Abarooma 10

1Basyaange, ndekoomba neende omwooyo kwaange kwoosi endi, abaandu baange bosi banyale ohuwonisibwa! Ngambasabira eyiri Nasaae! 2Nyomiisa endi beweerayo elalira ohudaha Nasaae; nae ohweyaanayo hwaabwe haba sihweema hu humanya hwadyeeri. 3Basisiiri ohumanya engeri yi Nasaae aholeramo abaandu ohuba abaluungifu nae, ohutusaho bateemaho ohutaao engeri yaabwe abeene; mani sibewaayo abeene eyiri engeri yi Nasaae aholeramo abaandu ohuba abaluungifu. 4Olwohuba Kristo yaakamia Amalako, hu buli muundu yeesi ofukiirira anyale ohuholwa ohuba omuluungifu neende Nasaae.

Obuwonia bw'abaandu boosi

5 # Lef 18:5. Musa yaandiika hu bidiira ohuholwa ohuba abaluungifu neende Nasaae ohubitira mu hwooseresa amalako ati: “Oyo yeesi owoseresa ebilagiro bya amalako, achia ohuba omulamu.” 6#Amal 30:12-14. Nae bi byandiiko byoolerefu biboola hu bidiira hu huholebwa ohuba abaluungifu neende Nasaae ohubitira mu fukiirira nibyo bino: “Oteteeba mu mwooyo kwao oti, Wiina mweene oliniina Muukulu?” (Amahuluundu mbwe, ohwiisa Kristo aasi) 7oba oteteeba oti, “Wiina mweene oliiha aasi mu syaalo sy'aasi?” (Amahuluundu mbwe, ohuniinia aakulu Kristo ohutula mu bafu). 8Sino nisyo si byandiiko byoolerefu biboola: “Emboosi ya Nasaae yiri aambi naawe, yiri hu munwa kwao, neende mu mwooyo kwao” eyo niyo, emboosi y'efukiirira yi huli ohuyaala. 9Notuumbula neende omunwa kwao oti Yesu niye Omwaami haandi wafukiirira neende omwooyo kwao, oti Nasaae yamusyuuhisa ohutula mu bafu, ochia ohuwonisibwa. 10Olwohuba efukiirira yeefwe niyo eyikera hwaaba abaluungifu neende Nasaae; ohutuumbula hweefwe nihwo ohukera hwawonisibwa. 11#Yis 28:16. Ebyandiiko byoolerefu biboola biti, “Oyo yeesi omufukiiriramo, haba saachia hudiiswa esoni.” 12Sino sidiira hu buli muundu yeesi, olwohuba abulao engabuhana akati w'Abayudaaya neende Abateende; Nasaae mulala niye Omwaami w'abaandu boosi haandi aberesa buli muundu omulaanga ehabi. 13#Yoel 2:32. Koti lu byandiiko byoolerefu biboola biti: “Buli muundu yeesi olaanga eliita ly'Omwaami achia ohuwonisibwa.”

14Nae banalaange batye omuundu yibatafukiiriramo? Haandi banaafukiirire batye mu muundu yi batawuliraangaho? Haandi banaawulire batye ataali omuundu oyaala? 15#Yis 52:7. Haandi abaandu banayaale batye nibataayirirwe? Koti lu byandiiko byoolerefu biboola biti, “Ohwiicha hw'abaandu baleeta emboosi ndai nga hulai!” 16#Yis 53:1. Nae abaandu boosi haba sibafukiirira Emboosi Ndai. Omunabbi Yisaaya mweene yesi yaboola ati, “Omwaami, wiina owafukiirira emboosi yeefwe?” 17Sakira, efukiirira yitula hu huwulira emboosi, haandi emboosi yitula hu huyaala Kristo.

18 # Sab 19:4. Nae ndeeba endi: Syadyeeri siti haba sibawulira emboosi? Ngandi bawulira olwohuba koti ebyandiiko byoolerefu biboola biti:

“Ekono lyaabwe lyawuliirihana ohwoola mu syaalo syoosi;

emboosi chaabwe choola yi syaalo syaakama.”

19 # Amal 32:21. Haandi ndeeba endi: Mani abaandu ba Yisiraeli haba sibamanya? Musa mweene niye owataangira ohukobolamo ati:

“Njia ohwehoonyera esyaalo syali sitahoyera

ohuwaambia abaandu baange ebihali-hali;

haandi nindehoonyera esyaalo sy'abaandu basiru

njia ohudiisa abaandu baange etima.”

20 # Yis 65:1. Haandi omunabbi Yisaaya kata ali neende obwomiifu n'aboola ati,

“Abaandu bali nibatangoonya, nibo abanjakaana;

ndabonehera abaandu bali nibateeba.”

21 # Yis 65:2. Nae ebidiira hu Yisiraeli Yisaaya yaboola ati, “Ndasiingisa amahono kaange aakulu oludaalo lwoosi ohwakaanira abaandu batawulira haandi abajeemu.”

Currently Selected:

Abarooma 10: SAMIA

Highlight

Compare

Copy