Esy'Abaleefi 7
7
Ebiyaanwa by'ohutuunga ekobi
1Akaloondaho kano niko amalako kadiira hu biyaanwa by'ohutuunga ekobi, ebyoolerefu muno. 2Esisolo sihoyera esiyaanwa sino sihoyere ohwiitirwa hu lwaande lw'emukulu w'alutaari, yi bisolo by'ebiyaanwa bisaambwa byaawa biitirwaanga, mani amabaanga kasyo kanyulaanyusirwa hu nyaande chine choosi ech'alutaari. 3Amasinya kasyo koosi kahoyeere ohutuswamo, kayaanwayo hu alutaari, omuhira kwasyo munulu okwo, neende amasinya kabwiiha hu bituundu by'omuukati, 4efuko choosi, alala neende amasinya kachiriho koosi, haandi neende ebituundu bihiramo obulai eby'esini. 5Omulaamisi achia yasaamba amasinya koosi akali hu alutaari, hu kabe esiyaanwa sy'ebyohulya esy'Omwaami. Sino nisyo esiyaanwa sy'ohutuunga ekobi. 6Buli muundu w'esisaacha mulwiibulo lulaamisi, niye ohoyere ohusilyaaho, nae kata katyo sihoyere ohuliirwa Abuundu Woolerefu woong'ene, olwohuba siba nisiri esyoolerefu muno.
7Kata katyo, aliwo esilagiro silala esinyala ohudiira hu biyaanwa bino byoombi, esiyaanwa sy'esyonoono, haandi neende esiyaanwa sy'ohutuunga ekobi, hu bino byoombi, enyama yabyo byoombi, yiba ey'omulaamisi oba nabeere owiimiriire ohuyaana ebiyaanwa ebyo. 8Eseero ly'esisolo siyaanwayo koti esiyaanwa sy'esyohusaambwa, lyosi liba liri ely'omulaamisi owimiriire ohuyaana ohwo. 9Buli siyaanwa sy'emere syoosi, esiba nisideheerwe mu ofuna, oba syaaba nisitekeheerwe mu sifulya, oba esihalaangiro syoosi, syosi siba siri esy'omulaamisi owimiriire ohusiyaana eyiri Nasaae. 10Nae ebiyaanwa bitaadeeherwe byoosi, kata neende nibiba nibisaasaaniiswe neende amafuta koosi oba kata sa nibiba nibiri sa ebyoomu, biba biri eby'abalaamisi b'oluyia lw'Arooni, haandi bahoyere ohukabanamo nibaakana-kana.
Ebiyaanwa by'ohukobola alala
11Akaloondaho kano niko amalako#7:11 amalako: kadiira hu biyaanwa by'obulala ebiyaanwa eyiri Omwaami. 12Omusaacha yeesi naaba nayaanireyo esiyaanwa sino koti esiyaanwa sy'ohweebasa Nasaae, aba ahoyere ohusiyaanira alala neende esisolo sihoyere ohuyaanwayo, esiyaanwa sy'omugaati kuubbwa mu busye butaabbaahirwe, oba emigaati mihomefu ekyakaandwa neende amafuta k'emiseituuni oba bbisikuuti ebiba nibibahirweho amafuta k'emiseituuni oba keeki ech'obusye bukaandiirwe neende amafuta k'emiseituuni. 13Nae alala neende esiyaanwa sy'omuleembe syae esy'ohweebasa achia ohuyaana emigaati ekihubbirwe mu busye obubbaahe. 14Achia ohuleetaanga buli situundu sya buli embya y'omugaati achia ohuyaanangayo neende omugaati mulala, koti esiyaanwa eyiri Omwaami. Sichia ohuba esiyaanwa sy'omulaamisi ochia ohunyulaanyusa amabaanga ak'ebiyaanwa by'esyonoono. 15Nae enyama y'esiyaanwa syae sy'omuleembe sy'ohweebasa, yichia ohuliibwaanga hu ludaalo lw'esiyaanwa syae esyo, omulaamisi haba s'ahoyere ohuyilehaangaho kata nabudiidi yaakona bwaahya. 16Nae omuundu yeesi n'aleeta esiyaanwa sy'ohukobola alala n'adaha ohwooseresa esyeyamo syoosi oba nisiba nisiri esyae omweene, koti esiyaanwa sy'ohweyaanayo hwae, haba sisiyikwa mbwe sihoyere ohuliibwa syoosi syaawa hu ludaalo lweene lwasiyaanirayo daawe, nae nisibaao esyo syoosi esidoong'aho, siba sihoyera ohuliibwa hu ludaalo luloondaho. 17Nae enyama yoosi eyikona ohwoola oludaalo lwohudatu yiba yihoyeere ohusaambwa yaawa. 18Nae naabaao eyo yoosi eyiliibwa niyimalire endaalo chidatu, Nasaae aba haba saachia ohusiima esiyaanwa esyo. Esiyaanwa esyo haba sisiba nisichia ohufukiirirwa ohubalirwa hu muundu oyo daawe, nae siba sichia ohuyirwa koti esy'omusiro, mani buli muundu yeesi oba n'achia ohuyirya aba achia ohukiinga esibwaabo sichiiraho. 19Nae enyama yiindi niyiichia yegeng'aho hu siindu syoosi esiyirwa koti esy'omusiro, haba siiyiba niyihoyeere ohuliibwa daawe, nae yiba yihoyeere ohusaambwa yaawa.
Omuundu yeesi oyirwa koti obulaho omusiro niye ohoyere ohulya enyama yino, 20nae omuundu yeesi ow'omusiro naayilyaaho, oyo haba saaba nisinyaliha ohumubala koti mulala hu baandu ba Nasaae daawe. 21Haandi omuundu yeesi n'alyaaho hu nyama y'esiyaanwa sino n'amalire ohudiiraho hu siindu syoosi esiyirwa ohuba esy'omusiro, esitula hu omuundu, oba hu sisolo syoosi, omuundu oyo haba saaba nasiibalwa koti mulala hu baandu ba Nasaae daawe.
22Omwaami mweene wuno niye owaberesa Musa amalako kaloondaho kano 23akadiira hu baandu ba Yisiraeli. N'aboola ati, amasinya koosi oba ak'eng'oombe, ekoondi, oba embusi sikahoyere ohuliibwa. 24Amasinya koosi ak'esisolo siba nisifwiire oluumbe lwabuli ludaalo, oba esiba nisiitirwe neende esisolo siindi esiteende, kosi haba sikahoyere ohuliibwa daawe, nae kanyala ohwehoonyerwa mu ngira yiindi yoosi. 25Omuundu yeesi olya amasinya k'esisolo siba nisiyaanirwe eyiri Omwaami koti esiyaanwa sy'esyohulya, haba saaba nasiibalwa koti mulala hu baandu ba Nasaae daawe. 26#Huc 9:4; Lef 17:10-14; 19:26; Amal 12:16,23; 15:23.Ataali ohufwaayo hu sifwo syoosi si Abaisiraeli boosi baba nibamenyamo, haba sibahoyere kata nabudiidi ohwehoonyeraanga amabaanga koosi kata sa, amabaanga ak'amayoni, oba amalika ak'ebisolo koti ebyohulya daawe. 27Omuundu yeesi ofunaka elako lino, haba saaba naachia ohubalibwaanga koti mulala hu abaandu ba Nasaae daawe.
28Haandi Omwaami yaaberesa Musa amalako kano 29akadiira hu baandu ba Yisiraeli. Oyo yeesi oyaana esiyaanwa sy'ohukobola alala, ahoyere ohuleetaanga esituundu syasyo siindi koti esiyaanwa sikabuhaaneho esy'Omwaami, 30omweene n'asileeta neende amahono kae keene koti esiyaanwa sy'ebyohulya. Ahoyere ohuleeta amasinya koosi ak'esisolo esyo, alala neende esigwoogwo syeene, mani amale abileete koti esiyaanwa sikabuhaaneho esy'Omwaami. 31Omulaamisi aba achia ohubukula amasinya ako koosi mani akasaambire hu alutaari, nae esigwoogwo siba sichia ohuba esy'abalaamisi. 32Nae esinama sy'adaho sy'omuhono muluungi, sihoyere ohubereswa koti obuhoonyi bw'enjaulo 33eyiri omulaamisi oba nayaanireyo amabaanga alala neende amasinya k'esiyaanwa esyo esy'ohukobola alala. 34Nae esigwoogwo sy'esisolo esyo, siba siri esiyaanwa sikabuhaaneho, nae esinama sy'adaho sy'omuhono muluungi, ni obuhoonyi bukabuhaane si Omwaami yabukula hu baandu ba Yisiraeli, mani yaasiberesa abalaamisi. Kuno nikwo omukabo ku baandu ba Yisiraeli bahoyere ohuberesaanga abalaamisi endaalo choosi echiri mu moni. 35Sino nisyo silala hu byohulya ebiba nibibeereeswe Omwaami ebyali nibyabereswa Arooni alala neende abaana bae hu ludaalo lu baba nibawuulirwaho ohuba abalaamisi. 36Hu ludaalo olwo, Omwaami yalagira abaandu ba Yisiraeli bababereseenge omukabo kuno ohutula hu siyaanwa sino. Sino silagiro si baandu ba Yisiraeli bahoyere ohufunihiraanga endaalo chiichayo choosi.
37Nae bino nibyo amalako akadiira hu biyaanwa bisaambwa byoosi, ebiyaanwa by'emere, ebiyaanwa by'esyonoono, ebiyaanwa by'ohutuunga ekobi, ebiyaanwa by'ohwaawula, alala neende ebiyaanwa by'ohukobola alala. 38Eyo, hu Lugulu lwa Sinai mu siparara, Omwaami niyo yi yabeeresera Musa amalako kano, hu ludaalo lu yalagira abaandu ba Yisiraeli ohuyaanaanga ebiyaanwa byaabwe bino.
Currently Selected:
Esy'Abaleefi 7: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
