Sefania 3
3
Esyonono sya Yerusalemu neende ohununulwa hwasyo
1Yerusalemu chasinyoola, esyo esyanyaasiha, esiko syahayuya, esifwiinyiriraanga abaandu basyo beene. 2Syahaya ohuwulira Omwaami, kata sa ohukanya esomo lyae. Syahaya ohuta obweesikwa bwasyo mu Omwaami, kata sa ohumusaba obuhoonyi bwae. 3Abahoongo basyo bafwaana koti edalang'i chibuluula; abakayi basyo bali koti amabbwe kali njala, neende okuliira kubitiirifu okutabakanya kata baalehao ekuumba lala lyahyeesa. 4Abanabbi haba si badeebayo daawe, haandi babachirisi; abalaamisi banyaasa buli siindu syoolerefu, haandi bakodya amalako ka Nasaae nikakwiira bi beedahisa abeene. 5Nae Omwaami asisiiri mu siko omwo; aholaanga esiba nisihoyera ataali ohuholaho esitahoyera. Buli chuli ataali ohukwa, aletaanga obwaakaniliri eyiri abaandu bae sa. Nae abaandu bataali abaluungifu bali mu bweene omwo bemeeda sa ohuholaanga ebitahoyera neende esimyeeni.
6Omwaami aboola ati, “Ese ndeeyaho ndaamala abaandu boosi mu byaalo; ndasihirisaho ebiko byaabwe ndaalehaanga ebida byaabwe neende eminaara kyaabwe mu saando. Ebiko byajwang'wa; amakira mahaya abulao omuundu yeesi owadoong'ao daawe. 7Ese ndabaasaanga endi ohweema ohwo abaandu baange banyala ohuchaaka ohunjisaangamo oluyaali, mani bakanya ohukolola hwaange, endi fwaana haba si balinyala ohwiibiriraho elyeeko li mba nindabeekesa. Nae kata katyo, abweene neende abweene ao, bachaakiraniramo sa ohwebisaanga bubi koti sa hale.”
8Mani Omwaami aboola ati, “Ewe liindaho sa mberi mani obone. Liinda oludaalo lu njia ohusiingiriraho ohuta omusango hu ebiko ebyo. Ese malire ohuheengao ohubuusa alala ebyaalo byoosi neende obwaami bwoosi, hu nyale ohukera bawuliraho amaani k'etima lyaange. Esyaalo syoosi sichia ohusihiriswa neende omuliro kw'obwaalaba bwaange.
9“Mani ese njia ohukaluuhania abaandu bomu byaalo, banyale ohulaamaanga eyiri ese syeeng'ene ataali banasaae baandi daawe. Boosi bachia ohuumbuliraanga. 10Kata ohutula eyale koti mu Etiopia, abaandu baange bachia ohundeeteraanga ebiyaanwa. 11Esiha esyo, abaandu baange, sibachia ohudiirwaanga esoni hulwa koti lu bali ni banjeemera. Ese njia ohutusao buli muundu yeesi ochia ohuba niyesuunga haandi niyeniinia, mani ewe haba s'ochia ohuunjemeraho ehabi liindi daawe ni ndi hu lugulu lwaange lwoolerefu. 12Ese njia ohulehao abaandu abaloonga haandi abeeyisa aasi, abo abachia ohwichaanga yi ndi nibakoonya obuhoonyi. 13#Hubwi 14:5.Abaandu ba Yisiraeli abachia ohuwonao sibachia ohuholaanga omuundu yeesi esitahoyera, ohubachaanga, kata sa ohuteemangaho ohuboola obubacha. Bachia ohuhula-hulana haandi abomu muleembe, nibatatya omuundu wuundi yeesi.”
Olweembo lw'esangaalo
14Yembe mwehuume neende esangaalo, eng'we abaandu ba Yisiraeli!
Sangaala neende omwooyo kwao kwoosi, ewe Yerusalemu!
15Omwaami amalire ohumalao esibonereso syao;
amalire ohumalao abasuku bao boosi.
Omwaami, omutuki wa Yisiraeli, ali naawe;
abulao esifune bulaanu esikera nootya.
16Esiha sichia ohwoola, nibachia ohuboolera Yerusalemu bati,
“Otatya daawe, ewe esiko sya Siyooni!
Otakanya amahono kao kereera nikadeembuuhe!
17Omwaami Nasaae wao ali naawe;
obunyala bwae nibwo obuhuberesa obuyiingiri.
Omwaami achia ohuhusaangaaliramo,
haandi obuheeri bwae nibwo obuchia ohukera ahuberese obulamu buyaaha.
Achia ohuhweembera haandi ohuhusaangaalira,
18koti abaandu basaangalaanga nibali hu sidyaalo.”
Omwaami aboola ati,
“Ese malire ohumalao ohutiisa hw'esaando
haandi neende ohumalao ohudiirwa esoni
19Esiha sichia ohwoola!
Ese njia ohusaandya abahufwiinyirira;
Ese njia ohununula abalema boosi
mani ngobose abeeruha boosi engo.
Ese njia ohukaluuhania esoni chaabwe cheehole oluyaali,
mani esyaalo syoosi sihufumie.
20Esiha sichia ohwoola!
Ese njia ohukoboseramo abaandu bao basalaana engo;
Ese njia ohuhuhola omanyihane mu syaalo syoosi
mani huhole ohulaahulane haandi.”
Omwaami niye olomaloome.
Currently Selected:
Sefania 3: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
