1 Abamakabbewo 2
2
Obwadyeeri bwa Matatia
1Mu ndaalo echo, Matatia, omwaana wa Yowaana, omwichuhulu wa Simeoni, omulaamisi ow'enyuumba ya Yoaribbu, yatula mu Yerusalemu, nawuuyira Modeini. 2Matatia yali neende abaana bae basyaani bataanu: Yowaana, olaangwa, Gaadi, 3Simooni, olaangwa, Taasi, 4Yuda olaangwa ati Makabbeo, 5Eliasaari, olaangwa Afaraani, neende Yonatani, olaangwa, Afusi. 6Matatia niyabona ebyonoono biholerwa mu Yudea neende mu Yerusalemu, 7yaboola ati:
“Chiinjakaanire! Lwasiina ese ndeebulwa ohubona sino,
abaandu b'esyaalo syaange, neende esiko syoolerefu sino nisisihiirira,
neende ohusimenyamo nisiyirwa neende omusuku,
haandi esiko syoolerefu nisiyirwa neende abateende?
8Enyuumba ya Nasaae yeholere koti omuundu otaali neende oluyaali.
9Ebiindu byaamwo by'oluyaali, binyakirwe mani nibiyirwa.
Abaana badoto baamwo beeteerwe mu makira.
Abaraaga baamwo beeterwe neende olugaanga lw'omusuku.
10Buli syaalo siwaambire amadooho kasyo
haandi siyayire obuyiinda bwasyo.
11Ebiindu by'esiroonyo byoosi biyirirwe.
Haba sisisyetuka daawe, syeholere esiwaambe.
12Mani bone, Abuundu Woolerefu syeefwe, obulai bweefwe,
neende oluyaali lweefwe binyasiihe,
abateende basinyaasire.
13Mani lwasiina husisiiriwo abalamu?”
14Mani Matatia neende abaana bae, nibataandula engubo chaabwe, nibefwaala ebigunia, nibadiirwa engisa enyiingi muno.
15Ao mani bawamwaanda bo omutuki watuma ohuyiika abaandu ohwekaana efukisirira yaabwe nibeecha mu siko sya Modeini ohuyiika abaandu ohuyaana ebiyaanwa. 16Abaandu baangi mu Yisiraeli nibachia yi bali ohubukaanana nabo. Omwo nimwo omwaali Matatia neende abaana bae. 17Bawamwaanda b'omutuki nibaboolera Matatia bati: “Ewe oli omweemeresi, omuhunuufu haandi owiiswamo oluyaali mu siko sino. Haandi abaana bao neende bamwaanamaao bahuseemba. 18Bulaanu ewe niiwe oba otaangire ohwiichia mani ohole ebyo bi mutuki alagira, koti abateende boosi neende Abayudaaya neende abo boosi abadoong'a mu Yerusalemu bi baholere. Mani ewe neende abaana bao muchia ohubalirwa mu beecha b'omutuki, haandi ewe neende abaana bao muchia ohunyoola oluyaali mani mubereswe efeesa neende esaabbu, neende ebiyaanwa biindi biingi muno.” 19Nae Matatia n'akobolamo n'alomalomera mu kono ly'aakulu ati: “Kata ebyaalo byoosi ebiri mu bwaami bw'omutuki nibinaamuwulire, haandi nibiheengereo ohuhola bi mutuki alagiire, mani nibafukiriire ohulehana neende efukiirira ya bakuuka yaabwe, 20nae ese, neende abaana baange neende bamwaanaama, huchia ohwemeeda ohuliinda Endagaano ya bakuuka yeefwe. 21Haba sihunyala kata nabudiidi ohuleha amalako ka Nasaae, neende ebilagiro byae. 22Haba sihuchia huwulira amalako k'omutuki, haandi sihunyala ohuleha ediini yeefwe kata nabudiidi.”
23Niyali niyahamala ohulomaloma ebyo, Omuyudaaya mulala niyeetusayo abaandu boosi nibamubona, niyeecha ohuyaana esiyaanwa hu alutaari mu Modeini koti omutuki lu yali n'atusire omunwa. 24Matatia niyamubona, etima nilimudiira neende omwooyo kuchuunirwa amalako ka Nasaae. Yafukiirira etima ly'obuluungifu; mani n'abichuhayo namwiitira hu alutaari eyo. 25Haandi Matatia niyeeta wamwaanda w'omutuki owali nayiika abaandu ohuyaana ebiyaanwa, mani n'afunaka-funaka alutaari eyo. 26Olwo nilwo lu Matatia yekesa koti lu achuunirwa amalako ka Nasaae, koti lu Finehaasi lu yahola, koti lu yeeta Simuri, omwaana wa Salu.
Matatia achaakisa ebiita ebyohwebondeerera
27Ao mani Matatia n'abita mu siko n'ahumulira mu kono ly'aakulu, n'aboola ati: “Leha buli muundu ochuunirwa amalako ka Nasaae, haandi oliinda Endagaano yae, Yanoondeho.” 28Ao mani Matatia neende abaana bae nibeeruhira mu bigulu, nibaleha ebiindu byaabwe byoosi mu siko esyo.
29Ao mani Abaisiraeli baangi abali nibakoonya obuluungifu neende obwadyeeri nibachia mu sichiimi nibamenya eyo. 30Nibachia neende abaana baabwe, neende abahasi baabwe neende ebisolo byaabwe, olwohuba babasaandya muno. 31Mani emboosi nichoolera bawamwaanda b'omutuki, neende abasikaari bae abali mu Yerusalemu, mbwe abaandu bali nibajemeere amalako k'omutuki bali nibeeruhiire mu sichiimi ohweekisa eyo. 32Abasikaari baangi nibabakiiya, mani nibafuumbula yi bali. Nibabeebodoohania nibeetekeha ohubaseeta hu ludaalo lwa Sabbaato. 33Ao mani nibaboolera bati, “Sino simala! Tuleyo mani muhole si mutuki alagira, olwo nilwo lu muchia ohuwonia obulamu bweeng'we.” 34Nae nabo nibakobolamo bati: “Haba sihuchia hutulayo, noomba ohuwulira amalako k'omutuki, noomba ohunyaasa oludaalo lwa Sabbaato.” 35Ao mani abasuku abo nibaanguya ohubaseeta. 36Nae Abayudaaya nibatabakobolamo esiindu syoosi, oba ohwelwaanaho oba ohubasukunaho amakina, oba ohubeekalira emilyaango ky'abuundu yi bali nibeekisire daawe. 37Olwohuba baboola sa bati: “Lehe fweesi hufwe nihutaaliho emisaango. Ekulu neende esyaalo nibyo ebimanyire biti, mutwiitira buhaya ataali omusaango kwoosi.” 38Ao abasuku nibabaseeta hu ludaalo lwa Sabbaato, mani nibabeeta alala neende abahasi baabwe, neende abaana baabwe, neende ebisolo byaabwe. Abaandu beetwa bali niboola elifu ndala.
39Matatia neende abaasye nibawulira esyo, engisa nyiingi mani niyibadiira, nibalira muno. 40Mani abeene-na-beene nibaboola bati: “Nihunahole koti Abayudaaya basyeefwe abo baholere, mani hwahaya ohulwaania abateende abo, ohuwonia obulamu bweefwe neende ediini yeefwe, huchia ohusihiriswa bwaangu muno huwe hu syaalo.” 41Hu ludaalo olwo, mani nibaheengao bati: “Lehe hulwaanie omuundu yeesi owiichia ohutuseeta hu ludaalo lwa Sabbaato. Lehe huhaye ohufwa fweesi koti lu basyeefwe bafwiira mu ng'uungu mu bali nibeekisire.”
42Ao mani Abayudaaya abali nibachuunirwa esyaalo syaabwe nibeyambaania hu Matatia neende abaasye. Mani abasaacha bahiriramo elalira amaani mu Yisiraeli, abali nibeetusireyo abeene ohulwaanira amalako ka Nasaae. 43Neende abo boosi aberuhaanga nibatya ohwiitwa nibabeyambaaniaho mani nibabameedamo amaani. 44Mani nibeehola eye, etima nilibadiira nibaseeta Abayudaaya abahola-mbi. Abo Abawonao nibeeruhira eyiri abaandu b'ebyaalo biindi ohweewonia. 45Matatia neende abaasye mani nibachia buli abuundu, nibafunaka-funaka alutaari echo. 46Haandi nibaheba olw'amaani buli mwaana musyaani owali nataahebwa, yibanyoola mu bituundu byomu Yisiraeli. 47Mani nibachaaka ohuyiima bawamwaanda b'omutuki abo abatula mu byaalo biindi, abali nibehuduumbasa. 48Mani nibaabina amalako ka Musa ohutula mu bunyala bw'abaandu baandi neende abatuki baabwe, haandi haba sibafukiirira abahola-mbi ohuba neende obunyala bwoosi daawe.
Ohufwa hwa Matatia
49Bulaanu endaalo cha Matatia ech'ohufwa nichoola, Matatia yaboolera abaana bae ati: “Ebiha bi hulimo bino, biha by'etima neende obwaalaba; abaandu beehuduumbasa nibo abali mu bunyala, batusaandya muno. 50Nae bulaanu eng'we baana baange, muhoyerwa ohuchuunirwa muno amalako ka Nasaae, neende ohweyaanayo ohulwaanirira Endagaano yi Nasaae yahola neende bakuuka yeefwe. 51Yichulise ebiindu bi bakuuka yeefwe bahola mu ndaalo chaabwe. Hole koti lu bahola mani munyoole oluyaali neende eliita litaheebirirwe daawe. 52Yichulise koti lu Abburahamu yateemwa, nae niyeesika Omwaami, haandi Omwaami yamusiima koti omuundu muluungifu olw'obweesikwa bwae. 53Yosefu mu biha biyasaandiramo, yadiira amalako k'Omwaami mani niyeehaswa ohuba omutuki mu syaalo sy'e Misiri. 54Kuuka yeefwe Finehaasi, olwohuba yachuunirwa muno ebya Nasaae, yanyoola Endagaano ati, abeechuhulu bae bahabeecheenge abalaamisi endaalo choosi pe. 55Yosua, olwohuba yoseresa ebyo bi Omwaami adaha, yehola omulamusi mu Yisiraeli. 56Kalebbu, olwohuba yaleeta emboosi ndai eyiri abaandu, yabereswa eloba koti esisiimo. 57Daudi, olwohuba yali ow'esisa, yabereswa obutuki butaakama daawe. 58Elija, olwohuba yachuunirwa muno amalako ka Nasaae, yayirwa muukulu. 59Hanania, Asaria neende Misaeli, olwohuba bali neende efukiirira, bawonesebwa ohusaambwa omuliro. 60Danieli, olwohuba yali neende omwooyo kutaaliho musaango, yatuswa mu munwa kw'edalang'i.
61“Mani bone muti, mu buli muleembe, abo abeesika Omwaami haba sibasihirira daawe. 62Mutatichaanga emboosi ch'omuhola mbi daawe, olwohuba achia ohufwa mani oluyaali lwae lwaakame n'abolere haandi enyeende chimulye. 63Olwaleero achia ohukinisibwa, nae nibuhya, haba s'achia hubonehaho daawe, olwohuba yahabe n'akobooleyo mu lufu luyatulamo, haandi bi atekeehe ohuhola byahabe nibiweereo. 64Nae eng'we baana baange, gume haandi mube ab'amaani mu hudiira amalako ka Nasaae, olwohuba kahababerese oluyaali.
65“Bulaanu bone, manyire endi Simeoni, omwaana weeng'we mukeraki mulai. Mumuwulireenge buli ludaalo; achia ohuba laata yeeng'we. 66Yuda Makabbeo w'amaani muno ohutulira elalira mubuyere bwae. Niye ochia ohwemerera eye lyeeng'we mu biita nimulwaania abasuku. 67Laange abo boosi abadiira amalako ka Nasaae babeyambaanieho, mani hu munyale ohwetuunga ebyonoono biholwa hu baandu beeng'we. 68Mwetuungire elalira ebiindu bi bateende babahola, haandi holeenge bi malako ka Nasaae kadaha.”
69Ao mani Matatia n'ababeresa ehabi, n'amala n'afwa. 70Yafwa mu mwaaka kw'emia ndala neende amahumi kane neende chisaasaba (146). Abaana bae nibamusiiha mu ng'ani ya bakuuka bae Modeini. Abaisiraeli boosi nibalira Matatia neende amaliro maangi muno.
©Bible Society of Kenya, 2019
©Bible Society of Uganda, 2019