Engaado 16
16
1Omuundu niye otekeha esy'ohuhola,
nae Omwaami niye oli neende emboosi yimalirihaayo.
2Omuundu abaasa mu mwooyo ati buli siindu sy'ahola silai nisyo,
nae Omwaami niye opiima esiri mu mwooyo kw'omuundu.
3Buli siindu sy'ohola sidiise Omwaami,
mani ebyo byoosi by'otekeha bicha ohwolerera.
4Buli siindu Omwaami yasihola naali neende esichiiririrwa,
kata katyo boosi bali neende oludaalo lw'ohusihirisirwaho.
5Omwaami haba saadaha buli muundu yehusya-husya,
abulao yibaheeruhire esibonereso si yahababereese.
6Ohuba ow'esisa neende obwadyeeri nibyo ebileheramo ebyonoono,
haandi mu hutya Omwaami nihwo ohutusa omuundu mu bubi.
7Omuundu n'ahola ebisangaasa Omwaami,
kata abasuku bae abahola baaba abeecha bae.
8Ahadiidi h'onyoola mu buluungifu
hahira ebiingi bi onyoola n'otehoonyeere obwadyeeri.
9Omuundu niye otekeha esy'ohuhola,
nae Omwaami niye otereesa engira yae.
10Nasaae niye otereesa enomanoma y'omutuki;
niye omuhoonya mani yahaya ohudoondobana mu huheenga omusaango.
11Elatiri ndai neende ebipiimo bilai nibyo bi Omwaami adaha;
haandi buli bukusi bwoosi adaha bube obwadyeeri.
12Syoomusiro omutuki ohwonoona,
olwohuba obunyala bwae bw'ohutuka abunyoola mu huhola ebiluungifu.
13Omutuki asangaalira abamuboolera ebiluungifu,
haandi adaha oyo olomaloma ebyadyeeri.
14Omutuki nanyolera, anyala kata ohwiita omuundu,
mani omuundu mukesi ateemaho koti lu anyala ohumusangaasa bwaangu.
15Omutuki n'asangaala, abaandu bae baba abalamu,
haandi esisa syae siri koti ebireesi bileeta efula y'etoocho.
16Oli neende amakesi ahira eyale esaabbu;
haandi ohudoola ohumanya, silai ohuhira ohudoola efeesa.
17Abaluungifu bebwaaba ohwonoona;
haandi oyo onaawonie obulamu bwae ali neende ohwehaliirisa mu saambo chae.
18Ohweninia huleeta ohusihirira,
haandi ohwehuduumbasa hutulamo ohukwa.
19Ohweloongoyasa mani waaba alala neende abamanani,
huhira ohukabana ebiindu bipeeye neende abehuduumbasa.
20Oyo ofukiirira bi bamweekesa yahahulahulane,
haandi oyo owesika Omwaami w'ehabi niye.
21Omuundu ow'amakesi niye omanyihaane koti omanyire,
haandi ow'enomanoma yisangaasa niye owiikusa bwaangu muno mu mboosi.
22Amakesi k'omuundu mumanyirifu kamutuliramo obulamu,
nae ohweekesa omusiru, oba ohalaabanira bihaya byeene.
23Omuundu w'amakesi alomaloma ebirimo amahuluundu,
haandi bi alomaloma biikusa muno.
24Emboosi chisaangaasa chiri koti obuuhi,
chinyunyuulira omwooyo haandi chikobosa obulamu mu mubiri.
25 #
Eng 14:12. Engira yi muundu abaasirisa ati ndai,
nayo niyo eyimuyira mu hufwa.
26Obwekoombi nibwo obuleetera omuundu ohuhalaabana;
olwohuba adaha ohulya yekute.
27Omuundu mubi obula obuhoonyi akoonya engira y'ohuyaala abaandu baandi,
haandi enomanoma yae yaaduha koti omuliro.
28Abaandu badoondobanu bakeesa obusoolo,
haandi omumoonyi akabuhania ab'obwiicha.
29Omuundu mwaalaba abachirisa owaasye,
mani yamuta hu ngira yitali ndai.
30Oyo ofwiinya emoni aba atekeha ebiindu bidoondobanu,
haandi oweluma-luma omunwa aba ali neende esyonoono syatekeha ohuhola.
31Embuchi ch'obukofu nicho ekofia y'oluyaali;
haandi nicho omukabo kwobulamu buluungifu.
32Omudiira kaala otanyoolera bwaangu, ahira omulwaani w'amaani,
haandi owetuka mu mwooyo ahira owaamba esiko.
33Abaandu bahubba eha babone esinatulemo,
nae Omwaami yeeng'ene niye oheengao yi yinakwiire.
©Bible Society of Kenya, 2019
©Bible Society of Uganda, 2019