Esabbuli 45
45
Olweembo lwohu sidyaalo sy'omutuki odehiisye
1Omwooyo kwaange kwichuule ebilai by'ohukaniaaya;
koti lu tekehera omutuki olweembo;
olulimi lwaange luli koti ekalaamu y'omwaandiki mulai owetekeehe ohwandiika.
2Niiwe omulai ohiramo mu baandu boosi;
byoolomaloma bilai bihaya;
Nasaae yahuberesa ehabi ch'endaalo choosi.
3Mu luyaali lwao neende amaani,
weboye mu sibuno oluhoba luliho olugaanga, ewe ow'obunyala!
4Mu bunyala bwao, chia mani oyiingire
n'olwaanilira obwadyeeri haandi n'oliinda ebiindu bilai;
leha omuhono kwao muluungi kweekese eby'amayia by'ohola!
5Obusaale bwao bwooki
bufumite emyooyo ky'abasuku b'omutuki
abaandu boosi bahwiisamo oluyaali.
6 #
Abaib 1:8,9. Esisaala syao sy'obutuki si Nasaae yahuberesa syohuyiindira emyaaka kyoosi.
Endawusi yao y'obutuki y'obwadyeeri niyo.
7Ewe waheera obuluungifu nae waasyuula obubi.
Sakira Nasaae, Nasaae wao yahubaha amafuta
amafuta k'esangaalo ohuhira abaandu basyo boosi.
8Ebyefwaalo byao biwunya esing'aari sya miira neende esy'alobeera neende esya kasiiya.
Mu madooho kasaatwa neende ameeno k'enjofu nimwo mubahweembera hu biriri ohuhusangaasa;
9mu bahasi bahuberesa oluyaali mulimo abahaana b'abatuki;
omutuki muhasi owefwaalire engubo ch'esaabbu ya Ofiri ahweemere hu muhono kwao muluungi.
10Ewe muhaanang'ene, tekeeresa mani obaase hu bi mboola;
yibirira abaandu bao neende abanaluyia bao;
11mani omutuki achia ohwekoomba obulai bwao.
Nae koti lu ali omwaami wao, mwiisemo oluyaali.
12Abaandu ba Tiiro bachia ohuhuleetera ebiyaanwa,
abaandu bahiramo obuyiinda 13neende obuyiinda bukabuhaane.
Omuhaana w'omutuki naali mu siseenge syae niyefwaalire engubo ching'enaang'ena ech'esaabbu;
14ech'amakoondo maangi achia ohuyirwa eyiri omutuki,
naali neende abahaana baasye bataamanyireho eby'abasaacha, nibamugooba mu bweeya.
15Baleetwa neende esangaalo haandi nibehoya
mani nibeengira mu dooho ly'omutuki.
16Abaana bahalye obwaami bwa balaata yaabwe;
mani wahabahole baaba abatuki mu syaalo syoosi.
17Njia ohukera eliita lyao liisibwemo oluyaali neende abaandu b'endaalo choosi;
sakira abaandu bachia ohuhufumia emyaaka kyoosi pe.
©Bible Society of Kenya, 2019
©Bible Society of Uganda, 2019