1 Korintu 5

Semteene hakkune goonɗinɓe Iisa

1Mi nani ko nyiddinii gom, ko waɗaa hakkune mooɗon, filla mum no waɗee nokku fuu. Ir majjum waɗataake baa hakkune heeferɓe. Ko nyiddinii ko nanumi no haalee ɗum woni, hakkune mooɗon, goɗɗo no waalda he dee-bammum. 2Ɗum nyiddinaaki to mooɗon faa oɗon piira ɗum gabaare. Fadde mooɗon fiyirde ɗum gabaare, ɗum haanaana mettinde ɓerɗe mooɗon, nanngon neɗɗo oo mburtinon mo nder hawriine mooɗon.

3-4Baa nii ko miin he hoore am mi tawaaka hannden hakkune mooɗon, hakkillo am no he mooɗon. Nyannde fuu kawruɗon dow innde Iisa *Almasiihu Joomiraawo meeɗen, mi wondan he mooɗon nder baawɗe *Ruuhu Ceniiɗo. To am, dow innde Iisa Joomiraawo meeɗen mi taƴani neɗɗo golluɗo ir golle ɗee kiite ɗe taƴananmoomi baa nii miɗo fotti. Taƴanee mo iri kiite ɗe taƴanmoomi nder baawɗe Iisa Joomiraawo meeɗen. 5Kiite ɗe taƴanmoomi nii : Ngattee neɗɗo oo nder juuɗe Seyɗan, o bonna ɓanndu neɗɗo oo parkatak heɓa yonki makko hisinee nyannde gartol Joomiraawo.

6On keɓaay ko gasi ko piiruɗon gabaare. On anndaa ko ƴuufinirɗum seɗɗa tan heƴi ƴuufina conndi budaani no ndi foti fuu naa ? 7Ittee ƴuufinirɗum kiɗɗum ɗum ngam ngarton hano conndi heyri budaani.#5.7 Conndi heyri budaani – Conndi heyri ndii woni hawriine goonɗinɓe Iisa ɓe calaaki tuubude he gaɗol hakke. Sikka fuu walaa on kakkitaama, ittaɗon he ƴuufinirɗum fuu. Ngam Iisa *Almasiihu, Njawdiri meeɗen *Juulɗe dimɗinol Isra'ilankooɓe sakkaama.#5.7 Daaru Burtaaki 12.15, 20. 8Ndenne, to en njuulir juulɗe meeɗen ƴuufinirɗum kiɗɗum, ƴuufinirɗum ɓerne ɓaleere, waɗoore ko boni. En njuulir buuru mo walaa ƴuufinirɗum fuu. Buuru laatiiɗo goonga mo walaa munafikaaku fuu.

9Nder ɗerol am gom, mi winndani on mbi'umi : To kawtee he yeenooɓe. 10Ko mbi'umi to kawtee he maɓɓe, mi wi'aay to kawtidee he maɓɓe baa seɗɗa nder duuniyaaru nduu, mi wondaa ɓe nder mbuurnam mum'en fuu mbuurdaana jeenu, naa suuno seedere, naa pasaaki laabi naa dewol tooruure. Ngam nde nii mi wi'i to kawtidee he maɓɓe baa isilam, ndenne mi wi'i on mburtoɗon nder duuniyaaru nduu. 11Amma, ko mbinndanmi, mi wi'a on ɗum woni : To ngondee he neɗɗo bi'oowo kam no banndii'on goonɗinɗo Iisa, dey tinni no yeena yahde, naa no suunee seedere yahde, naa no rewa tooruure yahde, naa no nder fiyodirde ko'e himɓe, naa nder yaru-yaru naa no faso laabi yahde. To nyaamdee sam he ir neɗɗo oo. 12Hiitaade ɓe kanaa goonɗinɓe Iisa hanaa golle meeɗen. Gollal mooɗon woni kiitoɗon wonɓe nder hawriine mooɗon. 13Alla hiitoto ɓe ngoonɗinaay Iisa. Ndenne, ndiiwee bonɗo oo hano no ɗum winndiraa, wi'aa : Ndiiwee bonɗo, itton hakkune mooɗon.#5.13 Wi'itaade Tawreeta 17.7

Currently Selected:

1 Korintu 5: FUH

Highlight

Copy

Compare