Engaado 18
18
1Abeeyawula hu baasye baba beekoonyera ebyaabwe boong'ene;
haandi sibafukirisania neende bi baandu baandi bamanyire koti ebyadyeeri.
2Omusiru haba sadeebayo ohumanya esiindu oba daawe;
nae adaha sa ohulomaloma esiri mu mwooyo kwae.
3Ohuhola esyonoono huleeta esoni chosi;
haandi ohwonoona huleeta ohumalamwo oluyaali.
4Emboosi chi muundu alomaloma chiri koti amaachi k'olusiba;
haandi yi makesi kachaakira yiri koti omwaalo kuhulukusa.
5Haba sisilai ohukwiira omuhola-mbi,
oba ohuheengera omuundu muluungifu omusaango ohumuhira.
6Emboosi ch'omusiru chileeta ohuyiingana,
haandi aba yekoonyera ohuhuywa.
7Omusiru bi alomaloma nibyo ebimusihirisa,
haandi emboosi chae nicho omuteego kumudiira.
8Emboosi ch'omumoonyi chinyunyuulira muno owulira;
chiihirira aasi ohwoola mu nda bweene.
9Oyo ohola emirimo kyae neende okusinye
ali nasilala neende oyo ochisihirisa.
10Eliita ly'Omwaami munaara kw'amaani;
abaluungifu niyo yiberuhira mani nibanyoola obweyikamo.
11Abayiinda babaasa bati obuyiinda bwaabwe nibwo esiko syaabwe sy'amaani,
haandi bati nibwo olukaka luleeyi lu bakairira.
12Ohwehuduumbasa nihwo ohutaangirira ohusihirira,
nae obuloonga nibwo obutaangirira ohunyoola oluyaali.
13Omuundu okobolamo n'asisiiri ohuwulira,
aba omusiru haandi adiirwa esoni.
14Obugumu bw'omuundu bukera yesimiirisa mu bulwaae;
nae n'atusaho omwooyo, esuubi nilikotao.
15Abaandu bamanyirifu bakoonya ohumanya,
haandi abaandu bakesi bakoonya ohumanya.
16Esiyaanwa sy'omuundu simwiikulira engira
haandi sikera yoola eyiri abaandu bahunuufu.
17Omuundu otaangira ohulomaloma mu siina niye obaasa ati wadyeeri,
ohwoola lu wuundi yoola ohumuyiingania.
18Eha yakamya ohuyiingana,
haandi yiheengera ab'amaani omusaango.
19Ohuhoonya omwibulana huli koti esiko sy'amaani,
nae ohusolana neende omwibulana huli koti ohweyikalira erwaanyi w'enyuumba yae.
20Omuundu ahoyere ohugumira ebiindu bi alomaloome,
agumire ebiindu bi alomaloome.
21Olulimi luli neende obunyala bw'ohuleeta ohufwa oba obulamu,
mani omuundu abecheenge omwetekefu ohufukiirira bi alomalome bileeta.
22Oyo onyoola omuhasi w'ohudeehya aba anyoolere esiindu silai,
haandi Omwaami aba amubereese ehabi.
23Abamanani balomaloma neende obuloonga,
nae abayiinda bakobolamo n'ohuhabuha.
24Baluwo abeecha baandi abekaadirisa mbwe b'obwiicha esiha sidiidi sa,
nae wabaao omwiicha ahwomiiriraho ohuhiraho kata omwiibulana.
©Bible Society of Kenya, 2019
©Bible Society of Uganda, 2019