Baruku 2
2
1“Omwaami sakira yooseresa emboosi chi yalomaloma n'atutiisa, efwe neende abakayi beefwe abo abali nibaheengera Yisiraeli emisaango, neende abatuki beefwe, abachweenufu beefwe neende abaandu ba Yisiraeli neende abomu Buyudaaya. 2Ebyaholwa mu Yerusalemu haba sibiholwaanga abuundu woosi hu syaalo, ohuchianakana neende ebyandiikwa mu malako ka Musa. 3Hwachaaka kata ohulya abaana beefwe basyaani neende abahaana. 4Omwaami yasalaania abaandu beefwe, mani batukwa neende ebyaalo byoosi ebitwebodohaanie. Batunyeka haandi batumalamo oluyaali mu baandu boosi abatwebodohaanie. 5Hwonoona mu moni w'Omwaami Nasaae weefwe, mani nihuhaya ohuwulira bi atuboolera, sakira hweeswa aasi abuundu sy'ohuniina aakulu.
6“Omwaami Nasaae weefwe muluungifu buli siha, nae efwe alala neende bakuuka yeefwe husidiirirwe esoni ohwoola buti. 7Amasira ako koosi ka Omwaami yaboola ati kahatukweeho mbao kamalire ohutukwaaho. 8Nae kata katyo, huhayire ohulaama Omwaami, buli muundu hweefwe n'aleha ebibaaso byae bibi. 9Omwaami atukwiisireho amasira kayatutekehera, olwohuba Omwaami muluungifu mu buli siindu si yatulagira ohuhola. 10Nae kata katyo, hwahaya ohuwulira bi atuboolera, mani hwakeendera mu malako k'Omwaami yatuberesa.”
Esaala y'ohununulwa
11“Eee Omwaami Nasaae wa Yisiraeli, ewe owatusa abaandu bao mu syaalo sy'e Misiri n'ohola eby'amaani niwehoonyera obulolero neende ebiwuukisa alala neende obunyala bwao bw'amaani. Wenyolera efuma eyitahaakame ohwoola bulaanu buti. 12Ewe Omwaami Nasaae weefwe, hwonoona. Haba sihwali abeesikwa haandi hwajeemera amalako kao. 13Lehera ao ohutunyoolerera, olwohuba hudoong'ere abadiidi muno mu byaalo bi watusalaaniamo. 14Ewe Omwaami, wulira ohulaama hw'ohulira hweefwe, mu luyaali lwao, tununule. Leha abo abatuleeta mu bukulwa batuheere. 15Ao mani esyaalo syoosi sichia ohumanya siti, niiwe Omwaami Nasaae weefwe, haandi siti wadoola esyaalo sya Abaisiraeli neende abeechuhulu baabwe ohuba abaandu bao beene.
16Ewe Omwaami tingaala n'oli mu bwiihalo bwao bwoolerefu mani otudeebeho. Ewe Omwaami, tukeresa mani owulire. 17Ewe Omwaami, tingaala mani obone; abo abafwa abali mu syaalo sy'abafu, abo abatanyala huyeera, haba sibanyala huhuberesa oluyaali daawe. 18Nae abalamu nibo abanyala ohuhuberesa oluyaali haandi beekesa koti lu oli omuluungifu, Ewe Omwaami. Kata bahaba nibasaanda muno haandi nibekoderemo, nibaweeremo amaani haandi enjala niyibaluma, emoni nichitabona bulai.
19Ewe Omwaami Nasaae weefwe, huhwekongooya omweene otukwiire esisa, ataali ohweema hu bilai bi bakuuka yeefwe oba abatuki beefwe bahola. 20Olwohuba watunyoolerera mani watudiirira etima, koti lu wali n'olomaloome niwehoonyera abahalaabani bao abanabbi, n'oboola ati: 21“Omwaami aboola ati, ‘Mweekode amabeka mani muhalaabanire omutuki wa Bbabbilooni, mani muchia ohudoong'a mu syaalo si ndaberesa bakuuka yeeng'we.’ 22Nae nimuhaya ohuwulira bi Omwaami ababoolera, mani mwaahaya ohuhalaabanira omutuki wa Bbabbilooni, 23njia ohwaakamya amakono k'abaandu basaangaala neende abeehoya, amakono k'abadeehya neende ak'abeeya, katulire elalira mu biko byomu Buyudaaya neende ebituundu byebodohaanie Yerusalemu. Mani esyaalo syoosi sichia ohuba ekuunda, omubulamo omuundu omenyamo.”
24“Nae hwahaya ohuwulira bi watulagira oti huhalaabanire omutuki wa Bbabbilooni. Mani wosereese bi waboola ohuhola n'obitira mu bahalaabani bao, abanabbi oti amakuumba k'abatuki beefwe neende aka bakuuka beefwe kahasiihulwe mu ng'ani chaabwe. 25Bulaanu bona, kasukuunwe erwaanyi, esideete omubasu kukoobba, nae esiro emboo yikadiira. Bafwiira mubuchuuni buungi muno, beetwa neende enjala, olugaanga neende amalwaae. 26Olw'ebibi by'abaandu ba Yisiraeli neende Ebuyudaaya, enyuumba yao yi liita lyao lyamenyaangamo, yayireha yibe mu ngeri mbi yi yirimo bulaanu buti.
27“Nae Ewe Omwaami Nasaae weefwe, olw'esisa syao neende ohulehera hwao huungi, watudiira kaala, 28koti lu wasuubisa Musa omuhalaabani wao hu ludaalo lu wamulagira ohwandiika amalako kao. Abaisiraeli nibawulira, n'oboola oti, 29‘Nimutawulira emboosi chaange,’ obunabuungi bw'abaandu bano bachia ohuhendeera babe abadiidi mu byaalo bi njia ohubasalaaniamo. 30Olwohuba manyire endi haba sibacha humbulira daawe, olwohuba bali neende emyooyo myoomeranu. Nae nibahabe mu syaalo sy'obukulwa, eyo niyo yibahechulise 31mani bamanye bati, Niise Omwaami Nasaae waabwe. Ndahababerese omwooyo kuwulira neende amatwi katekeeresa. 32Mwahanjichulise mani mukinie eliita lyaange mu syaalo sy'obukulwa. 33Bahalehere ao esyeejo syaabwe neende ebiholwa byaabwe bibi. Olwohuba baheechulise ebyakwa hu bakuuka yaabwe abahola ebyonoono mu moni w'Omwaami. 34Njia ohubakobosa haandi mu syaalo si ndeechuba ohuberesa bakuuka baabwe, Abburahamu, Yisaka neende Yakobbo. Esyaalo esyo haandi syahabe esyaabwe. Njia ohubeengiya babe abaangi, haandi sibahahendeerere daawe. 35Ndahahole nabo endagaano y'endaalo choosi. Ndahabe Nasaae waabwe, nabo bahabe abaandu baange. Abaandu baange, Abaisiraeli haandi sindahabatuse daawe mu syaalo syaabwe si ndababeresa.”
©Bible Society of Kenya, 2019
©Bible Society of Uganda, 2019