Ohuchaaka 25
25
Abeechuhulu ba Abburahamu baandi
(1 Biha 1:32-33)
1Bulaanu Abburahamu yeemao yadeehya omuhasi wuundi olaangwa Ketura. 2Wuno yamwiibulira Simurani, Yokosani, Medani, Midia, Yisibbaku neende Suwa. 3Yokosani yeebula Seebba neende Dedani. Abaana ba Dedani nibo bano: Asuriimu, Letusiimu, neende Leumiimu. 4Abaana ba Midia nibo bano: Efa, Eferi, Hanoki, Abbida, neende Elida. Bano boosi bali abeechuhulu ba Ketura. 5Abburahamu yalehera Yisaka ebiindu byae byoosi. 6Nae Abburahamu n'asisiiri omulamu, yaberesa ebiyaanwa abaana b'abahasi b'erwaanyi bamwiibulira. Yabatuma bachiire mu syaalo sy'ebukwe, batule eyiri omwaana wae Yisaka.
Ohufwa neende ohusiihwa hwa Abburahamu
7Abburahamu yayiindira ohumala emyaaka emia ndala neende amahumi kataanu-na-kabiri neende kitaanu (175). 8Abburahamu yayiindira mani yaafwa n'akofuule muno. Mani nibamusiiha alala neende bakuukaang'ene. 9Abaana bae, Yisaka neende Yisimaeli bamusiiha mu ng'uungu ya Makipela ebukwe wa Mamure, mu mukuunda kwa Efirooni omwaana wa Sohari Omuhiiti. 10#Huc 23:3-16.Kuno nikwo omukuunda ku Abburahamu yakula hu Bahiiti. Ao niwo yi basiiha Abburahamu alala neende Saara omuhasi wae. 11Abburahamu n'amalire ohufwa, Nasaae yaberesa omwaana wae Yisaka ehabi. Yisaka yali yamenya aambi neende Bberilahairoi.
Abeechuhulu ba Yisimaeli
(1 Biha 1:28-31)
12Yisimaeli yi Abburahamu yeebula mu Hagari, omuhasi Mumisiri omuhalaabani wa Saara, 13yaba neende abaana bano, ohutekehwa koti lu baloondana mu hwiibulwa: Nebbayooti, Kedari, Adibbeeli, Mibbisamu, 14Misima, Duma, Masa, 15Hadadi, Tema, Yetura, Nafisi, neende Kedema. 16Bano nibo bakuukaang'ene enono ehumi neende chibiri, mani ameeta kaabwe kakulihwa ebyaalo byaabwe neende ebituundu by'ohwoombahamo amayeema kaabwe. 17Yisimaeli yafwa naali neende emyaaka emia ndala neende amahumi kadatu neende kitaanu-na-kibiri (137). Mani nibamusiiha alala neende bakuukaang'ene. 18Abeechuhulu ba Yisimaeli bamenya mu bituundu biri akatikaati wa Hafila neende Suuri, esyali ebukwe wa Misiri nochiira hu lwaande lwa Asiria. Haba sibamenyaho alala neende abeechuhulu ba Abburahamu baandi daawe.
Ohwiibulwa hwa Esau neende Yakobbo
19Bano nibo abeechuhulu ba Yisaka, omwaana wa Abburahamu. Abburahamu niye laatang'ene Yisaka. 20Yisaka yali neende emyaaka amahumi kane n'adeehya omuhasi wae Rebbeka, omwaana wa Bbesweeri Omuaramea ohutula Padani-Aramu. Rebbeka yali mboochoong'ene Labbani. 21Rebbeka, omuhasi wa Yisaka yali omukuumba. Yisaka mani naamusabira eyiri Omwaami. Omwaami n'awulira esaala ya Yisaka, mani Rebbeka yanyoola amabaanga. 22Enda yali ey'amahwaana, mani nibali nibasisiiri ohwiibulwa, bachaaka ohulwaanakana nibasisiiri mu nda. Rebbeka yaboola ati, “Bino nibinachiiririra biti, mani ese ndabeeo omulamu endye?” Mani naachia ohweteebaho eyiri Omwaami. 23#Rom 9:12.Omwaami yamuboolera ati,
“Ebyaalo bibiri biri mu nda yao.
Ochia ohwiibula ebyaalo bibiri ebikabuhaane.
Mulala achia ohuba ow'amaani ohuhiraho owaasye,
omuhuluundu achia ohuhalaabaniraanga omuyere.”
24Endaalo cha Rebbeka ech'ohwiibula nichoola, bone, yoobbao amahwaana. 25Omwaana otaangira yatula niyaahaanye, omubiri nikweechulaho obwooya. Mani nibamukuliha Esau. 26Ebiha bidiidi nibyabitao, omwaana wohubiri yesi yatula, omuhono kwae nikudiirire hu sisisiro sya Esau. Mani nibamukuliha Yakobbo. Rebbeka yeebula abaana bano Yisaka naali neende emyaaka amahumi kasaasaba.
Esau akusa ehabi yae koti omwaana waamberi
27Abaana bano nibahula, Esau yali omuyiimi muchweenufu muno, haandi omwaana waheera muno obulamu bw'erwaanyi. Nae Yakobbo yali omwaana muwuleerefu muno, owamenyaanga sa mu ngo. 28Yisaka yali yaheera muno Esau, olwohuba yalichaanga hu nyama ch'ebisolo biyetaanga; nae Rebbeka yali niyaheera muno Yakobbo.
29Olwoola, Yakobbo niyali nadeehaanga ebyohulya, Esau yakobola naatula ohuyiima, enjala niyimuluma muno. 30Mani Esau yaboolera Yakobbo ati, “Enjala yiinjita-bwiita, leha ng'weho sa omuunyu ku oli ohudeeha okwo!” 31Yakobbo nae yamukobolamo ati, “Taangira wuumberese eby'obusiha byao koti omwaana waamberi, hu male huberese.” 32Nae Esau yaboola ati, “Ese ngaandi mbano ndi aambi ohufwa-bufwa. Obusiha bw'omwaana waamberi bwaange buno buchia ohuuhoonya butye nifwiire?” 33#Abaib 12:16.Yakobbo haandi yaboola ati, “Taangira mani wuundeechubire.” Mani Esau yamweechubira, n'akusa Yakobbo obusiha bw'omwaana waamberi bwae. 34Mani Yakobbo yaaberesa Esau omugaati neende omuunyu kw'eng'ooli ch'olaayo bidiidi biti byoong'ene. Esau yalya haandi yaang'wa mani yaasiingira yeweerao. Olwo nilwo lu Esau yafwiirwa eby'obusiha byae koti omwaana waamberi.
Currently Selected:
Ohuchaaka 25: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019