Ohutula 31

Abahalaabani b'ohwoombaha Eyeema ly'Ohubaao hw'Omwaami

(Hut 35:30—36:1)

1Omwaami yaboolera Musa ati, 2“Ese ndadoola Bbesaleeli, omwaana wa Wuri haandi omwiichulu wa Huuri, ohutula mu nono ya Yuda, 3mani mwichuusemo Mwooyo wa Nasaae. Mubeere obunyala bw'ohumanya, obumanyirifu, neende obunyala bw'ohuhola buli mulimo kudaha ohuyiiya 4ohuhola endekeha y'ohuyiiya emera y'ebiindu neende ohubihola mu esaabbu, efeesa, neende mu mugasa; 5mu huheenga ebbaangili chichia ohutekehwa; ohubaacha ebiindu mu mbaao; haandi neende aka buli mulimo kwoosi okudaha ohuyiiya. 6Haandi ndooleremo Oholiabbu, omwaana w'Ahisamaki, ohutula mu nono ya Daani, oba ahole nae. Haandi mbereese obunyala buhunuufu abaandu baandi bahalaabani bamanyirifu boosi, hu banyale ohuhola buli siindu syoosi si ndagira endi siholwe: 7Eyeema ly'Ohubaao hwaange, Esanduuku ly'Endagaano alala neende esifuuniho syahwo, neende ebiindu byoosi ebichiira hu Yeema elyo, 8emeesa neende ebyehoonyerwaho byoosi, esiteeni sy'etaara esy'esaabbu haya alala neende ebyehoonyerwaho byoosi, alutaari y'ohuniooheseraho obubbaani, 9alutaari y'ebiyaanwa bisaambe alala neende ebyehoonyerwaho byoosi, engaraaya y'ohweyoseraho neende obwiihaliro bwaachio, 10ebyefwaalo by'obulaamisi by'esiroonyo bya Arooni neende abaana bae ohwehoonyeraanga nibahalaabana koti abalaamisi, 11amafuta kachuhwa nikaawula, neende obubbaani buwunya esing'aari silai muno ako Abuundu Woolerefu. Mu huhola ebiindu bino byoosi, bahoyere ohuba nga banyala ohubihola sa koti lu hulagiire.”

Sabbaato, oludaalo lw'ohuwuluuha

12Haandi Omwaami yalagira Musa 13ohuboolera abaandu ba Yisiraeli ati, “Liindeenge Sabbaato, oludaalo lwaange lw'ohuwuluuha, olwohuba aho niho ahalolero hali akatikaati weeng'we neende naange endaalo choosi echiicha, aheekesa mbwe ese, Omwaami, mbaholere mube abaandu baange syeeng'ene. 14Muhoyere ohuliinda Sabbaato, oludaalo luno olw'ohuwuuluha, olwohuba lwoolerefu nilwo. Oyo yeesi otaluliinda, mani yeholera emirimo hu ludaalo olwo, ahoyere ohwiitwa. 15#Hut 20:8-11; 23:12; 34:21; 35:2; Lef 23:3; Amal 5:12-14.Eng'we muli neende endaalo chisaasaba chi muhoyere ohuholeraangamo emirimo kyeeng'we, nae olw'ohutaanu-na-habiri ludaalo lwoong'ene lw'ohuwuluuha olwandeherwa ese omweene. Oyo yeesi ohola omulimo kwoosi hu ludaalo olwo, ahoyere ohwiitwa. 16Abaandu ba Yisiraeli bahoyere ohuliinda Sabbaato koti ahalolero h'Endagaano. 17#Hut 20:11.Hano halolero h'olubeerera akatikaati w'abaandu ba Yisiraeli naange, olwohuba ese Omwaami, ndahola Ekulu neende esyaalo mu ndaalo chisaasaba, mani hu ludaalo lw'ohutaanu-na-habiri ndaakama ohuhola emirimo mani ndaawuluuha.”

18Bulaanu Nasaae niyamala ohulomaloma neende Musa hu Lugulu lwa Sinai, yamuberesa ebituundu bibiri eby'amakina hu Nasaae mweene yali niyaandiikireho amalako ako.

Currently Selected:

Ohutula 31: SAMDC

Highlight

Copy

Compare