Abarooma EMANYISA

EMANYISA

Ebbarwa yi Paulo yaandiikira Abarooma Paulo yayandiika niyetekeha ohukeniya omukaanda kw'abafukiirira mu Kristo okwa Rooma. Endekeha yae yali eyohucha ohuhalaabanira abafukiiriri abo ohumala embaka ndiidi. Abafukiiriri abo nibaba nibamalire ohumuhoonya, yemeeda ohuchia mu syaalo sya Sipania. Paulo yandiika ebbarwa yino niyeekesa koti lu amanyire Efukiirira y'Esikristo neende koti obulamu bw'Abakristo buhoyere ohuba. Mu bbarwa yino nimwo mu Paulo atusira elalira mu bwiichufu enjekesa yidiira hu mboosi yae.

Paulo niyamala ohuheesa omukaanda kw'abafukiiriri mu Kristo okuli Rooma, haandi n'abeekesa koti lu abasabira, alomaloma tiiri by'adaha ohulomalomaho mu bbarwa yae ati, “Emboosi Ndai yituumbula koti lu Nasaae akolola abaandu baaba abaluungifu alala nae: ahola atyo ohubitira mu fukiirira yoong'ene.” (1:17)

Ohutula ao, Paulo yemeeda ohulandaasa amahuluundu k'emboosi yino. Aboola ati, abaandu boosi, Abayudaaya neende Abateende, bahoyera ohwesasaania neende Nasaae, olwohuba boosi alala bali aasi w'obunyala bw'esibi. Olwohuba abaandu beehola abaluungifu ohubitira muhufukiirira mu Yesu Kristo hwoong'ene. Paulo yemeeda ohweekesa ati obulamu buyaaha buhubaamo mu bulala neende Kristo, butula mu lwiiho luyaaha luno neende Nasaae. Omuundu ofukiirira mu Yesu Kristo, aba ow'omuleembe neende Nasaae, Mwooyo wa Nasaae amuboolola ohumutusa mu bunyala bw'esibi neende obw'ohufwa. Mu suula ya hataanu ohwoola hu ya hataanu-na-hadatu (5-8), Paulo alomaloma hu sichiiririrwa sy'Amalako ka Nasaae neende obunyala bwa Mwooyo wa Nasaae obuli mu muundu ofukiirira mu Kristo. Ohutula ao, omutume wuno achaaka ohulwaanakana neende esiteebo sidiira hu ngeri yi Bayudaaya neende Abateende beengirira mu ndekeha ya Nasaae yi yataawo hulw'abaandu boosi. Paulo amaliirisa n'aboola ati, Abayudaaya ohuhaya ohufukiirira Yesu, huli mu ndekeha ya Nasaae eyoosa hu baandu boosi embabaasi chae naabitira mu Yesu Kristo, haandi Paulo yomiisa koti lu amanyire ati, Abayudaaya haba sibachia ohwebwaaba Yesu endaalo choosi. Muhumaliirisa Paulo yandiika niyeekesa engeri yi Bakristo bahoyere ohweyiriramo. Haandi yeekesera elalira koti lu buheeri buhoyeere ohutuka obulala bweefwe neende abasyeefwe. Haandi alomaloma hu bidiira hu huhalaabanira Nasaae, Abakristo koti lu bahoyera ohuhalaabanira esyaalo syaabwe neende abaandu basyaabwe, ohuloondakanaanga mu mwooyo kyaabwe ebiindu bi bamanyire bati bihoyerwa. Amaliirisa ebbarwa yino neende engeraka yae omweene, neende emboosi chifumia Nasaae.

Ebiri mu bbarwa yino mu bwiimbikiti

1. Ohumanyisa neende amahuluundu k'alomalomaho. 1:1-17

2. Omuundu ahoyerwa obuwonisibwa. 1:18—3:20

3. Engeri yi Nasaae awonisiramo. 3:21—4:25

4. Obulamu buyaaha mu Kristo 5:1—8:39

5. Endekeha ya Nasaae eyiri Yisiraeli 9:1—11:36

6. Obulamu buhoyera Omukristo. 12:1—15:13

7. Enjakamo neende amaheeso. 15:14—16:27

Currently Selected:

Abarooma EMANYISA: SAMIA

Highlight

Compare

Copy

Want to have your highlights saved across all your devices? Sign up or sign in

Learn More About EBBAIBBO EMBOOSI YA NASAAE

Abarooma EMANYISA

Popular Bible Verses from
Abarooma EMANYISA

Bible:

Saamia

Version: EBBAIBBO EMBOOSI YA NASAAE - SAMIA