Tobiti 3
3
Esaala ya Tobbiti
1Mu ngisa yaange, ndalira husaba mubuchuuni bwaange nimboola endi: 2“Ewe Omwaami oli omuluungifu. Oli ow'esisa mu biholwa byao byoosi haandi engeri chao choosi chadyeeri. Niiwe oheenga emisaango mubwadyeeri neende mu buluungifu endaalo choosi. 3Ewe Omwaami husaba wunjichulise haandi wungwiire esisa, mani ohaye ohusaandya olw'ebyonoono byaange, kata neende olw'ebibi byaange bi taamanyire neende olw'ebyonoono bi bakuuka yaange bahola mu moni wao. 4Olwohuba bahaya ohuwulira amalako kao, mani waleha banyakwa, bayirwa mu buwaambe, haandi beeterwayo. Ao mani nihweehola esy'ohuchehwa haandi abaandu bomu byaalo byoosi bi hwasalaaniramo batulekeeresa. 5Oli owadyeeri ohusaandya olw'ebyonoono byaange neende ebya bakuuka yaange, olwohuba haba sihwadiira amalako kao. Haandi haba sihwakeendera mubwadyeeri bwao daawe. 6Mani bulaanu njire koti lw'odaha. Malao obulamu bwaange, mani omubiri kwaange kukobole mu loba mukwatula. Olwohuba bulaanu ohufwa huhirira ohuba omulamu. Olwohuba njoong'ere ohunyekwa buhaya, engisa yimbitiriire hu mwooyo. Ewe Omwaami, lagira sa mani mone engisa yino, wunjire mu buwuuluhiro bw'endaalo choosi. Ewe Omwaami, otaafudatira daawe.”
Engisa ya Saara
7Hu ludaalo lweene olwo, Saara omwaana wa Ragweeli owa Ekibbatana mu syaalo sya Media, naanyekwa neende mulala hu bahaana bahalaabaniraanga laatang'ene. 8Olwohuba Saara yali n'adehereho amahabi kataanu-na-kabiri. Nae omusaambwa kulaangwa kuti Asumodeo, kwetaanga buli musaacha n'asisiiri ohuba alala nae koti omuhasi wae. Ao mani omuhaana mulala hu bahalaabani balataang'ene n'ateeba Saara ati: “Ewe okoterwe oti otemulaanga abasaacha bao? Obeere neende abasaacha bataanu-na-babiri, nae yibulao kata mulala owabaaho alala nawe. 9Lwasiina otuhuya? Lwasiina soochia wesi waaba alala nabo, mani yibuleo onyala ohubonaho omwaana yiwibuule.”
10Saara niyawulira ebyo, engisa yamudiira muno, yatuunduha yalira, yabaasa ohwemika. Nae niyasibaasaho, n'aboola mu mwooyo kwae ati: “Niise omwaana syeeng'ene, nihola sino, sichia ohumala mu laata oluyaali, mani njia ohumuleetera engisa mu myaaka chae ch'obukofu mani afwe.”
Esaala ya Saara
11Ao mani Saara niyeema aambi neende edirisa, n'asiingisa amahono aakulu niyekongooya n'aboola ati: “Ewe Omwaami Nasaae waange, okinisibwe, haandi obwoolerefu bwao neende eliita lyao lyoolerefu bikinisibwe endaalo choosi. Leha ebiloonge byao byoosi bihufumie endaalo choosi. 12Bulaanu, Ewe Omwaami, ese hutingaalire wuhoonye. 13Ewe Omwaami, lagira mani tule mu syaalo sino, haye ohwemeeda ohuwulira ohunyekwa huno. 14Ewe Omwaami, omanyire oti sisiiri ohubaaho alala neende omusaacha. 15Haba sinyasaangaho eliita lyaange, oba ohunyaasa eliita lya laata yaange, ohutula mba mu syaalo sy'obuwaambe. Niise omwaana wa laata syeeng'ene, abulao omwaana wuundi owohumusihira, haandi abulao omwiiho wae oba omwiiho w'omwaana wae yinyala ohudeehera. Ndafwiirwa hale abasaacha bataanu-na-babiri. Mani lwasiina ndoong'a omulamu? Nae nooba n'otadaha ohumalao obulamu bwaange, ngwiire esisa mani haye ohuwulira ohunyekwa huno ehabi liindi.”
Nasaae awulira ohusaba hwa Tobbiti neende ohwa Saara
16Ohwekongooya hwa Tobbiti neende ohwa Saara hwoola mu moni w'oluyaali lwa Nasaae w'amaani, mani n'awulira ohusaba hwaabwe. 17Ao Nasaae n'atuma Rafaeli ohubawonia boombi. Nasaae yamutuma ohumala olububi lulafu olwali hu moni cha Tobbiti, anyale ohuchaaka ohubona. Haandi yamutuma ohutekehera Saara omuhaana wa Ragweeli ohudeehisania neende Tobbiasi omwaana wa Tobbiti, owali naahoyera ohumudeehya, olwohuba bali ab'olwiiho. Rafaeli haandi yatumwa ohwiirusa hu Saara omusaambwa mubi okwa Asumodeo. Mu siha syeene esyo, si Tobbiti yatulira mu nyuumba yae, nisyo esiha si Saara omuhaana wa Ragweli yeheraho hu madaara k'enyuumba yaabwe mu Ekibbatana.
©Bible Society of Kenya, 2019
©Bible Society of Uganda, 2019