Milʉ́mlʉ́ 17

Pɔ̂l, bé e Silâs ɨ́ sí Tesaloníka

1Jɔʼ bé á laǎ Anfípolis ndu e Apolonía yɨ́, bé ntɔ̂ʼ pyâl Tesaloníka, gúmó mpáh minjɨʼla oYúden á be yɨ́. 2Pɔ̂l ntɔ̂ʼ nî tɨ̂ʼ mpʉ métum mé, mé á boo be yɨ́. Ɨ́ mimóhó mí sábat milɛ̂l, nye á be lɨ́ elɛ̂ʼle bʉ̂r o b'á be tɨ̂ʼ bá, lɨ́ elɛ́ɛ bé milɔ̌b mi dí lɨ́ Mekaná mé Nzyɛ̌m mí. 3Nye ntɔ̂ʼ sâ ó, bé gʉ́ŋaa ó, Krîst á si jala le edûhwo mítúú, dwe, nzě pah, duho lɨ́ odwe. Nye á si lɛ́ɛ ntémé bé ó: «Yésʉs mé dí elwib, dumo e né nyá, nye ó Krîst: Mʉ̌r Nzyɛ̌m á lœm múló mé jwɨ́ɨ nyá.»

4Nó ó, bʉ́ʉ́ bʉ̂r ɨ́ sɔ́má yɔ́ɔ́, bé á si bûʼla, nzě syɛŋa e Pɔ̂l, bé e Silâs. Mpʉ yaá ntémé ó bʉ̂r o Grɛ̂s ɨ́ buo buo bé á bûʼla yɨ́. Bɨ́ɛ, bé á si nyɛɛ nî ɨ́ búʼó óYúden. Myúú mímpaŋ mi bʉ́bá, myé á si bûʼla ntémé nó.

5OYúden nzě sáŋɔɔ̌ Pɔ̂l egú, ntɔ̂ʼ pɛ́hɔɔ byúú bísá bí bʉ̂r bé á jɨjáala lɨ́ ebɨ̌m é pátele bá, bé ntɔ̂ʼ sôʼlo bé ó, bé sâʼ bintʉ̌ nkana e nkana yɛ̂h. Bê nzě tô mbɛ̌r mé Yásɔn lɨ́ esáǎ Pɔ̂l, bé e Silâs, ó bé pyélɨɨ bê, tímle éntumo e bʉ̂r. 6Mpʉ bé á be akœb bé tɨ̂ʼ yɨ́, bê nzě tô le edulǒ Yásɔn ndu e bʉ́ʉ́ bɨ́ɔɔ́ bé sí e sí, tô e bê, tó pyâl nko ójwɨ́ɨ ó nkana bé á be yɨ́. Bê nzě táare élɛ́ɛ ó: «Bʉr bâ, bé á si ntɨ̂ʼ sí yɨ̂ʼ yɨ́yɛ̂h. Bé mû ntémé ó, sí bánǎ pyâl wâ. 7Yásɔn á si baʼle bé ɨ́ mbɛ̌r wé. Bʉr bâʼ bɨ́bɛ̂h, bé lɨ́ egbah métié mé Kɛ́ɛza, ebě, bé lɛ́ɛ́ ó, yê mɨná gá ó e nyʉ́ʉ́ njwɨ́ɨ sí swîh, díé lé, Yésʉs.»

8Mekǎn maá nzě tɨ̂l bʉ̂r ó sí yaá mekʉ̌ sí, bé le ojwɨ́ɨ ó nkana wɔ́ɔ́. 9Bé ntɔ̂ʼ sâ ó, Yásɔn, bé e dyɛɛ́ yé, bé gbâʼ bán. Mpʉ bé á gbâ yé yɨ́, bé ntɔ̂ʼ bîr bê.

Pɔ̂l, bé e Silâs ɨ́ Bére

10Jɔ̌ʼ pum wé á dwíne yɨ́, bɨ́ɔɔ́ bɨ́ná nzě tyenɔɔ̌ Pɔ̂l bé e Silâs ɨ́ Bére. Jɔʼ bé á pyâl gʉ̂ʼ yɨ́, bê nzě tô ɨ́ mpáh minjɨʼla. 11Bʉr ó Bére bé á kœb gʉ̂ʼ bá, bé á be ó, ɨ́ mbɨa míléme, laa óYúden bé á bě Tesaloníka bá, ebě, bé á si nʉa lɛ́ʼlá dí edumo e Nzyɛ̌m wɨ́ e mpǎŋ gwɨ́má. Dʉ́ó lɨ́lɛ̂h, bé á be ó lɨ́ etimle Mékaná mé Nzyɛ̌m, lɨ́ edǐ bee nkʉ̂ sá Pɔ̂l á lɨlɛ́ɛ bé yɨ́, yé á kʉ be ó tyeetye. 12Nó óYúden ɨ́ buo buo, bé á bûʼla, damá be ntémé mimpaŋ mi bʉ́bá le bʉrʉ̂m o Grɛ̂s. 13Ɨ́ jɔʼ óYúden ó Tesaloníka bɨ́ɛ, bé á jóʼo ó, Pɔ̂l á be ó, lɨ́ etúnǒ lɔ́ɔ́ mé Nzyɛ̌m ntémé Bére yɨ́, bê nzě tô ntémé gʉ̂, ntɔ̂ʼ tó táarɔɔ óleŋéleŋé, le esôʼlo bʉ̂r ó, bé bénaa nye. 14Bɨ́ɔɔ́ bɨ́ná, bé ntɔ̂ʼ kpâhwǎ tyěn Pɔ̂l nkǒ nkpǎʼ dí etô mâŋ wɨ́. Silâs, bé e Timotɛ̂ bɨ́ɛ nzě lîʼ tɨ̂ʼ ɨ́ Bére yaá. 15Nó ó, bʉr o b'á jala le etɨ́ě Pɔ̂l nzɨ̌ bá, bé á tô e né, tó pyâl Atɛ̂n. Pɔ̂l nzě bwóolo bé e mpáŋla ó, bé tyénɨɨ nye Silâs, bé e Timotɛ̂, ó bé tô kœb nyé gʉ̂ʼ kám e kám.

Pɔ̂l mû ó Atɛ̂n

16Jɔʼ yɨ́yɛ̂h Pɔ̂l á bóno Silâs, bé e Timotɛ̂ ɨ́ Atɛ̂n yɨ́, nye á be ó lwɨ́ŋlá le ebúʼ ɨ́ mbi nyé á bee nkana yaá e bikpɛʼkpɛ̂ʼ bí ónzyɛ̌m wɨ́. 17Nye á be ɨ́ jɔʼ yɨ́yɛ̂h ó, bé le oYúden, le bʉr oswîh bé á dwáawo Nzyɛ̌m bá, lɨ́ elwibla ɨ́ mempáh bísulá tʉ́ŋlʉ̌. Nye á lwib ntémé ó, lɨ́ ebɨ̌m é pátele ɨ́ dʉ́ó lɨ́lɛ̂h, bé e bʉr o bé le onɔ́ɔ́ bé á bʉbɔma, lɨ́ etô nkana bá. 18Bʉ́ʉ́ ómpʉ́n ó Epikʉ́rʉs ndu e baá ó Stoyɨ̂ke, bé e boo Pɔ̂l, bê nzě pére mékǎn. Bâʼ, bé á lɛ́ɛ ɨ́ lɔ̌b wé ó: «Ágólogólo nyâʼ pʉgʉ́ kpɛl élɛ́ɛ wâʼ yé ɛ́?»

Bʉ́ʉ́, bé á lɨlɛ́ɛ ó: «Yé ó go ó, nyě lɛ́ʼlé mɨ́ná gá ó, onzyɛ̌m o bíkúl bíswîh.»

Bé á lɛ́ɛ nó ó, ebě, Pɔ̂l á be lɨ́ etúnǒ Mbɨambɨa Lɔ́ɔ́ dí edumo e Yésʉs, ti e pahá sóo wé yɨ́.

19Bé á si nʉa nye, tóŋɔɔ e né ɨ́ mpǒm bʉr ó gwɨ́hlá nɨ́nɨ́ɨ́ yé á be ɨ́ Ayeropágos yɨ́. Nó ó bé á dî e né ó: «Nzê bɨ̌h bé e nkul egʉ́ǎ mbi édwán é lɛ́ʼlá gó dí edwe wɨ́ ɛ́? 20Ebě, go lɨ́ esâ ó, bɨ̌h jóʼaa bisâ bi dí bɨ̌h medwán bí. Nó bɨ̌h bɨ́ tíʼe ɨ́ milémé míh ó, bɨ̌h bé ógʉ́ǎ sá bísâ byaá dí epʉgʉ́ lɛ́ɛ yɨ́.» 21(Ebě, bʉr ó Atɛ̂n bɨ́bɛ̂h ndu e l'ojwóo bé á didi tɨ̂ʼ bá, bé á jaa lɨlɛŋ jɔʼ yɔ́ɔ́ ó, njɨ lɨ́ elɛ́ɛla bísá médwán.)

22Nó ó, Pɔ̂l á tyɛ̂b témé gwɨ́hlá nɨ́nɨ́ɨ́ Ayeropágos. Nye e bé ó: «Bʉr ó Atɛ̂n ɛ̌, mě beé ó, bɨ̌n bé ó bʉr o dí ebuú bûʼla ɨ́ mipáʼ mímyɛ̂h bá. 23Ebě, ɨ́ jɔʼ mé á to le elaa ɨ́ nkana yɨ́n yɨ́, le edwɛ̂ʼ bíntwǎŋ mímbɛ̌r mín yɨ́, me á si bee nyʉ́ʉ́ alatâr tɨ̂, e micɛmá ó: “Lɨ́ esú é nzyɛ̌m dí agʉ́ŋɔɔ kwá nyɨ́h nyá.” Ebě, sá bɨ́n dí edwě dúú yɨ́n lɨ́ agʉ́a yɨ́, yé ó mɛ̂m nze lɛ́ɛ́ bɨ́n yɨ̂. 24Nzyɛ̌m, mʉr á kuho sí yɨ̂ʼ yɨ́yɛ̂h, ndu e l'ekomlǒ sá yɨ́yɛ̂h dí tɨ̂ʼ tʉ́ŋlʉ̌ yɨ́ nyá, nye ó dí Njwɨ́ɨ kʉ́ e sí. Nyé abe lɨ́ edi ɨ́ mempáh me dí esumɔɔ e mebó mé bʉ̂r má. 25Nye ntémé, nyé agwɨ̂m ó, bʉr séaa nye bisyɛ́ɛ́, nkʉ̂ dwe nyé sâ swîh, nkʉ̂ sâ kɛl, ebě, nyɨɛ ó dí edwe bʉ̂r bɨ́bɛ̂h twiʼ ndu e swɨ̂h, ndu e bisá bíbyɛ̂h. 26Nye á si kûhlo, duho ɨ́ mʉr ngwár, bikúl bíbyɛ̂h. Nye nzě dil byé ɨ́ sí yɨ̂ʼ yɨ́yɛ̂h, nyé osí boó tyêl bíjɔʼ bé ngá di tɨ̂ʼ bí le egbâ mínjɨ ɨ́ sí yɨ̂, lɨ́ elɛ̂ʼle bígúmó bé ódi bí. 27Nye á sâ nó ó, bé sáŋaa nye. Bé ósáa nyê, ɨ́ sáa sáa nó, bé obɛ̌m bee nyê. Lɨ́ otyeetye, Nzyɛ̌m, nyé acɛra e mʉr ngwár ɨ́ mɨná gâ. 28Ebě:

Mɨná tiʼe gá ó, ɨ́ nzɨ̌ nyé.

Mɨná kubla gá ó, ɨ́ nzɨ̌ nyé.

Mɨná bi gá twiʼ ó, ɨ́ nzɨ̌ nyé.

Sá bʉ́ʉ́ ótila bɨ́n, bé á boʼlo yɨ́, yé ó kwahaá tɨ̂ʼ tyeetye: Mɨná gá ntémé, bé ó bwán bé. 29Mpʉ mɨ́ná dí gá bwán bé yɨ́, mɨná bé ajala le ekǎ jwɨʼ gá ó, Nzyɛ̌m mʉr tɨ̂, nyě nwɨɨlá ó e bisá mɨ́ná dí elúlo gá ɨ́ gʉ̂l, nkʉ̂ ɨ́ nkóhó mɔnɨ́ bí. Nyé anwɨɨla ntémé e byaá mɨ́ná dí ekpaʼ gá ɨ́ mekóʼ, lɨ́ edû mpʉ ócwóó le mipɨpɨ́ʼ dí etɨ́e yɨ́. 30Jɔʼ myâ, bimpám bín, byé á be ó minjéʼe-Nzyɛ̌m. Nzyɛ̌m nyɨɛ á bé anyɛɛ́ nʉa bíjɔʼ bʉ̂r, bé á be ɨ́ gʉʼla bí byaá, gbâ ɨ́ nkɔb. Nó ó, ɨ́ báánâ, nye mû ó sí kǎ jébe bʉ̂r bɨ́bɛ̂h ɨ́ bigúmó bíbyɛ̂h ó, bé túmaa mikoo e misyóm myɔ́ɔ́ le edwira míléme. 31Nó nyé á tyêl dʉ́ó nyé ngá tíʼe bʉ̂r ó sí yɨ̂ʼ bɨ́bɛ̂h milɔ̌b myɔ́ɔ́ lɨ́ otîtyěl lɨ́. Nye ntémé, nyɨ́ pɛ̂h mʉ̂r ngá tíʼe mílɔ̌b myɔ́ɔ́ myaá nyá. Nyɨ́ lɛ̂ʼle bʉ̂r bɨ́bɛ̂h jwɨʼ ɨ́ syɛ́ɛla yɨ̂: epɛh nyé, dwih nyé lɨ́ odwe!»

32Jɔʼ bé á jóʼo Pɔ̂l lɨ́ elɛ́ɛ̌ mpʉ̌ Yésʉs á pah yɨ́, bâʼ bʉ̂r, bé ntɔ̂ʼ nzyɛm nyê. Bʉ́ʉ́ bʉ̂r bɨ́ɛ, bé á lɛ́ɛ ó: «Bɨ̌h bé ókǎ jôʼlǒ lwǐb yô nɨ̌ ó, ɨ́ jɔʼ swîh.»

33Nó ó Pɔ̂l á mɔǎ gúmó nyé á be yɨ́. 34Bʉ́ʉ́ bʉ̂r nzě tiʼe ɨ́ mpúhlá e né, ntɔ̂ʼ bûʼla: ɨ́ sɔ́má bʉ̂r baá, yé á be ó Denys, á be mʉr gwɨ́hlá nɨ́nɨ́ɨ́ yé á be ɨ́ Ayeropágos yɨ́ nyá, le nyʉ́ʉ́ mʉ́má, díé lé Dámaris, ndu e bʉ́ʉ́ bʉ̂r bé le onɔ́ɔ́ bé á be tɨ̂ʼ bá.

Currently Selected:

Milʉ́mlʉ́ 17: ozm

Highlight

Copy