Esy'Abaleefi 25

Omwaaka kwa hataanu-na-habiri

(Amal 15:1-11)

1 # Hut 23:10,11. Omwaami yalomalomera neende Musa hu Lugulu lwa Sinai n'amulagira 2ohuberesa abaandu ba Yisiraeli amalako kaloondaho kano kati. Nimwiingira mu syaalo si Omwaami ali ohubaberesa, muhoyere ohwisaanga oluyaali mu Omwaami, nimutalimaanga emikuunda buli mwaaka kwa hataanu-na-habiri. 3Munatakaanga emikuunda kyeeng'we, nimwaanjula emisabbiibbu kyeeng'we, haandi nimuhung'aanianga ebirime byeeng'we byoosi, hulw'emyaaka kisaasaba. 4Nae omwaaka kwa hataanu-na-habiri, kuhoyere ohubechaanga omwaaka kw'eloba ohuwuluuhiraho elalira, haandi omwaaka kwayaanwa eyiri Omwaami. Mutatakaanga emikuunda kyeeng'we, kata neende ohwaanjula emisabbiibbu kyeeng'we. 5Kata mutakesaanga emere yiba niyamera eyeene niyitataakirwe, haandi mutahung'anianga emisabbiibbu ohutula hu misabbiibbu kitaanjuulwe; kuno mwaaka kw'eloba ohuwuluuhiraho elalira. 6Kata neende eloba elyo niliba nilitalimwaho omwaaka okwo, liba lichia sa ohunyala ohubaberesa ebyohulya bimala, bawaambe beeng'we, abasaacha bapakasi, abateende bamenya naang'we, 7ebisolo byeeng'we bituke, haandi neende ebisolo byomu siino ebiri mu siino lyeeng'we. Buli siindu siriba nisitusirwe, sihoyere ohuliibwaanga-buliibwa.

Omwaaka kw'ohukobosa buyaaha

8Baleenge emyaaka kitaanu-na-kibiri amahabi kataanu-na-kabiri, obuungi bw'emyaaka amahumi kane neende kitaanu-na-kine. 9Mani, hu ludaalo lw'ehumi, omwaaka kwa hataanu-na-habiri, oludaalo lw'Ohusaasania, tumeenge omuundu achia yoobba eturumbete mu syaalo syeeng'we mwoosi. 10Mu ngira yino nimwo mu eng'we munabechaanga nimukabuule endulo omwaaka kw'amahumi kataanu haandi nimulaangirira obulehuule eyiri abamenyi bomu syaalo muno. Mu mwaaka kuno, ebiindu by'abaandu byoosi ebiba nibyali nibyakuswa, biba bichia ohukoboswa eyiri abali abeenebyo hale, oba abeechuhulu baabwe, haandi buli muundu yeesi oba niyakuswa koti omuhalaabani muwaambe, ahoyere ohukobolera ab'edaala lyae. 11Mutataakaanga emikuunda kyeeng'we, oba ohukesa emere yiba niyahula eyeene, oba ohuhung'anianga emisabbiibbu kibataanjula emisaala kyakyo daawe. 12Omwaaka kuno kwoosi kuchia ohubechaanga omulafu yi muli; muchia ohuliichaanga bi mikuunda kitusa ekyeene.

13Mu mwaaka kuno, ebiindu by'abaandu byoosi ebiba nibyakuswa, biba nibichia ohukaluswaanga eyiri abaandu bali hale abeenebyo. 14Mani sakira nooba nookusire eloba Omuisiraeli waasyo, oba nooba noomukulireho, mutaholeganaanga mu ngeri yitahoyera daawe. 15Obukusi buhoyere ohukeraanisibwaanga hu buungi bw'emyaaka ki loba elyo liba nilichia ohuba nilyehoonyerwamo ohwiibusa ebimera, omwaaka kuloonda hu mwaaka kw'Ohwekobosa Buyaaha. 16Nibiba mbwe ni emyaaka miingi nikyo ekiba nikisidoong'ereyo, obukusi buba buchia ohuba aakulu, nae nikiba mbwe ekidoong'ereyo ni emidiidi sa, obukusi buba buchia ohubechaanga aasi, olwohuba esiba nisikuswa oba nisikulwa, ni obuungi bw'ebirime bi loba elyo liba nilichia ohunyala ohwiibula. 17Otebaanga Omuisiraeli waasyo daawe, nae londaanga Omwaami Nasaae wao.

Esidinyu sy'omwaaka kwa hataanu-na-habiri

18Funihireenge amalako k'Omwaami koosi, hu munyale ohumenyaanga mu muleembe, mu loba muno. 19Eloba lichia ohwiibusaanga ebirime byalyo, nihaandi ewe ochia ohunyoolaanga ebiindu byoosi byooba niwekoomba ohulichaanga, haandi oba ochia ohumenyaanga mu muleembe.

20Nae omuundu wuundi anyala ohuteeba esiba sichia ohubaao esyohulya mu mwaaka kwa hataanu-na-habiri, emikuunda kyoosi nikitachia ohutaakwa, haandi nibatahung'ania ebirime byoosi. 21Omwaami aba achia ohuberesa esyaalo ehabi mu mwaaka kwa hasaasaba, hu loba linyale ohwiibusa ebyohulya bimala emyaaka kibiri ekilondehana. 22Mani nimuba nimutaaka emikuunda kyeeng'we mu mwaaka kwa hataanu-na-hadatu, muba munaba nimusilichaanga sa hu bimuba nimwakesa mu mwaaka kwa hasaasaba, haandi muba muchia ohubechaanga neende ebimala ohulya ohwoola ebirime bi mutaaka omwaaka okwo byoole ohukeswa.

Engobosayo y'ebiindu by'abeene

23Eloba lyeeng'we haba sirihoyere ohukusirwaanga elalira, olwohuba haba simuba nimwaliyirira elalira; lya Nasaae nilyo, mani eng'we muli koti abateende ababa nibafukiirirwa sa ohuhola nimulyehoonyeraho.

24Eloba niliba nilikuswa, obunyala bw'omweenelyo wataangira ohulikula buhoyere ohuwulirwaanga. 25Nae Omuisiraeli niyeecha yaamuyiika ohukusa eloba lyae, omwiiho wae wa aambi nae muno niye oba n'ahoyeera ohulikula lyaakobola. 26Omuundu yeesi oba nataaliho neende omwiiho yeesi, ohunyala ohulikula lyaamukobolera, aba luunyuma omweene agagayaale, mani n'amalire ohunyoola eseende chimala ohulikula lyaamukobolera. 27Mu ngeri koti eyo, aba ahoyera ohutuungaanga omuundu oba niyalikula obuungi bw'eseende chaakana neende emyaaka kiba nikisidoong'ereyo ohwoola hu mwaaka okumalirihayo hu Mwaaka kw'Ohukobosera, kwaaba naaba n'ahoyere, kata sibe siina n'ahoyere ohwekobosera eloba lyae. 28Nae nikali mbwe ye haba saali neende eseende chimala ohukula eloba elyo mani yaalyekobosera, lidoong'a sa mu bunyala bw'omuundu oyo oba naali niye owamukulaho, ohwoolera elalira hu mwaaka kumaliirihayo hu Mwaaka kw'Ohukobosera. Mu mwaaka okwo eloba elyo liba lichia ohukoboserwa omweenelyo wataangira.

29Nae omuundu yeesi naakusa enyuumba yae eyiri mu sida syebodoohania, aba ali neende ehabi y'ohuyikula yayeekobosera mu mwaaka kutaangira omulaamba ohutula hu ludaalo lweene lu yayikusiraho. 30Nae naaba n'atanyala ohuyikula yaayekobosera mu mwaaka kutaangira okwo, aba afwiiriirwe ehabi y'ohuyikula yaamukobolera, mani enyuumba eyo yiba yeehola ey'omuundu oyo, haandi ey'elalira yae alala neende abeechuhulu bae; haba siyiba niyichia ohukoboswayo mu mwaaka kw'Ohukobosa daawe. 31Nae enyuumba chiri mu lukoongo luteebodoohaanie neende esida, chihoyere chiyirwe koti emikuunda; omweeneyo wataangira, niye oba naali neende ehabi y'ohuyikula yaayekobosera, nihaandi chihoyere ohukoboswayo mu Mwaaka kw'Ohukobosera. 32Kata katyo, Abaleefi nabo bali neende edeembe ly'ohukula beekobosera esiha syoosi, ebiindu byaabwe mu siko siba nisyababeereswa. 33Nae enyuumba yoosi mu biko bino byoosi, niyiba niyikusirwe neende Omuleefi, nae haba siyikulwa yaakoboswa, yiba yihoyere ohukoboswa mu Mwaaka kw'Ohukobosera, olwohuba enyuumba echio, ech'Abaleefi mu biko byaabwe, chiri echaabwe ech'elalira, mu baandu ba Yisiraeli. 34Nae eloba ly'olwaayiro, elyebodoohania ebiko by'Abaleefi, haba sirikuswaho daawe; lyosi liri elyaabwe endaalo choosi.

Ohweyosa ebiindu abaandu bamanani

35 # Amal 15:7,8. Nikali mbwe Omuisiraeli waasyo, owamenya aambi naawe yeecha yaamanana, mani byaamuhaya ohweyemehao omweene, oba omusaacha oba omuhasi, muba muhoyere ohumuberesaanga, koti mwaahaberesaanga omuhalaabani mupaangise, hu banyale ohwemeeda ohumenyaanga aambi naang'we. 36Mutabatungyaanga engaanga yoosi daawe, nae funihireenge Nasaae, mani muleha Abaisiraeli baasyeeng'we bamenya aambi naang'we. 37#Hut 22:25; Amal 23:19,20.Mutabakanyaanga ohutuungira engaanga hu seende chi muba nimubeeyolere, haandi mutaholaangaho engaanga hu byohulya bi mubakusa. 38Sino silagiro ohutula eyiri Omwaami Nasaae weeng'we, owabatusa mu Misiri ohubaberesa esyaalo sya Kanani, haandi ohuba Nasaae weeng'we.

Ohulehuulwa hw'abawaambe

39 # Hut 21:2-6; Amal 15:12-18. Nikali mbwe Omuisiraeli waasyo owamenya aambi naawe amanana, ohwoola lwahwekusaho omweene koti omuhalaabani omuwaambe, otakanyaanga ahola emirimo ky'obuhalaabani buwaambe. 40Ahoyere amenyeenge naawe, koti omuhalaabani mupaangise, mani ahuhalaabanireenge ohwoola hu Mwaaka kw'Ohukobosera. 41Esiha esyo, omweene oyo, alala neende abaana bae, baba bahoyere ohuhutulaho mani baakobola mu daala lyaabwe, haandi hu biindu bya bakuukaang'ene. 42Abaandu ba Yisiraeli bahalaabani bawaambe b'Omwaami nibo, haandi niye owabakula ohubatusa mu Misiri; mani haba sibahoyere ohukuswa haandi mu buhalaabani buwaambe daawe. 43Mutabatukaanga neende obwaalaba, nae funihireenge sa Nasaae weeng'we. 44Nimuba nimudaha abawaambe, munyala mwaachichaanga nimubakulaanga ohutula mu byaalo byabebodoohania. 45Munyala haandi mwaakulaanga abaana b'abateende ababamenyamo. Abaana abafwaana batyo abeebulirwa mu loba lyeeng'we banyala beehola baaba ebiindu byeeng'we, 46haandi munyala ohubalehera abasyaani beeng'we koti obusiha, baba nibahoyere ohuhalaabanira obulamu bwaabwe bwoosi Kata munyala ohubahola abahalaabani bawaambe. Nae eng'we haba simuhoyere ohutuka kata mulala hu Baisiraeli baasyeeng'we neende obwaalaba daawe.

47Nikali mbwe omuteende wuundi owamenya naang'we yeehola omuyiinda, nae Omuisiraeli waasyeeng'we nae amanana, mani yeekusa omweene eyiri omuteende oyo koti omuhalaabani omuwaambe, oba eyiri hu mulala hu baandu b'edaala lyae. 48Naaba n'amalire ohweekusa, aba asisiiri neende edeembe ly'ohukulwa yaakoboswa. Mulala hu bamwaanang'ina 49oba laatang'ene wuundi oba hoochaang'ene, oba mwaanang'ina wuundi, oba mulala hu beeho bae boohubweene muno, aba ahoyere ohumukula yaamukobosa; oba omweene naaba naakabanisibwa omusaara okumala, anyala omweene yeekula yaaba omulehuule haandi. 50Ahoyere ohweteeba hu muundu oba niyamukula, mani babale emyaaka ohutula esiha si mweene yeekusiraho, ohwoola hu mwaaka kumaliirihayo hu Mwaaka kw'Ohukobosera, mani amala ate obukusi bwae ohweema hu musaara kuba nikutungwaanga omuundu omuhalaabani mupakase omukule, hwaanyale amulehuule. 51Nikali mbwe yiba niyisisiiriyo emyaaka kiindi emiingi, aba ahoyere ohutuunga emyaaka ekyo kyoosi, eseende chihoyere ohumununula. 52Nae niyiba niyisiidoong'ereyo emyaaka emidiidi sa, ohwoola hu Mwaaka kw'Ohukobosera, ahoyere ohubaliirira mani baawuliirisania, 53koti omuundu oba niyali niyapakaswa ohutuungwaanga buli mwaaka. Omuhoongo wae haba saahoyere ohumutuka neende obwaalaba. 54Nikali mbwe bihaya ohumulehuula mu ngira chino choombi, omweene oyo alala neende abaana bae boosi baba bahoyere ohulehuulwa mu mwaaka kumaliirihayo hu Mwaaka kw'Ohukobosera. 55Omuisiraeli haba saanyala ohuba omuhalaabani muwaambe w'endaalo choosi daawe, olwohuba abaandu ba Yisiraeli, bahalaabani bawaambe b'Omwaami nibo. Yabatusa mu Misiri; mani niye Omwaami, Nasaae waabwe.

Currently Selected:

Esy'Abaleefi 25: SAMDC

Highlight

Copy

Compare