Sekaria 9
9
Ohuheengera ebyaalo bibebodohaanie omusaango
1 #
Yis 17:1-3; Yer 49:23-27; Amos 1:3-5. #Yis 23:1-18; Esek 26:1—28:26; Yoel 3:4-8; Amos 1:9,10; Mat 11:21,22; Luk 10:13,14. Yino niyo emboosi y'Omwaami:
Yamala ohuheengao ohusaandya esyaalo sya Haduraaki neende esiko sihuluundu sya Damasiko. Haba si nono chia Yisiraeli choong'ene nae kata neende esiko sihunuufu sya Siria syosi sy'Omwaami nisyo. 2Hamati, esisibirana neende Hadiraki, syosi syae nisyo, haandi kata neende ebiko bihunuufu bya Tiiro neende Sidoni, alala neende amakesi kabyo keene. 3Tiiro syamala ohweyoombahiraho engoba, haandi syabuunga ebituuli by'efeesa neende esaabbu byadabaadaba koti ebikoha! 4Nae Omwaami achia ohumalao buli siindu sisiri nasyio. Achia ohusukuna obuyiinda bu siri nasyo mu nyaanja, mani esiko sihunuufu syasyo sisaambwe siweere aasi.
5 #
Yis 14:29-31; Yer 47:1-7; Esek 25:15-17; Yoel 3:4-8; Amos 1:6-8; Sefa 2:4-7. Esiko sihunuufu sya Asikelooni sichia ohubona sityo mani sitye. Esiko sihunuufu sya Gasa syosi sichia ohubona sityo mani sichuunwe ebilulu. Nilwo lu Ekironi, alala neende ebisuubirwa byasyo bicha ohusakuulibwa. Gasa sichia ohusuba omutuki wasyo, nae Asikelooni sichia ohuwuuywamo. 6Abaandu b'amabaanga kachookanire bachia ohumenyaanga mu Asidoodi. Omwaami aboola, “Ese njia ohunyisa Abafilisiti b'esuunga bano boosi. 7Haba sibacha ohunyala ohulichaangaho enyama yirimo amabaanga daawe, kata neende ebyohulya byasirwa biindi byoosi daawe. Abo boosi abawoniao bachia ohuba balala hu baandu baange mani babe koti enyuumba ndala mu nono ya Yuda. Ekironi syosi sichia ohuba silala hu baandu baange, koti sa Abayebbusi bali. 8Ese njia ohuliinda esyaalo syaange esyo, mani ngaire amaye koosi ohunyala ohusihalakaniamo. Ese haba siinja ohukanyaho abeeti boosi ohufwiinyiriraangaho abaandu baange haandi daawe. Ese malire ohubona koti lu baange basaandire.”
Omutuki w'endaalo chiichayo
9 #
Mat 21:5; Yow 12:15. Mweehoye, mweehoye, eng'we abaandu ba Siyooni!
Mwehuume neende esangaalo, eng'we abaandu ba Yerusalemu!
Tingaale, omutuki weeng'we ali ohwiicha yi muli!
Ali ohwiicha koti omuyiingiri haandi koti omuhiri,
nae omuloonga haandi oniinire hu suhiri
hu suhiri ndoto, emoosi y'esuhiri.
10 #
Sab 72:8. Omwaami aboola ati,
“Ese njia ohutusa ebigaari bilwaana ebiita mu Yisiraeli yoosi
haandi mbukule efaraasi choosi njituse mu Yerusalemu;
obuyiingo bwehoonyerwaanga mu biita buchia ohunyaaswa.
Omutuki weeng'we niye ochia ohuleetaangao omuleembe mu byaalo bikabuhaane;
achia ohutuka ohutulira elalira hu nyaanja ndala ohwoolera elalira hu nyaanja yiindi,
ohutulira elalira hu Mwaalo kwa Ewufuraate ohwoolera elalira yi syaalo syaakama.”
Ohukoboswa buyaaha hw'Abaandu ba Nasaae
11 #
Hut 24:8. Omwaami aboola ati,
“Ohweema hu ndagaano yaange naawe
eyasiirwa neende amabaanga k'ebiyaanwa,
ese njia ohuboololaanga abaandu beeng'we babe abalehuule
abalehuule ohutula hu buko bubulamo amaachi obw'obwiiruhiro.
12Kobole engo, eng'we abeeruhi bulaanu abalihoomo esuubi;
kobole mu bumenyo bweeng'we bw'omuleembe.
Bulaanu ese ndi ohuhuboolera endi ese njia ohuhwetuungiraho amahabi kabiri
neende ehabi hu biindu byoosi bi wasaandisirwamo.
13Ese njia ohwehoonyera Yuda koti oluyiingo lw'omunamaye
nae Yisiraeli koti obusaale.
Ese njia ohwehoonyera abasaacha ba Siyooni koti olugaanga,
ohulwaania abasaacha b'Ebugiriki.” 14Omwaami achia ohuboneheraanga hu baandu bae;
achia ohulasaanga obusaale bwae koti olumesu.
Omwaami achia ohuubba eturumbete;
Omwaami w'Obunyala achia ohuhuumbiraanga mu bifuusye bitulira emwaalo w'esyaalo.
15Omwaami w'Obunyala bwoosi achia ohulwaaniriraanga abaandu bae,
mani banyale ohusihirisaanga abasuku baabwe.
Bachia ohuyokeraanga mu biita koti abasaacha bameesi
mani beediseenge amabaanga k'abasuku baabwe;
mani kachia ohuhulukusaanga koti amabaanga k'esiyaanwa
akabbwomoolerwe hu alutaari ohutula mu bbakuli.
16Mani oludaalo olwo nilwahoole, Omwaami achia ohuwonia abaandu bae,
koti sa lu mwaayi yahawonia ebyaayo byae ohutula hu masira.
Bachia ohumesamesanira mu muhono kwae
koti obusaate bw'ekofia y'obutuki.
17Obulai neende esiiso silai byahaake yeena eby'esyaalo sino!
Abaandu baraaga bachia ohweemeda ohunyolaanga amaani ohweema hu mere neende efiini ebiri mu syaalo omwo.
Currently Selected:
Sekaria 9: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
