Esabbuli 71
71
Esaala y'omuundu mukofu
1Ewe Omwaami, njiruhira yooli;
otaandeha esoni chandiira daawe!
2Mu buluungifu bwao, monie mani wuununule;
mbulire mani wuumonie!
3Ewe ba olwaanda lwaange lu ndeyikamamo,
olukoba lw'amaani, olunyala ohuumonia,
olwohuba ewe niiwe olwaanda lwaange, haandi olukoba lwaange.
4Ewe Nasaae waange, nunule wuunduse mu muhono kw'omubi,
ohutula hu giribba y'omuhola-mbi, haandi omwaalaba.
5Olwohuba ewe Omwaami, niiwe esuubi lyaange,
obweesikwa bwaange, ewe Omwaami waange, ohutulira elalira mu mubuyere bwaange.
6Niiwe yindesigamaho, ohutulira elalira mu hwiibulwa hwaange;
ewe niiwe owaandusa mu nda ya maama.
Mani niiwe yi fumia esiha syoosi.
7Ese mbeere esyohuboneraho eyiri abaandu baangi;
olwohuba niiwe obwiiruhiro bwaange bw'amaani.
8Omunwa kwaange kweechulamo ohuhufumia hwoong'ene,
neende oluyaali lwao oludaalo lwoosi.
9Otaasukuna eyale mu ndaalo ch'obukofu;
otaandeha amaani kaange nikamalire ohuumbwamo.
10Olwohuba abasuku baange bali ohulomaloma ebiindu bindiiraho,
abo abali ohulondoola obulamu bwaange bali ohweteebanaho,
11nibaboola bati, “Nasaae yamala ohumujwaang'a;
mumwiruhanie mani mumuwaambe,
olwohuba abulao oyo yeesi ochia ohumununula.”
12Ewe Nasaae, otaba eyale muno naange;
ewe Nasaae waange, yanguyaho wuuhoonye!
13Abaambabira boosi esoni chihoya chabadiira, haandi baasihiriswa;
bahoya bafuunihwa neende okusinye, alala neende ohuchalaala
abo abakoonya ohubona ohunyaaliha hwaange.
14Nae ese njia ohwemeeda ohusuubira,
haandi njia ohwemeeda ohuhufumiaanga.
15Omunwa kwaange kuchia ohulomalomaanga ebiholwa byao biluungifu,
ohulomlomaanga ebiholwa byao by'obuwonia oludaalo lwoosi,
olwohuba obuungi bwaabyo bwamala ohuhira ohumanya hwaange.
16Njia ohuchia neende amaani k'Omwaami Nasaae,
njia ohufumia obuluungifu bwao, obwao bwoong'ene.
17Ewe Nasaae, ohutulira elalira mubuyere bwaange, ewe niiwe owuunjekesaanga,
haandi kata buti, nomanoma hu biholwa byao biwukisa.
18Mani kata ese niingofula ndaaba neende embuchi,
ewe Nasaae waange, otaanjwaang'a,
ohwoola lu ndinyala ohuyalaanga obunyala bwao buungi
eyiri amase koosi akachia ohwiichia.
Obunyala bwao 19neende obuluungifu bwao, ewe Nasaae,
bwoola aakulu Muukulu bweene.
Ewe owaholaanga ebiindu bihunuufu biingi,
ewe Nasaae, wiina mweene ofwaanana naawe?
20Ewe owakera ndoola ohubona ebidinyu bihoongo biingi
niiwe haandi ochia ohungobosamo omwooyo;
ohutula ebusiba w'esyaalo
ewe niiwe ochia ohuusiingisa mani ndeema haandi.
21Ewe niiwe ochia ohwiingiya oluyaali lwaange,
mani waakera ndasangaala haandi.
22Ese haandi njia ohuhufumia neende obuhana
hulw'obweesikwa bwao, ewe Nasaae waange;
ese njia ohuhweembera niihufumia neende eduungu,
ewe Omwoolerefu Mweene wa Yisiraeli.
23Njia ohuhumula neende esangaalo,
nihweembera niifumia;
neende obulamu bwaange bwoosi, olwohuba wamonia.
24Njia ohukaniaaya hu buhoonyi bwao buluungifu
oludaalo lwoosi,
olwohuba abo bamala ohudiirwa esoni, haandi bamalwamo oluyaali
abo abali nibakiiya ohunyayaala.
©Bible Society of Kenya, 2019
©Bible Society of Uganda, 2019