Esy'Abaleefi 18
18
Enjirana yitafukiirirwa
1Omwaami haandi yaboolera Musa 2ohuchia mani aboolere abaandu ba Yisiraeli ati, “Ese niise Omwaami Nasaae weeng'we. 3Eng'we mutaloondakanaanga neende ebiholwa by'abaandu ba Misiri, ba mwali nimwamenyayo hale, oba ebiholwa by'abaandu bali mu syaalo sya Kanani daawe, abo ba ndi ohubayiramo bulaanu. 4Funihireenge amalako kaange, mani muhola bi mba nindagiire. Ese niise Omwaami Nasaae weeng'we. 5#Neh 9:29; Esek 18:9; 20:11-13; Luk 10:28; Rom 10:5; Gal 3:12.Loondakaneenge neende ebiholwa, haandi neende amalako ka mba nimbaberesa; ao muba muchia ohuwoniaanga obulamu bweeng'we nimuba nimuchia ohuholaanga mutyo. Ese niise Omwaami.”
6Ao Omwaami yeemao yaatusa amalako kaloondaho kano. Otayiranaangaho kata neende omwiiho wao yeesi. 7Otachalaasaanga lataao, n'oyirana neende maakoo yeesi. Otachalaasaanga kata maakoo mweene. 8#Lef 20:11; Amal 22:30; 27:20.Otachalaasaanga lataao n'oyirana kata neende mulala hu bahasi bae baandi. 9#Lef 20:17; Amal 27:22.Otayiranaanga neende mboochoo, oba kata neende mboochoo omuhaana wa lataao wuundi, kata neende niyahusirwa alala naawe mu nyuumba ndala, oba haba. 10Otayiranaanga neende omwiichuhulu wao; olwohuba esyo siba sichia ohuba esihuyemula ewe mweene. 11Otayiranaanga neende mboochoo, omuhaana wa maao, oba omuhaana wa lataao; olwohuba oyo yesi aba naali mboochoo sa mweene. 12#Lef 20:19,20.Otayiranaanga neende seengeeo oba hoochaao; oyo aba ali omwiiho wao wohubweene neende lataao oba maakoo. 13Otayiranaanga neende mwaanang'ina maao; olwohuba oyo yesi aba ali koti maakoo mweene. 14Otayiranaanga neende muha hoochao, muha lataao wuundi, olwohuba abo boombi bosi baba bali bamaakoo. 15#Lef 20:12.Otayiranaanga neende muhoomwaana, oyo n'omuhasi w'omwaana wao niye, 16#Lef 20:21.oba kata neende mulamuuwo. 17#Lef 20:14; Amal 27:23.Otayiranaanga neende omuhaana oba omwiichuhulu muhaana w'omuhasi yooba ni wayiranaho nae, oba neende omusyaani oba omwiichuhulu musyaani w'omusaacha yooba ni wayiranaho nae; abo beeho bao nibo, kuno kwaheehola omusaango kw'ohuyirana neende omwiiho. 18Otadeehyaanga mulamuuwo aba koti mulala hu bahasi bao, omuhasi wao mweene nasisiiriwo omulamu, oba otadeeheraanga mulamuuwo aba koti omusaacha wao, wamwo mweene n'asisiiri omulamu.
19 #
Lef 20:18. Otayiranaanga neende omuhasi yeesi naaba n'asisiiri mu ndaalo chae, olwohuba wuno aba ali omusiro eyiri abaandu koti lu miduunga ky'ediini lu kiri, oba otayiranaanga neende omusaacha yeesi naaba naali neende ebidaacha nibitulira mu busaacha bwae, olwohuba wuno yesi aba ali omusiro eyiri abaandu koti lu muduunga ky'ediini kiri. 20#Lef 20:10.Otayiranaanga neende omuhasi w'omusaacha wuundi, oba omusaacha w'omuhasi wuundi; sino siba sichia ohuhuhola obeeho omusiro. 21#Lef 20:1-5.Otalehaanga omwaana wao yeesi achia yehoonyerwa mu hwiinamira nasaae Moleki, olwohuba sino siba sichia ohuchalaasa eliita lya Nasaae, Omwaami. 22#Lef 20:13.Abulao omusaacha ohoyera ohuyirana neende omusaacha wuundi, oba omuhasi ohuyirana neende omuhasi wuundi; olwohuba Nasaae yasinyihira muno esiholwa esyo. 23#Hut 22:19; Lef 20:15,16; Amal 27:21.Abulao omusaacha yeesi oba omuhasi yeesi, ohoyere ohuyirana neende esisolo syoosi; esibboli sino sikera wabaaho omusiro eyiri abaandu koti lu miduunga ky'ediini lu kiri.
24Muteeholaanga ab'omusiro eyiri abaandu nimuholaho ebiholwa koti bino biti, olwohuba yino niyo engeri yi abakafiiri beeholeramo eby'omusiro bino, abakafiiri abo abali nibamenya mu syaalo sino eng'we nimuteecha, haandi nibo ba Omwaami ali ohwiirusaanga naabatusa muno, hu mweemeo eng'we mwiingiremo. 25Ebiholwa byaabwe bino nibyo ebyahola esyaalo sino syabaamo omusiro kuno, mani sakira Omwaami omweene ali ohuboneresaanga esyaalo sino, mani naasihola sihayane neende abaandu bano abali nibasimenyamo. 26Nae eng'we muhoyere ohuchia mani mwaaloondakanaanga neende ebilagiro byaange, neende amalako kaange. Ao muba muchia ohunyala ohuhayira elalira ohuholaanga kata silala hu biholwa by'emisiro bino, eng'we Abaisiraeli beene, oba abateende baba nibabamenyamo 27(olwohuba eby'emisiro bino nibyo bi baandu bali nibamenya mu syaalo muno baholaanga, eng'we nimuteecha, mani baahola esyaalo sino syabiiya siti); 28mani esyaalo sino haba sisiba nisichia ohuhayana naang'we mwesi, koti lu syahayana neende abakafiiri bali nibasimenyamo eng'we nimuteecha. 29Olwohuba eng'we mumanyire bulai bweene muti, oyo yeesi oholaho kata hu siindu silala syoong'ene hu biindu bisinyisa Nasaae bino, anaba hu yakaame ohwebalaanga koti mulala hu baandu ba Nasaae.
30Mani Omwaami yeemao yaboola ati, “Eng'we mani mukanye mu funihire amalako kano kaandi ohubaberesa, mani muhaye ohuloondakana neende ebiholwa by'abaandu bali nibamenya mu syaalo sino eng'we nimusisiiri ohwiichamo. Muteholaanga ab'emisiro kino neende ohuhayaanga ohuholaanga kata silala hu biindu bino byoosi. Ese niise Omwaami, Nasaae weeng'we.”
Currently Selected:
Esy'Abaleefi 18: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
