Esabbuli 76
76
Nasaae muyiingiri
1Nasaae yamanyihana mu syaalo sya Yuda,
eliita lyae hunuufu nilyo mu Yisiraeli.
2Obumenyo bwae buli mu Yersalemu,
yamenya hu Lugulu lwa Siyooni.
3Eyo niyo yi yafunakira obusaale bumesa-mesana,
ehuumba, engaanga, neende ebilwaaniso by'ebiita.
4Oli ow'oluyaali, ewe Nasaae, ohiramo obuhunuufu
n'otula hu ngulu
yi wayiingirira abasuku bao.
5Abalwaani baabwe bahiramo amaani,
ebyo byoosi bi bali nabyo babibatusaho;
bulaanu beeyalisa ataali ohuyeera daawe.
Amaani kaabwe neende esinani haba sibibahoonya daawe.
6Niwabanyekaho oti sa, Ewe Nasaae wa Yakobbo,
abeerusi b'efaraasi alala neende efaraasi cheene, bakwa eyo mani balambaalirao.
7Nae ewe oli ow'amatiichasi!
Wiina mweene onyala ohweema mu moni wao
etima lyao nilisiingiraho kata ehabi lala liti?
8Ohutulira Muukulu bweene, ewe niyo y'oheengeraanga emisaango;
esyaalo sy'atya mani syeema tiiri,
9Nasaae niyasiingira yachaaka ohutaao eheenga y'emisaango
ohuwonia abo boosi abali nibafwiinyirirwa neende esyaalo.
10Mubwadyeeri bweene, etima ly'abaandu nilyo elichia ohuhwiisamo oluyaali n'obayiingiire.
Abahawone ebiita bahahufumie nibeehoya.
11Ewe hola obweyamo bwao eyiri Omwaami Nasaae wao, mani mumuberese bi mweeyama.
Lehe abo boosi abamwebodoohaanie bamuleetera ebiyaanwa
eyiri oyo ohoyere ohuwiisamwo oluyaali.
12Oyo niye oloongoyasaanga abachweenufu,
haandi yatiisa abatuki bohu syaalo huno.
©Bible Society of Kenya, 2019
©Bible Society of Uganda, 2019