâŋ mékaná maá, bee ó, bimɔnɨ́ bé á dímle lɨ́ ebwâm mé bí, byé á be ó, tâŋ minzaŋ mí nkóhó mɔnɨ́ otɔ́ɔ́sin mekám métɛ̂n! 20Mpʉ́nʉ̌ ó lɔ́ɔ́ dí edumo e Tî Yésʉs wɨ́, wé á myaŋlǎ gúmó yɨ́yɛ̂h, le elɛ̂ʼle nkûl nyé yɨ́.

Bintʉ̌ bi bʉ̂r o Éfɛsɔs

21Píe tɨ̂, Pɔ̂l nzě tíʼe ɨ́ lémé wé ó, nyě tó ó, tó ntaǎ sí Masedónia, le yaá Akayɨ̂. Nyé okǎ tô Yerʉ́zalɛm. Nye á lɨlɛ́ɛ ó: «Jɔʼ mé óbe, me mû gʉ̂ʼ yɨ́, me ójala le ebáʼǎ nkɛ́ɛ, ó me pyálaa ntémé Rôm.»

22Nó nyé á lómo bʉr bé, obá, bé á sɨséa e né ɨ́ sí Masedónia bá: Timotɛ̂, bé e Erâst. Nye mʉr tɨ̂ʼ á be ɨ́ lîʼ ɨ́ sí Azía bwá mélû abuo.

23Ɨ́ melû maá, bintʉ̌, byé á be ɨ́ buú syɛ́ɛ̌ mpʉ bʉ̂r bé á be, bé mû lɨ́ edû nzɨ́ mé Krîst yɨ́. 24Yé á bě e nyʉ́ʉ́ lûl melûl, díé lé, Demétrios. Nye á be lɨ́ elulúlo bwá bímveʼle ɨ́ gʉ̂l ɨ́ mpáh mé nzyɛ̌m wɔ́ɔ́, Artémis, le edwe ósyɛ̂l o mésâ myɛ́na ɨ́ buo buo. 25Nye nzě jébe bê, syɛŋ bé gúmo gwár. Bɨ́bɛ̂h, bé á be ó bilóbila le esú é syɛ́ɛ́ egwár. Nye ó: «Bɨ̌n bé lɨ́ egʉ́a ó, syɛ́ɛ́ yɨ̂ʼ ó mɨ́ná dí ebi gá bimɔnɨ́ tɨ̂. 26Bɨ̌n bé lɨ́ ejóʼo le ebeě mpʉ mʉ̂r nɨ̌ dí elɛ́ɛ ó, onzyɛ̌m bʉ̂r dí esâ e mebô bá, bé abe ónzyɛ̌m yɨ́. Nyɨ́ sîl édulo bʉ̂r ɨ́ buo buo, abě njɨ wâʼ ɨ́ Éfɛsɔs yé omér. Nye mû ó sí dulo ntémé kúnókúno e sí Azía yɨ́yɛ̂h. 27Sɨ́ǎ yaá, yé e nkul edulǒ pyêh ɨ́ syɛ́ɛ́ gá yɨ́ná. Abě njɨ nó yé omér. Yé e nkul esâ ntémé ó, nzyɛ̌m nɨ́nɨ́ɨ́ gá wɨ́ná Artémis, mbɛ̌r wé, wé dímlaa kûm, bé l'agúm kǎ gbâ wé ɨ́ nkɔb ɨ́ sí Azía yɨ́yɛ̂h.»

28Jɔʼ bé á jóʼo nó yɨ́, bʉr, bé á si bu kpaŋɔɔ mebúʼ le ebɨ́nɔɔ métwíí kʉ́. Bé ó: “Artémis, nzyɛ̌m bʉr o Éfɛsɔs, nye ɨ́ bwaʼ.” 29Nó ó, nkana yɨ́yɛ̂h, yé á be, yé mû áleŋéleŋé. Bʉr nzě mɛ́rɔɔ̌ Gáywis bé e Arîstark, tô le edulo bé sí e sí. Bʉr obá baá, bé á be ó bʉr ó Masedónia. Bé á be ó, osó mé Pɔ̂l, bé le onɔ́ɔ́ bé á titye bá. 30Pɔ̂l á kpɛl ó, nyě tó tyɛ̂b ó lɨ́ esóʼ é sɔ́má. Sâ gwár, ompʉ́n bé, bé á si kamle nye lɨ́ esâ nó. 31Bʉ́ʉ́ ójwɨ́ɨ ó sí Azía, bé á be osó bé bá, bê nzě tyen nyé mpáŋla ó, nye ayɨ́ tô gʉ̂, ntʉ̌ yaá dína lɨ́ esyɛ́ɛlɨ. 32Jɔʼ yaá, bʉr, bé á bé agʉ́ǎ sá yé á laa yɨ́. Bâʼ bʉ̂ bítím ɨ́ wɨ̂ʼ lɔ̌b; bʉ́ʉ́ bʉ̂ bítím ɨ́ gúú lɔ̌b swîh. Nó ó, bʉr ɨ́ buo buo ɨ́ sɔ́má yɔ́ɔ́, bé á bé agʉ́ǎ sá túʼ bé á swâl e tɨ̂ʼ yɨ́. 33Bâʼ óYúden, bé á si tíne Alexandre ó, nye tyɛ́bɨɨ bé esôʼ. Bʉ́ʉ́ bʉ̂r o b'á be lɨ́ entumo bá, bé á be ó lɨ́ egwá tɨ́e nyê. Alexandre ntɔ̂ʼ peble bé mbô, lɨ́ edǐ kamle éntumo e bʉ̂r lɨ́ elwib lɨ́ esú lɔ́ɔ́. 34Jɔʼ bé á gʉ́a ó, nye ó Yúden yɨ́, bɨ́bɛ̂h, bé á si bʉ̂ bitím kʉ́kʉ́ jɔʼ gwár, kúnókúno e mewala mebá ó: “Nzyɛ̌m bʉr o Éfɛsɔs, nye ɨ́ bwaʼ.”

35Nó ó, ngóvina á leʼe ególo. Nye ó: «Bʉr o Éfɛsɔs ɛ̌, mʉr nyɨnyɛ̂h, nye lɨ́ egʉ́a ɨ́ páʼ gá wɨ́ná ó, Éfɛsɔs ó dí ebaʼlě mbɛ̌r yébé gá wɨ́ná, waá dí egúmo e nzyɛ̌m nɨ́nɨ́ɨ́ Artémis wɨ́, le mveʼle mé nzyɛ́m gá wɨ́ná, yé á duho ɨ́ jʉ́o kʉ́, duma sí yɨ́. 36Kâr mʉ̂r dí e nkul esóŋlo yê. Milémé mín, myé ɨ́ jala le edi ɨ́ puuu. Asâ gá syɛ́ɛla bɨ́n dí, apǎ nyɛɛ́ pahle yɨ́. 37Bɨ̂n nzé e bʉr bâʼ kâʼ ó, bɨ́ɛ adíbe bísɔ̂ʼ ɨ́ mbɛ̌r yébé gá wɨ́ná, nkʉ̂ ntémé sâ nzyɛ̌m gá wɨ́ná nkěh. 38Yé bé Demétrios, bé le osyɛ̂l o mésá bé, bé e purá e nyʉ́ʉ́ mʉ̂r nó, mɨná gá bé e mpáh milɔ̌b le otîʼ o mílɔ̌b. Gʉ̂ʼ ó bé jálá le etô e lɔ̌b, tó pur yɨ́. 39Yé bé bɨ̌n dína ó e sá swîh bɨ́n dí egwɨ̂m nó, bé ókǎ lwib ó, jɔʼ yʉ́ʉ́ gwɨ́hlá, yé óbáʼǎ syɛŋa yɨ́. 40Ebě, mɨná bé ámû purɔɔ gá ɨ́ ntʉ̌ syɛ́ɛ́lɨ́ mûh, abe e mpǎŋ lɔ̌b yɨ́. Bé dí mɨ́ná gá sâ pʉgʉ syɛ̌ŋ bím bʉ̂r yɨ̂ʼ wâʼ múh nó, abe e sá mɨ́ná ógwá yala gá bê.»

41Jɔʼ nyé á sil elwib nó yɨ́, nye nzě bîr bʉ̂r ó, bé búlaa.

Currently Selected:

Milʉ́mlʉ́ 19: ozm

Highlight

Copy