Esy'Abaleefi 4
4
Ebiyaanwa by'ebyonoono by'ohwiichuhana sa nooholere
1Omwaami haandi yalagira Musa 2ohuboolera abaandu Baisiraeli ati, buli muundu yeesi ohola esyonoono syoosi, yaahalaka esilagiro syoosi hu bilagiro by'Omwaami niyeechuhaane sa ohusihola, aba ahoyere ohwehaliirisaanga yooseresaanga amalako kano kati.
3Naaba naali Omulaamisi Muhuluundu niye oholere esyonoono esyo, mani yaleeta esoni eyiri abaandu, aba ahoyere ohuchichaanga mani aleeta esurusi njere, eyibulaho obufwoolwa bwoosi, mani ayiyanaangayo eyiri Omwaami hulw'esyonoono syae esyo. 4Ahoyere ohuleetaanga esurusi eyo hu siruwa sy'Eyeema, mani ata omuhono kwae hu mutwe kwaayo, mani ayiitiraanga abweene ao mu moni w'Omwaami. 5Bulaanu, Omulaamisi Muhuluundu oyo ahoyere ohubukulaanga amabaanga kaandi, mani akakiinga akeengisaanga mu Yeema. 6Mani achia ohwiinihaanga olwaala lwae mu mabaanga ako mani akanyulaanyusa mu moni w'epasya endafu eyo amahabi kataanu-na-kabiri. 7Haandi achia ohutechaanga amabaanga kaandi hu bituundu byooki ebiri hu buli soonda chiri hu alutaari y'obubbaani #4:7 alutaari y'obubbaani alutaari y'omugasa eyiri mu Yeema. Achia haandi ohuchuhaanga amabaanga kaba nikadoong'ereo koosi, hu bweemero bw'Alutaari yehoonyerwaanga mu husaamba ebiyaanwa, eyiri hu siruwa sy'Eyeema. 8Haandi ahoyere ohutusa mu surusi yino amasinya koosi pe, amasinya kali hu bituundu biri mukati koosi, 9efuko choombi alala neende amasinya kachiriho, haandi ebituundu by'esini bihiramo obulai. 10Omulaamisi oyo ahoyere ohubukulaanga amasinya kano, mani akasaambiraanga hu alutaari yehoonyerwaanga hu biyaanwa bisaambe, koti sa lwaahola neende amasinya kaba nikatulire mu sisolo siitwa hulw'esiyaanwa sy'ohukobola alala. 11Nae ahoyere ohubukulaanga eseero lyasyo, enyama yasyo, omutwe kwasyo, ebireenge byasyo, haandi neende ebituundu byomuukati byoosi n'oteereho neende amala keene, 12mani abikiinga byoosi abitusa erwaanyi w'ekaambi, abiyira abuundu yi diini yibona koti anyirifu, yi bachuhaanga ekohe, mani eyo niyo yaaba anachichaanga abisaambiraangayo neende omuliro kw'ehwi.
13Nae nikali mbwe oluyia lwoosi olwa Yisiraeli nilwo oluholere esyonoono, mani omusaango kwaaluhira olwohuhalaka elako lala hu hulagira hw'Omwaami mani yeechuhana, 14mani esiha syeene si syonoono esyo simanyihaniraho, oluyia olwo lwoosi luhoyeere ohuchia lwaleeta esurusi njere ohuba koti esiyaanwayo sy'esyonoono. Luhoyeere ohuyileeta eyiri Eyeema ly'Ohubaao hw'Omwaami; 15mani abeemirisi b'oluyia nibo ababa nibachia ohutechaanga amahono kaabwe hu mutwe kwaayo, mani yimala yiitirwaanga abweene ao. 16Omulaamisi Muhuluundu niye oba n'ahoyere ohuchichaanga abukulaho hu mabaanga ako akaandi, mani akeengisaanga mukati w'Eyeema elyo, 17yeeniha olwaala mu mabaanga ako, mani akaanyukulusiraanga mu moni w'epasya eyo amahabi amahumi kataanu-na-kabiri amalaamba. 18Ahoyere haandi ohuchichaanga mani ata amabaanga kaandi hu bituundu byooki ebiri hu soonda cha alutaari y'obubbaani, mukati w'Eyeema, mani achuha akadoong'ere akomu bweemero bw'alutaari yehoonyerwaanga ohusambaanga ebiyaanwa, eyiri mu siruwa sy'Eyeema. 19Bulaanu ahoyere ohubukulaanga amasinya kayo koosi, mani akasaambiraanga hu alutaari eyo. 20Ahoyere ohuholaanga hu surusi yino, ebiindu nasilala, koti bi yahahoyere ohuholaanga hu surusi y'esiyaanwa sy'esyonoono, mu ngira yino, anyala ohuhola esiyaanwa sy'abaandu bano boosi, banyala ohuleherwamo esyonoono esyo. 21Bulaanu haandi aba achia ohunyala ohubukulaanga esurusi eyo yoosi mani ayitusa erwaanyi w'ekaambi eyo mani ayisaamba, koti sa lwasaamba esurusi yaaba nayaanireyo hulw'esyonoono syae omweene. Sino siba sichia ohubechaanga esiyaanwa simalao esyonoono sy'oluyia lwoosi.
22Nae nikali mbwe omwiimirisi niye oba niyonoonere, mani omusaango kwaamuhira hulw'ohuhalaka lala hu hulagira hw'Omwaami, niyechuhaane mu huhola atyo, 23mani esiha syeene syaaba n'anyaliiremo ohumanya ati aholere esyonoono esyo, abweene ao niwo y'ahoyere ohutulaniramo achie aleete esiyaanwa syae omweene esy'embusi ehole eyitaaliho obufwoolwa bwoosi. 24Ahoyere ohuchia yaabukula omuhono kwae mani yaakuta hu mutwe kwayo, mani ayiitire hu lwaande lw'emukulu lw'alutaari, yi bisolo by'ebiyaanwa by'ohusaambwa biwa biitirwaanga. Esiyaanwa sino siba siri esiyaanwa sy'ohumalao esyonoono esyo. 25Omulaamisi bulaanu aba achia ohwiicha mani abukule olwaala lwae mani alwiinihe mu mabaanga k'esisolo esyo, mani akate hu bituundu byooki biri hu soonda chia alutaari eyo, mani haandi achuhe akaba nikadoong'ereho aasi w'obweemero bw'alutaari eyo. 26Bulaanu ahoyere ohuchia mani yasaambira amasinya kayo koosi hu alutaari, koti sa lwaaba nasambaanga amasinya k'ebisolo biitwa koti ebiyaanwa by'ohukobola alala. Mani mu ngira yino, omulaamisi oyo aba n'amalire ohuyaana esiyaanwa sy'esyonoono sy'omwiimirisi oyo, mani aba achia ohuleherwaangamo.
27 #
Hub 15:27,28. Nae nikali mbwe ali sa mulala hu baandu ba buli buhya oba niye oholere esyonoono, mani embaanga yaamuloba, olwohuhalaka elako lala hu hulagira hw'Omwaami, niyechuhaane ohuhola atyo, 28mani esiha syeene esyo si amanyiramo ati amalire ohwonoona, aba achia ohutulaniraangamo aleeta esiyaanwa syae omweene, esy'embusi edwaasi, eyitaaliho obufwoolwa bwoosi. 29Ahoyere ohuchia yaata omuhono kwae hu mutwe kwaayo, mani yaamala yayiitira hu lwaande lw'emukulu lw'alutaari, yi beeteraanga ebisolo by'ebiyaanwa by'ohusaambwa biwa. 30Omulaamisi haandi aba achia ohubukulaanga olwaala lwae alwiiniha mu mabaanga k'esisolo esyo, mani abaha amabaanga hu bituundu byooki ebiri hu buli soonda, mani haandi abukula amabaanga kadoong'ereho koosi, akachuha hu bweemero bw'alutaari eyo. 31Bulaanu aba achia ohutusaangamo amasinya koosi, koti sa lu masinya katuswaanga mu bisolo biitwa koti ebiyaanwa by'ohukobola alala, mani haandi ahoyere ohubechaanga naali niye ochia yaabisaambiraanga hu alutaari, hu bulaanu esaami yino yinyala ohusangaasaanga Omwaami. Mani mu ngira yino yiti, nimwo mu mulaamisi aba achia ohuba nayaanire esiyaanwa sy'esyonoono sy'omusaacha oyo, oba achia ohuleherwaangamo.
32Omusaacha yeesi n'aleeta ekoondi koti esiyaanwa sy'esyonoono, lihoyere ohubechaanga edwaasi elitaaliho obufwoolwa bwoosi. 33Achia ohubukulaanga omuhono kwae mani akuta hu mutwe kwalyo, mani aliitira hu lwaande lw'emukulu lw'alutaari, yi beeteraanga ebisolo by'ebiyaanwa by'ohusaambwa biwa. 34Mani omulaamisi aba achia ohubukulaanga olwaala lwae, mani alwiiniha mu mabaanga k'esisolo esyo, mani abaha amabaanga hu bituundu byooki ebiri hu buli soonda y'alutaari, haandi amala achia abukula amabaanga kadoong'ereho, akachuha mu bweemero bw'alutaari eyo. 35Bulaanu haandi aba achia ohutusaangamo amasinya koosi, koti sa lu masinya katuswaanga mu koondi liitwaanga koti esiyaanwa sy'ohukobola alala, mani akasaambireenge hu alutaari eyo alala neende ebiyaanwa by'ebyohulya ebiba nibibereeswe Omwaami. Mani mu ngira yino nimwo mu mulaamisi aba nayaanire esiyaanwa sy'esyonoono sy'omusaacha oyo, mani aleherwaangamo.
Currently Selected:
Esy'Abaleefi 4: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
