Siraki 2
2
Ohweesika Nasaae
1Mwaana waange, niweweereyo ohuhalaabanira Omwaami,
wetekehere ohuteemwa.
2Ba neende omwooyo mulai haandi guma.
Oteyendehereraanga mu biha by'amasira.
3Yomirira hu Omwaami haandi otamutulaho daawe,
ao mani ochia ohunyoola oluyaali hu njakamo y'obulamu bwao.
4Fukiirira ebyo byoosi ebihukwaaho,
kata wahaloongoyaswa otye, wesimiriseenge.
5Olwohuba esaabbu yiteemwa mu muliro,
haandi abaandu bafukiirirwa bateemwa mu tanuuru ly'obuloonga.
6Wesike Omwaami, mani achia ohuhoonya.
Kolola emiduunga kyao, mani osuubire mu Omwaami.
7Eng'we abatya Omwaami, muliinde abakwiire esisa.
Mutamutulaho, ataali ao munyala ohukwa.
8Eng'we abatya Omwaami, mumwesike,
mani haba simuchia hufwiirwa omukabo kweeng'e.
9Eng'we abatya Omwaami, musuubire ohunyoola ebiindu bilai,
ohukwiirwa esisa neende esangaalo litaakama.
10Mubaase hu baandu b'endaalo cha hale:
Wiina mweene owali niyeesikire Omwaami, owadiirwa esoni?
Oba wiina mweene owesimirisa mu hutya Omwaami, mani yasukunwa?
Oba wiina mweene osaba Omwaami, mani yahaywa ohudeebwaho?
11Olwohuba Omwaami w'esisa niye;
atuleheramo ebyonoono haandi atuwonia mu biha by'obudinyu.
12Chibaakaanire ab'emyooyo miti neende ab'amahono kadeembuha,
haandi abahola-mbi abadiira engira choombi.
13Chibaakaanire ab'emyooyo miteengi-teengi, abateesika Omwaami,
olwohuba Omwaami haba saachia hubaliinda.
14Chibaakaanire eng'we abaakama ohwesimiirisa,
mwahehole mutye Omwaami niyahabasaandye?
15Abatya Omwaami haba sibahajeemere amalako kae,
haandi abamudaha bachia ohumenya koti lu adaha.
16Abatya Omwaami bewaayo ohuhola by'asiima,
haandi abamudaha baliinda amalako kae.
17Abatya Omwaami batereesa emyooyo kyaabwe,
haandi beeloongoyasa mu moni wae.
18Lehe hweete mu mahono k'Omwaami,
nae ataali mu mahono k'abaandu,
olwohuba lu Omwaami ali ow'oluyaali,
olwo lwosi nilwo lu ali ow'esisa.
©Bible Society of Kenya, 2019
©Bible Society of Uganda, 2019