Engaado 3
3
Ohukerakira abaraaga
1Mwaana waange, oteebirira bi hweekesa,
nae leha omwooyo kwao kudiire ebilagiro byaange;
2olwohuba wahanyoole ohuyiindira hw'endaalo nyiingi neende emyaaka miingi
mani wahanyoole obulamu bw'omuleembe.
3Otalehanaanga neende obwadyeeri neende obweesikwa;
biboyeenge muukosi mwao,
byandikeenge hu mwooyo kwao.
4 #
Luk 2:52. Ao mani ochia ohusiimwaangwa haandi odahweengwe
mu moni wa Nasaae neende mu w'abaandu.
5Weesikeenge Omwaami neende omwooyo kwao kwoosi,
haandi otesikaanga ohumanya hwao hwoong'ene.
6Mu buli siindu sy'ohola, yichulisaanga Omwaami,
mani achia ohweekesaanga engira ndai.
7 #
Rom 12:16. Oteekesiyasaanga omweene;
tichaanga Omwaami, mani ohayeenge ohwonoona.
8Esyo sinabecheenge amalesi kawonia ebikoonjo byao
haandi esyahayenjeese obuchuuni bw'amakuumba kao.
9Yisaanga oluyaali mu Omwaami n'omuyaanira hu biindu byao
haandi omubechaanga ebiindu bilai bi otaangira ohukesa byoosi;
10ao mani ebyaaki byao bichia ohwiichulaanga ekesa,
haandi ebinyuhiro byao bichia ohwiichulamo efiini ndai.
11 #
Yob 5:17. #Abaib 12:5,6. Mwaana waange, Omwaami byahukerakira, haba otabirekeresaanga
haandi otasinyihaanga n'ahwolobya.
12 #
Hubwi 3:19. Olwohuba Omwaami akolola abo b'adaha,
koti omwiibusi lu akolola omwaana yi yehoyeramo.
13W'ehabi oyo oli neende makesi,
haandi w'ehabi oyo onyoola ohumanya,
14olwohuba omukabo ku onyoolamo kuhira omukabo kw'efeesa
haandi omusaara kwaako kuhira esaabbu.
15Amakesi k'engaanga ohuhira amakina k'engaanga,
haandi sibulao esiindu si wekoomba esinyala ohukeranisibwa hu Makesi.
16Makesi akera n'oyiindira
haandi kahuberesa obuyiinda neende oluyaali.
17Makesi ahuberesa obulamu bw'ohusangaaliraangamo,
haandi emihoosi kyako kyoosi ky'omuleembe nikyo.
18Makesi niye omusaala kwobulamu eyiri abo abamwomiiriraho;
b'ehabi abo abakomiiriraho.
19Omwaami esyaalo sino yasiloongera amakesi;
haandi ekulu yalitaao neende ohumanya;
20amakesi kae niko kahulukusa emyaalo,
haandi niko akakwiisa aasi olume.
21Mwaana waange, wediireenge hu makesi malai neende ohwehaliirisa;
otalehaanga kahweeyibaho mu moni wao,
22mani bichia ohuba obulamu bwao
haandi binyirisa muukosi mwao.
23Mani wahakeende bulai olukeendo lwao
haandi haba siwaheegumule.
24Niwahehala aasi, haba soochia hutya;
niwaheyalise aasi ohukona endoolo chahahulyoyereenge.
25Oteyendehereraanga amasira nikahukwaaho,
oba ohusihirira hw'esyonoono nihuhukwaaho koti omuyaka;
26olwohuba Omwaami niye ochia ohuhuliindaanga
haandi achia ohukeraanga ohaya ohukwa mu muteego.
27Otahayaanga ohuhoonya abo abadaha obuhoonyi,
nooba noonyala ohuhoonya.
28Otabooleraanga owaasyo oti, “Waawo bulaanu, mani okobole hale,
njia ohuhusiberesa muchuli” nooba nooli nasyo ebiha ebyo.
29Otaholaanga endekeha yohuholera owaasyo esibi
owamenya aambi naawe nahweesika.
30Otasoolanaanga neende omuundu ataali esifune,
ataali esibi syahuholere.
31Otekoombaanga omuundu w'egiili
haandi otaheengaangao ohuloondakana neende ebiholwa byae;
32olwohuba Omwaami haba saadaha omuhola mbi,
nae yeesika abaluungifu.
33Omwaami abwaaba enyuumba y'abahola-mbi,
nae aberesa ehabi abo abamenya mu buluungifu.
34 #
Yak 4:6; 1 Pet 5:5. Mulekeresi eyiri abalekeeresi,
nae eyiri abaloonga, abakwiira esisa.
35Abakesi bachia ohunyoola oluyaali,
nae abasiru, bahemeede sa ohudiirwaangwa esoni.
©Bible Society of Kenya, 2019
©Bible Society of Uganda, 2019