Ohuchaaka 45
45
Yosefu yemanyisa eyiri bamwaanang'ina
1 #
Biho 7:13. Yosefu mani nibimuhaya ohweliinda mu moni wa bahalaabani bae abali mu moni wae, naalagira ati, “Lehe buli muundu atule ano.” Mani abulao omuundu yeesi owaluwo Yosefu niyemanyisa eyiri bamwaanang'ina. 2Yosefu yalirira mu kono ly'aakulu, Abamisiri neende abaandu bamenya mu dooho lya omutuki wa Misiri nibawulira. 3Yosefu yaboolera bamwaanang'ina ati, “Niise Yosefu; laata yaange asisiiriyo omulamu?” Nae bamwaanang'ina batya muno mani baahaya ohumukobolamo esiindu syoosi.
4Yosefu yaboolera bamwaanang'ina ati, “Mbekweeda, musude aambi naange.” Mani nibasuda aambi nae. Yosefu yaboola ati, “Niise Yosefu, omwaana weeng'we, yimwakusa mu Misiri. 5Bulaanu mutatya kata sa mwanyoolera abeene-na-beene koti lu mwaangusa mu Misiri. Nasaae yasiindiha eno ohubataangiriramo, hu nyale ohuwonia obulamu bw'abaandu. 6Olwohuba enjala yimalire mu syaalo muno emyaaka kibiri sa; haandi kisidoong'ereo emyaaka kitaanu, ki baandu batachia ohulima kata sa ohukesa. 7Nasaae yasiindiha eno ohubataangiriramo, nyale ohubawonia mudoong'e hu syaalo, haandi ohubawonisira abeechuhulu beeng'we. 8Haba siniing'we abasiindiha eno daawe, nae Nasaae niye owasiindiha; yaahola ndaaba koti laatang'ene omutuki wa Misiri, neende omwaami w'enyuumba yae haandi omweemeresi w'esyaalo sy'e Misiri sino syoosi. 9#Biho 7:14.Musiingiriremo muchie eyiri laata yaange mani mumuboolere muti, ‘Omwaana wao Yosefu aboola ati, Nasaae yaahola omwaami w'esyaalo sy'e Misiri syoosi; mani ewe yicha yi ndi eno bwaangu ataali ohuhiinda daawe. 10Ochia ohumenya mu syaalo sya Goseni, obe aambi naange, ewe neende abaana bao alala neende abeechuhulu bao, neende ebyaayo byao, neende eng'oombe chao, neende buli siindu syao syoosi sy'oli nasyo. 11Njia ohuhuliindira eyo, olwohuba kisidoong'ereo emyaaka kitaanu eky'enjala. Mani ewe neende ab'enyuumba yao, neende buli siindu sy'oli nasyo muhaye ohuba abamanani.’ 12Bulaanu eng'we mweesi mubona haandi Bbenjamini mwaanama yesi abona, muti niise Yosefu oli ohulomalomaanga naang'we. 13Muhoyere ohuboolera laata yaange muti oluyaali lu ndi nalwo mu Misiri, neende ebiindu byoosi bi mubweene. Mwaanguweho, muleete laata yaange ano.” 14Yosefu yakwa mu sirifu sya Bbenjamini mwaanang'ina, mani yaalira muno n'amudiirire. 15Yosefu yakwa mu birifu bya bamwaanang'ina boosi, mani yaaliraanga muno; niyamala atyo, bamwaanang'ina bachaaka ohulomaloma nae ataali ohweeyendeherera daawe.
16Emboosi chino nichoola mu dooho lya omutuki wa Misiri chiti bamwaanang'ina Yosefu beechere chasangaasa muno omutuki wa Misiri neende abahalaabani bae boosi. 17Omutuki wa Misiri yaboolera Yosefu ati, “Boolera bamwaanamao oti, ‘Mudwiihe esuhiri cheeng'we mani mukoboleyo mu syaalo sya Kanani. 18Mutuseyo laata yeeng'we alala neende abomu nyuumba yae, mani mwiiche ano yi ndi. Njia ohubaba eloba lihiramo obulai mu syaalo sy'e Misiri, haandi muchia ohulichaanga hu biindu bilai byomu syaalo.’ 19Haandi mubalagire muti, ‘Muhole muti, muchie neende ebigaari ohutula mu Misiri bi munaaleetereho abaana beeng'we bayere neende abahasi beeng'we; mwiiche neende laata yeeng'we, yesi. 20Mutadeeba hu myaandu kyeeng'we, olwohuba eloba lihiramo obulai mu Misiri lichia ohuba elyeeng'we.’” 21Mani abaana ba Yakobbo nibahola batyo. Yosefu yababeresa ebigaari, ohuchianakana koti lu omutuki wa Misiri yalagira, mani yaababeresa ebyohulya bi banaliira hu ngira. 22Haandi yababeresa buli muundu ebyefwaalo by'ohwekaluuhanianga byosi, nae yaaberesa Bbenjamini ebituundu by'efeesa emia chidatu (300), neende engubo ch'ohwekaluuhania chitaanu. 23Yatumira laatang'ene ebiindu bino: esuhiri ehumi echikiingire ebiindu ohutula Misiri, neende esuhiri ehasi ehumi echikiingire engaano, emigaati, neende ebyohulya biindi bi laatang'ene anaaliire hu ngira. 24Yosefu yaseebula bamwaanang'ina bawaao, nae nibali nibawaao, yaababoolera ati, “Mutasoolaniraho hu ngira daawe.” 25Mani nibatula mu syaalo sy'e Misiri, nibachia mu syaalo sya Kanani eyiri Yakobbo laata yaabwe. 26Bamuboolera bati, “Yosefu asisiiriwo omulamu abweene, haandi niye omwaami w'esyaalo sy'e Misiri syoosi.” Yakobbo yawaamo omwooyo, mani yaahaya ohufukiirira emboosi chaabwe echo daawe. 27Nae nibamuboolera emboosi choosi-choosi chi Yosefu yali naababoolere, haandi niyabona ebigaari bi Yosefu yatuma ohumukiinga, yakobolamo amaani bwaangu. 28Yakobbo mani yaboola ati, “Sino simala, hane mbao omwaana waange Yosefu asisiiriwo omulamu abweene; mani njia ohuchia muboneho nisisiiri ohufwa.”
Currently Selected:
Ohuchaaka 45: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019