Ohutula 13

Ohuyaanwayo hw'ebiibulwa byaamberi eyiri Nasaae

1Omwaami haandi yaboolera Musa ati, 2#Hub 3:13; Luk 2:23. “Waayo abaana baamberi basyaani boosi yi ndi; buli siindu syaamberi esiikula-eenda mu baandu ba Yisiraeli, esy'abaandu neende esy'ebisolo, byaange nibyo.”

Esidyaalo sy'emigaati kitaabbaahirwe

3Musa yaboolera abaandu ati, “Mwiichuliseenge oludaalo luno lu mwatulira mu Misiri, esyaalo simwalimo koti abawaambe. Luno nilwo oludaalo lu Omwaami yabatusiramo neende obunyala buhoongo muno. Kubulao omugaati mubbaahe kwoosi okucha ohuliibwaanga. 4Olwaalero muli ohutula mu Misiri, mu mwoosi kwaamberi, omwoosi kwa Abbiibbu. 5Omwaami wuno yeechubira elalira bakuuka yeeng'we ohuberesa eng'we, esyaalo sy'Abakanani, Abahiiti, Abaamoori, Abahiifi, neende Abayebbusi. Mani naabeengisa mu loba yiinda haandi elai elyo, muhoyere ohuhuholaanga Esidyaalo sino mu mwoosi kuchaaka buli mwaaka. 6Hulw'esiha sy'endaalo chitaanu-na-chibiri muhoyeere ohuliichaanga emigaati kitaabbaahirwe haandi hu ludaalo lw'ohutaanu-na-habiri olwo yihoyeere ohubaao Esidyaalo siisa oluyaali mu Omwaami. 7Hulw'esiha sy'endaalo chitaanu-na-chibiri esyo simuhoyeere ohuliichaanga omugaati kwoosi okwateebwamo amamera; siyihoyere ohubaao amamera koosi oba emigaati mibbaahe abuundu woosi mu loba lyeeng'we. 8Esidyaalo esyo nisiba nisichaaka, nyonyooleenge abaana basyaani beeng'we bulai muti, muholaanga bino byoosi ohweema hu biindu bi Omwaami yabaholera nimwali hu mutula mu Misiri. 9Ohuhola muti, sichia ohuba esiichuliso, koti esiindu si waboya hu muhono, oba mu bweeni bwao; sichia ohubeechulisaanga ohutuumbulaanga mu mboosi, haandi neende ohwehaliirisaanga amalako k'Omwaami mandiike, olwohuba Omwaami oyo niye owabatusa mu Misiri niyehoonyera obunyala bwae bw'amaani muno. 10Muholeenge Esidyaalo sino esiha siba nisiteerweo mu buli mwaaka.

Esiibulwa syaamberi

11“Omwaami achia ohubaleeta abeengise mu syaalo sy'Abakanani, si yeechubira elalira ohubaberesa haandi neende ohuberesa abeechuhulu beeng'we. Mani n'ababeresa, 12#Hut 34:19,20; Luk 2:23.muhoyere ohuyaanayo buli siibulwa syaamberi sisaacha eyiri Omwaami. Buli sisolo sibulwa hu bisolo byeeng'we syaamberi sisaacha, sy'Omwaami nisyo. 13Nae kata katyo eng'we muhoyere ohumukulaangaho buli suhiri yiibulwa eyaamberi esaacha nimukulaasaniamo neende ekoondi doto saacha mu bweyaango bwasyo. Nae nooba n'otadaha ohukula weefunyisire esuhiri yao, mani halakaanga ekosi lyayo. Olwohuba, ohoyere ohukulaanga niweekobosera buli mwaana wao waamberi musyaani. 14Mani mu biha biicha mu moni, omwaana wao naaba n'ahuteebaanga bi muholo kuno kweekesa, oba onaamukoboleengemo oti, ‘Omwaami niyehoonyera obunyala bwae bw'amaani muno, yatutusa mu Misiri, esyaalo si hwalimo koti abawaambe. 15Omutuki wa Misiri niyaangalala, mani yahaya ohutuleha hwechiira, Omwaami yeeta buli siibulwa syaamberi sisaacha esyali mu syaalo sy'e Misiri, abaandu neende ebisolo nasilala. Sino nisyo esikera nihuyaanaangayo buli sisolo siibulwa syaamberi sisaacha, eyiri Omwaami oyo, nae haandi nihukula nihwekobosera abeene abasyaani beefwe beebulwa baamberi. 16Mani ohuhola huti, sichia ohuba esiichuliso, koti esiindu esyeboywa hu muhono kwao oba hu bweeni bwao; sino sitwiichulisaanga siti, Omwaami oyo niye owatutusa mu Misiri neende obunyala bwae bw'amaani muno.’ ”

Omusiiro kw'esireesi neende omusiiro kw'omuliro

17Omutuki wa Misiri niyalehuula abaandu abo ohuwaao, Nasaae haba siyababisira hu ngira yiniina niyichiira hu lwaasi lwa Filisiti, kata neende niyali enyimbikiti yihiramo. Nasaae yabaasa ati, “Ese haba siindaha abaandu bano boole ohukaluuhania ebibaaso byaabwe baakobola Misiri nibabona bati hane yi bali ohuchia bicha ohubayiika ohulwaana eye.” 18Mubweyaango obwo, yababukula yaababisira hu ngira yifwaana koti eyebodoohania niyikobola yi yitula, eyali niyibitira mu siparara niyichoomere Enyaanja Njahanyu. Kata katyo, Abaisiraeli bano bali nibeliindire neende ebilwaaniro ohulwaana ebiita.

19 # Huc 50:25; Yos 24:32. Musa yakiinga amakuumba ka Yosefu yaachia nako, koti lu Yosefu yali niyahola Abaisiraeli boola ohuhola esichubo sy'amaani ohuhola batyo. Yosefu yali niyaboola ati, “Nasaae n'alyoola ohubanunula, muhoyere ohukiinga omubiri kwaange mwaachia nakwo mwaakutusa mu syaalo muno.”

20Abaisiraeli batula mu Sukoti mani baachia boombaha ekaambi Etamu hu ndulo w'esiparara. 21Nibwalichiingi esideete ng'alang'ala, Omwaami yabeemiriraanga naali mu siiro y'esireesi yabeekesaanga engira, nae nibwalichiingi esiro, yabeemiriraanga naali mu siiro y'omuliro ohubaberesaanga obulafu, hu banyale ohukeendaanga esiro neende esideete. 22Esiiro y'esireesi yali yamenya sa niyiri mu moni w'abaandu esideete, nae esiiro y'omuliro yosi yaliichiingi yityo mu siro.

Currently Selected:

Ohutula 13: SAMDC

Highlight

Copy

Compare