Esy'Abaleefi 11
11
Ebisolo binyala byaaliibwa
(Amal 14:3-12)
1Omwaami yeemao yaaberesa Musa neende Arooni amalako kaloondaho kano 2akadiira hu baandu ba Yisiraeli. Muhoyere ohulichaanga buli sisolo siri hu syaalo huno 3esiri neende ebirekeyi byakabuhanamo haandi ebikobosa ebyohulya byaabikaayamo. 4Kata katyo mu bisolo bikaaya haandi ebiri neende ebirekeyi byakabuhanamo, haandi simuhoyere ohulichaanga bino biti: Engamia, olwohuba yikaaya, nae haba siyiri neende ebirekeyi byakabuhanamo daawe, olwohuba by'omusiro nibyo yi muli. 5Haandi neende esaabale chomu makina, olwohuba echio chosi chikaaya, nae haba sichiri neende ebirekeyi byakabuhanamo daawe, olwohuba ebyo byosi by'omusiro yi muli. 6Haandi neende kata emuuna yosi, olwohuba yosi yikaaya nae haba siyiri neende ebirekeyi byakabuhanamo, mani yosi yiba niyiri ey'omusiro yi muli. 7Kata neende embiichi yosi, olwohuba eyo yosi yiri neende ebirekeyi byakabuhanamo, haandi ebirekeyi byayo byeefufuga, nae haba siyinyala hukobosa muhanwa ebyohulya bi yiba niyiriire haandi yaabikaaya daawe, mani yosi yiba niyiri ey'omusiro yi muli. 8Haba simuhoyere ohulichaanga ebisolo bino daawe, kata sa ohudiraanga hu milaambo kyaabyo nibiba nibifwiire; bino byoosi by'omusiro yi eng'we muli.
9Muhoyere ohulichaanga eng'eeni choosi echiri neende amakeendero haandi neende amakaamba, 10nae esiindu syoosi esiba nisyamenya mu maachi esitaaliho amakeendero neende amakaamba, haba sisihoyere ohuliibwa daawe. 11Ebiloonge bifwaana bityo, bihoyeerwe ohuyirwaanga koti eby'omusiro yi muli. Mani eng'we haba simuhoyere ohubirichaanga daawe, haandi kata sa ohudiraanga hu milaambo kyabyo nibifwiire. 12Haba simuhoyere ohulichaanga esiindu syoosi esyamenya mu maachi, nae haandi haba sisiri neende amakeendero kata neende amakaamba.
13Haandi haba simuhoyere ohulichaanga amayoni kano koti, eeswi, engosya, gwaasule, 14ewuungu, esihubbi neende enjia chasyo chiindi, 15ehoofwa, alala neende embya chiindi chichiiraho, 16ewudo, dulyeenge, namulobi, 17ehirihiihi, ogoongogoongo, namuniingye, 18eyoyo lyohu maachi, namweenge, awudu 19namunaha, esihoohootole neende akafwaana nasyo, adyeedo, neende embuudombuudo.
20Ebikooko ebiriho embaya byoosi by'omusiro nibyo yi muli, 21ohutusaho ebyo ebinyala ohuduuma-duuma. 22Munyala mwaalya esike, esiyeenje, oba edeede. 23Nae ebiindu biindi bidiidi byoosi ebiri neende embaya, nae haandi binyala ohwambaaka, bihoyere ohuyiribwa koti eby'omusiro yi muli.
24Nae oyo yeesi ochia yadiira hu mulaambo kufwiire okw'ebisolo bino biti, yesi achia ohubalwaanga koti ow'omusiro ohwoola lu bwiira oludaalo olwo, 25haandi oyo yeesi okiinga emilaambo kifwiire ky'ebisolo ebyo, ahoyere ohuchichaanga yoosa engubo chae, nae kata katyo adoong'a sa naayirwa koti ow'omusiro yi muli ohwoola engoloobe y'oludaalo olwo. 26Buli sisolo syoosi esiri neende ebirekeyi byakabuhanamo, nae haba sibyefufuga daawe, oba esitanyala ohukaaya, sy'omusiro yi muli; haandi oyo yeesi osidiiraho yesi aba ow'omusiro sa yi muli. 27Haandi ebisolo byoosi ebikeendera amadete mooki, mu bisolo by'amakulu kane, byosi by'omusiro yi muli; haandi oyo yeesi odiira hu milaambo kyabyo aba achia ohubechaanga ow'omusiro ohwoola lu bwiira ludaalo olwo, 28haandi kata oyo yeesi okiingaho emilaambo kyabyo aba ahoyere ohuchia yoosa engubo chae, haandi yadoong'a sa n'asisiiri ow'omusiro yi muli ohwoola lu bwiira oludaalo lweene olwo; ebisolo ebyo byoosi by'omusiro yi muli.
29Nae bino nibyo ebiindu bifwiindikana ebyeechulana hu syaalo ebiri eby'omusiro: Efuho, embeba, oluunyu, embaakala alala neende ebisolo biindi byoosi ebifwaanaho bityo koti; 30ehoohome, embulu, embaakala ch'omuuloba, alala neende ehaaniafu. 31Bino byoosi nibyo ebiindu bifwiindikana ebitaali ebilafu yi muli; mani oyo yeesi obidiiraho nibifwiire, aba achia ohubechaanga ow'omusiro ohwoola engoloobe y'oludaalo olwo. 32Nae haandi nikali mbwe emilaambo kyabyo kifwiire nikikwa hu siindu siindi syoosi, syosi siba sichia ohubechaanga sa esy'omusiro sityo yi muli. Sino sidiira hu biindu biindi koti, embaao, engubo, eseero, oba egunia, ataali ohufwaayo muno hu mulimo ku siindu esyo siba nisiholaanga. Mani esiindu koti esyo sihoyeerwe ohwiinihirwaanga mu maachi, mani sidoong'anga sa nisisisiiri esy'omusiro yi muli ohwoolaangaa engoloobe y'oludaalo lweene olwo. 33Nae nikali mbwe emilaambo ekyo kikwa mu ndamu y'eloba, buli siindu syoosi esiba nisirimo, siba siri esy'omusiro, mani haandi muba muhoyere ohwaataanga endamu koti eyo yityo. 34Nae esyohulya syoosi esinyala ohuliibwa, nae amaachi katula mu ndamu eyo kanyalire ohusidoonyaho, syosi siba simalire ohweehola esy'omusiro yi muli, haandi kata esiindu syoosi esing'weebwa esiba mu ndamu eyo, syosi siba siri esy'omusiro sa yi muli. 35Mani buli siindu syoosi si mulaambo kwoosi okwo sikwegeeng'aho siba syosi syeholere sa esy'omusiro yi muli; kata amaika maloonge mu loba, oba ofeni, byoosi biba bihoyere ohwaatwa sa, 36nae niyiba esulo oba esisiima, ebyo bidoong'a sa nibiri ebilafu, kata neende nikali mbwe buli siindu syoosi siindi nisyegeeng'a sa siti hu milaambo kyabyo siba nisiri esy'omusiro. 37Nae nikali mbwe omulaambo kuundi kwosi kwoola ohwegeeng'aho hu emwo yichia ohutaakwa, emwo eyo yidoong'a sa niyiri endafu. 38Nae emwo eyo nikali mbwe yibeere niyiri ohwiinihirwa, nae omulaambo kwoosi ku yegeeng'aho, emwo eyo yiba yimalire ohukaluuhana ohuba ey'omusiro.
39Nae nikali mbwe esisolo syoosi esihoyera ohuliibwa sifwa esyeene, oyo yeesi osidiiraho, aba achia ohubechaanga sa ow'omusiro yi muli ohwoola engoloobe ludaalo lweene olwo. 40Haandi nikali mbwe aliwo omuundu yeesi oba n'aliireho hu nyama y'esisolo esyo esifwiire esyeene, aba ahoyere ohuchichaanga yoosa engubo chae choosi, nae kata katyo adoong'a sa n'asisiiri ow'omusiro ohwoola engoloobe y'oludaalo lweene olwo; haandi oyo yeesi okiinga omulaambo kw'esisolo siba nisifwiire esyeene esyo, yesi ahoyere ohuchichaanga mani yoosa engubo chae choosi, ni yesi adoong'a sa n'asisiiri ow'omusiro ohwoola engoloobe y'oludaalo lweene olwo.
41Eng'we haba simuhoyere ohulichaangaho hu tusolo otudiidi-diidi otukeendaana hu loba daawe, 42kata sa nituba nitwaafula, oba nitunyala ohukeendaanga sa neende amakulu kaatwo kane, kata sa nituba nituli neende amakulu maangi sa. 43Muteholaanga abeene ohuba ab'omusiro nimulyaho hu bisolo bino. 44#Lef 19:2; 1 Pet 1:16.Ese niise Omwaami, Nasaae weeng'we, mani eng'we muhoyere ohweliindaanga nimuli aboolerefu, olwohuba ese syesi ndi omwoolerefu. 45Ese niise Omwaami, owabatusa mu Misiri, hu nyale ohuba Nasaae weeng'we. Eng'we mani muhoyere ohubechaanga aboolerefu, olwohuba ese syeesi ndi omwoolerefu mweene.
46Lino, mani, nilyo elako lidiira hu bisolo, neende amayoni, haandi neende hu buli siindu esyamenya mu maachi, haandi neende hu buli siindu esikeendera sa hu loba. 47Mani eng'we muhoyere ohubechaanga abehaliirisa mu buli siindu, hu munyaleenge ohumanyaanga ohukabuhanianga akatikaati w'esiindu si muduunga kuyira ohubechaanga esilafu, neende esyo si kuyira ohubechaanga esy'omusiro, akatikaati w'ebisolo bihoyere ohuliibwaanga, neende ebyo ebitahoyeere ohuliibwaanga daawe.
Currently Selected:
Esy'Abaleefi 11: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
